حدث في أوتوماك (ياريتني ماروحت)
الاخوة الاعضاء الكرام ....
النهاردة كان عندي أجازة قولت أفسح الاولاد و أغير جو و أقترحت أننا نروح معرض أوتوماك منها اشبع هوايتي الاولي المحببة الي نفسي و منها أوري أبني حاجة جديدة و مختلفة و قولت فرصة أصالح نفسي مع العربيات بعد حملة خلوها تصدي و قراري بالامتناع عن شرا أي عربية جديدة بعد مابعت عربيتي السنة اللي فاتت و أكتفائي بالياريس
المهم خلصنا بعض المشاوير و طلعنا علي أرض المعارض
طبعا كنت عارف أننا هانمشي جوه كتير فأخدنا عربية أطفال علشان بنتي الصغيرة كانت نايمة و صعب نشيلها طول الوقت و هنا كانت المفاجاة لي و لكل الناس اللي معاهم أطفال .... بوابات الدخول ضيقة يعني لازم تطوي العربية علشان تدخل و فعلا عملت كده و نتيجة لستعجالي العربية قفلت علي أيدي و أتعورت و لحد ساعة فاتت كان صباعي لسه بينزف
المهم كملنا داخل المعرض و طبعا مشينا حوالي نصف ساعة داخل صالات قطع الغيار بشكل أجباري وسط مطالع و سلالم كتير بشكل ارهقنا
طبعا اخدنا الاوتوبيس و توجهنا لصالات العرض اللي خلت من أي متعة أو أبهار و العارضين كان ينقصهم أدني درجات المعرفة عن السيارات اللي هما واقفين جنبها زي مايكونوا أختاروا ناس ماشية في الشارع و قالوا لهم تعالوا أقفوا هنا
تسأل أي حد عن مواصفات أي عربية يبص لك ببلاهة و كأنك بتتكلم هندي أو جاي من كوكب زحل و في الاخر أنت اللي تجاوب علي السؤال اللي سألته لنفسك حتي السعر مش عارفينه و بيتلخبطوا فيه
طبعا الاسعار نار و المواصفات مش زي الاصل و كأن الوكلاء متفقين علينا يحرقوا دمنا و يذلوا انفاسنا أننا نشوف العربيات اللي بنشوفها برة
طبعا اتحرق دمي أكثر من مرة و كانت الحرقة الكبري في قسم "تويوتا" لما شوفت "الياريس" اللي حلقوا لها كل الاوبشن و الكماليات اللي كانت فيها و نزلوها بالسعر ده
المهم مشيت و أنا كاره للعربيات و لشراء أي عربية من مصر أكثر من الاول و أظن أني مش هأروح أي معرض تاني الي امد غير معلوم
أن شاء الله بكرة أحمل لكم الصور مع وصف للجولة اللي قمت بها في أوتوماك 2010 (أخر معرض أحضره أن شاء الله)
مع خالص تحياتي
م/ سمير الشهاوي
