بسم الله الرحمن الرحيم
شباب كتير بيفكروا في موضوع فتح الصيدلية..وسألوني على الخاص
أنا قولت أعمل الموضوع هنا لعموم الفايدة ..وفتح باب النقاش
الأجراءات معروفة ومش مشكلة
هبدأ....بالمشروع نفسه
إحتياجات المشروع:
1.المكان:
لازم مكان الصيدلية يكون مجاور لتجمع سكني مميز..أو يكون قريب من تجمع أطباء..أو من مستشفى
الحاجات دي هتوزد من دخل الصيدلية
2.العاملين:
لازم يكون معاك عاملين خبرة أو صيدلي متمرس
لو هتفتح في مدينة..لازم يكون صيدلي موجود في كل شيفت.علشان التفتيش الصيدلي لازم ييجي يلاقي صيدلي في الصيدلية(ولو ملقاش بيعملك محضر ..وغرامة 10 جنيه بتدفعها في النيابة التابعة لها المنطقة إلي إنت فاتح فيها)
3.البضاعة:
الصيدلية (كمشروع)بتبيع الأدوية البشرية ومستحضرات التجميل والمستلزمات الطبية
وبشكل غير شرعي..بعض الصيدليات البشرية بتيع أدوية بيطرية
...تجيب الدوا منين..والمستحضرات منين؟؟؟؟؟
أفضل مكان إنك تفرش منه صيدلية هوا مخازن الأدوية في المنصورة(بالنسبة لمنطقة الدلتا)
وبوجه عام
المخازن أفضل في الخصومااااااااات كتير من الشركات
الشركات خصمها لايتجاوز الـــ20%
المخازن خصومتها بتزيد عن كده كتير..ممكن توصل في بعض الأدوية لــ30 أو 35 %
والفرق إنت أولى بيه
4.التكلفة:
تكلفة مشروع الصيدلية ..تكلفة نسبية
يعني بتختلف حسب المنطقة إلي هتفتح فيها..بشكل عام
الصيدلية ممكن تتفرش فرشة كويسة بــ50.000 جنيه..مع الإهتمام بالمستحضرات التجميلية في أول شغلها
وطبعا
الأدوية إلي هتجيبها...لازم تاخد لفة على كل الدكاترة في المنطقة وتشوف بيكتبوا إيه
وماينفعش تروح لواحد صيدلي تقوله إديني كشف بالدوا إلي عندك..علشان مش هيفيدك على إعتبار إنك منافس ليه..إلا لو كان شخص مقتنع إن الرزق بتاع ربنا(صيدلي جالي من شهرين وكان مرخص صيدلية وعاوز يفرشها.وجالي إديتله كل الأدوية إلي عندي على فلاشة ...علشان الرزق بتاع ربنا)
وخد بالك
ماتجيبش أدوية كتير في الأول ..علشان ماتفضلش عندك على الرف لحد لما ينتهي تاريخ صلاحيتها
ولازم تجيب الأدوية إلي بتتكتب في المنطقة إلي إنت فاتح فيها
وحاول
توفر كمية من لبن الأطفال ...والأنسولين
علشان دي بتدي إنطباع كويس عن الصيدلية في الأول..وبتعمل زبون
...................
أي أسألة أنا جاهز
