تجربتي والتغيير من بنزين 80 إلى 90

**الصيداح** · 06-06-2010 03:42 PM

سلام الله عليكم

السيارة عندي كان بها مشكلة عويصة وهي التقطيع بشكل دائم مهما فعلت
السيارة عقدتني في حياتي كل لما أرفع رجلي من على البنزين الأر بي إم ينزل للأخر والعربية تبطل مني وأدور وهكذا دواليك
فضلت بالمشكلة دي حوالي شهرين كل لما أروح للميكانيكي ينظف الكربراتير وبيك السلانسيه وأمشي يوم واحد بالظبط وأرجعله وأنا اللي غرمان
وغيرت جميع الفلاتر وفكيت تانك البنزين ونظفته وبرده مفيش حل
غيرت البوجيهات وأسلاكها وأيضا لا حل
غيرت أكثر من 3 بنزينات ولا حل أيضا
بصراحة ضقت ذرعا بالسيارة لدرجة أني كنت ممكن أولع فيها

المهم لقيت بعض الإخوة هنا بيتكلموا عن البنزين ال80 ومساوئه والبعض الأخر يقول عكس ذلك فقل أجرب التسعين
جربت التسعين بالرغم من أن السيارة قديمة ولا تحتاج للتسعين

وكانت هذه هي النتائج

1- السرعة و السحب لم ألحظ أي شئ
2-صوت الماتور زي ما هو جرار زراعي
3-التقطيع أختفى تماما

ومنذ 3 أشهر الأن لم أنظف الكربراتير ولا البيك ولا مرة ولله الحمد أختفى التقطيع تماما

كانت هذه تجربتي أتمنى أن يستفيد أحدكم منها
وجزاكم الله خيرا

**amrelsaqqa** · 06-06-2010 05:12 PM

ما شاء الله
الف مبروك يا باشا
بالنسبة لصوت الموتور و السحب ممكن تروح للميكانيكى وتخليه يعلى الكهربا شوية على الوضع الجديد
وان شاء الله تحس بفرق

**أبو صلاح** · 06-06-2010 05:20 PM

بص ياباشا
عن تجربة
لازم حد متخصص كربراتير بس مش الميكانيكي

في ورش متخصصة بتشتغل بأجهزة مش يدوي
هم دول اللي بيظبطوا الدنيا

وطالما بتستخدم بنزين 80 يبقى تعملهم زيارة كل 3 أو 4 شهور علشان تطمئن ان الكربراتير بيتشغل بكفاءة

**الصيداح** · 07-06-2010 11:32 AM

جزاكم الله كل الخير
شكرا لمشاركتكم
وبإذن الله أشوف موضوع تعلية الكهرباء ده

**cyborg_ift** · 07-06-2010 12:15 PM

مبروك يا باشا بس والله مش فارقه كتير

**ahit** · 07-06-2010 01:35 PM

أكيد البنزين 90 أفضل و أنضف لكن للأسف مش أوفر
أنا لما كنت بستخدم ال 90 كان السحب و الآداء ممتاز طبعاً لكن مع المشاوير الكتير داخل البلد لقيته مكلف جداً لكن لو فى السفر فهو أفضل 1000 مرة من ال 80 اللى مليان شوائب و قرف

**D . a .\ AYMAN** · 08-06-2010 03:14 AM

من مساوئ بنزين 80 فعلا إنوا مش نضيف وفيه نسبة شوائب عالية في مصر ... ليه معرفش ... زي مايكونوا مستخسرينوا في الشعب وشايفينوا كتير عليهم عشان رخيص فبيحطوا عليه شوية زبالة قبل مايبيعوه للناس

بس إنت لو إتعودت كل فترة أو كل ما العربية تبتدي تبطل تنزل إنت تفك بيك السلانسيه وتنضفه بإيدك وخلاص على كده الأمور هاتمشي معاك

في البيجو كان دايما لما العربية تبطل أول ما أشيل رجلي من على البنزين أقوم نازل فاكك بيك السلانسيه وأنفخ فيه وخلاص خلصت الحكاية لغاية ما تبتدي تبطل تاني ... مش محتاجة ميكانيكي ولا كل شوية تفك الكاربيراتير ولا حاجة ... لأن كده يبقى بنزيين 92 أرخص لك

بس إعرف مكان البيك فين وبيتفك إزاي وخلي المفك بتاعه دايما جاهز معاك