المشاركة الأصلية كتبت بواسطة bonanza
سلام عليكم
يا باشا موضوع تجليد العربية بلون اسود مط ده جااااااااامد جدا
انا عملتها في عربية واحد صاحبي معاه كورولا 2007 لونها اسود و هو كان قلقان بردو و خايف علي الدهان بتاع العربية ( هو من النوع المحسوك اوي )
بس بصراحة لما عمل العربية العربية اتغيرت 180 درجة
العربية والله العظيم شكلها بقي تحفة فنية و كل اللي بيمش جنبة رقبتة بتتلوح علي شكل العربيه و ناس كتير لما ببقي راكب معاه بتسألة هو ده رش ولا استيكر هو ده دهان جديد نازل ... كل ده مش مهم
الغلس في الموضوع بقي انك كمان هاتلاقي الناس ماشية تحسس علي العربية و انا صاحبي ده مرتبط بالعربية ارتباط خنيق بيحس ان الناس بتحسس عليه هو مش علي العربية
والله العظيم كنا واقفين في اشارة و جه راجل جنبنا بعربية 125 و فضل يقرب لما العربيتين كانوا هايلمسوا بعض راح مادد ايده من جوة عربيتة و حسس علي العربية ( يعني ممكن يحك العربية عشان يحسس ) صاحبي كان هاينزل يتخانق مع الراجل
عاوز بقي اقولكو ان التكلفة مش غالية اوي هو دفع 700 جنيه بس زائد الاكرامية للصنايعية اللي عملوها بس بصراحة العيال ايديهم تتلف في حرير
الراجل اللي عملها في الهرم مش عاوز اقول عنوانة عشان مايبقاش اعلان بس والله العظيم انا ما اعرف صاحب المحل ولا ليا اي علاقة بيه غير اني عملت عنده عربية صاحبي ده
خد بالك بقي لو عملتها هاتزهق و تتخنق من كتر اسألة الناس في الشارع و التحسيييييييييس