الموضوع: أسعار الشقق في مدينتي ...... شئ مستفز للغاية

المشاركة الأصلية كتبت بواسطة enas75

علي فكره يافندم انا بوضح بس حاجات لبعض الزملاء ...ان المشاريع دي معموله لفئه صفوه المجتمع واغنياؤه
وهناك ايضا شركات عندها مشاريع اقل في الاسعار بتستهدف فئات مختلفه وبتستهدف الشباب
مدينتي مئلا مدخل المدينه عباره عن نافوره ضخمه بسنسور تشتغل لما اي عربيه تعدي جنبها
نوع عالي جدا من الرفاهيه ...فيه ناس عاورزه كده
وفيه ناس بتشوف ان بالفلوس بتاعت النافورة مثلا يتعمل مشروع اسكان عادي

وانا لما قلت اني مش شغاله في الشركه علشان الناس ما تطلبش مني تفاصيل للمشروع واسعاره لاني معرفهاش
مش لاني شايفه انه عيب بالعكس ياريت
..............
اما شركتي حاليا لاتعمل في مجال الاستثمار العقاري
توجهت للمشاريع من امثله الفنادق والمولات
........
والمعلومات اللي بقولها بس بوضح للزملاء ليه الفرق المتابين في اسعار الكومباوند والاراضي العاديه
علشان اي حد بيشتري ....يبقي عارف ايه الفرق
واذا كانت الامور دي تفرق معاه ولا لا........
لاني اول لما اشتغلت كنت بستغرب فرق الاسعار لو الشركه بتبيع عماره عاديه ليها بيبقي سعر المتر زي السوق
ولما تيجي تبيع فيلات داخل الكومباوند تيقي ارقام بالملايين......
وبالنسبه لانها اسعار عاليه اوي .....مش حتصدق انها بعد قسمه نصيب الفرد من الخدمات الرقم بيطلع كبير فعلا
بلاضافه انها اصلا مشروع استثماري يعني هامش الربح كبير

مع اني من الناس المقتنعه ان مدينتي من المدن المبالغ في اسعارها بس لو اي حد قعد يومين في الرحاب هيعرف ليه مدينتي غاليه اوي كدا

مما لاشك فيه ان اسعار السكن فى مدينتى كبير شوية
لكن اللى بيسكن فى شقة فى مدينتى اكيد عارف مستوى الخدمات اللى فى الكومباوند هاتبقى ايه يعنى هو مش بيشترى اربع حيطان وخلاص
نيجى بقى لحكاية تكلفة المتر اللى مش ممكن تزيد عن 900 جنيه دى ويبقى فيها وقفة
اولا سعر المتر مش بس خرسانة وطوب لانه بيبقى فيه حفر وردم وعمالة وسباكة وكهربا
ثانيا صحيح انت بتستلم الشقة نصف تشطيب لكن العمارة متشطبة رخام وبها اسانسير وبوابات وسور وحديقة
ثالثا عمر مافيه مالك بيبيع بالمتر الصافى لانه كدة هايخسر مش هايكسب يعنى لازم مشترى الشقة يتحمل نصيبه من الخدمات والتى هى عبارة عن سلم ومدخل ومناور
رابعا موضوع هو خد متر الارض بكام دى مش مهمة قوى لانه بيخلق جو جديد فى المنطقة اللى بيروحها
يعنى منطقة القاهرة الجديدة كلها قبل الرحاب كانت حاجة وبعدها حاجة تانية
الشروق بقالها زمن لا يراها اى انسان بالرغم من حجم الاستثمارات اللى اترمت فيها ولم ينظر لها الناس الا عندما بدا العمل فى مدينتى
بمعنى ادق لو خد الارض ببلاش فالدولة برده مستفيدة منه لانه بينمى الاستثمار العقارى بشكل رائع
وتقبلو مرورى ولو انى عارفة انى هاطلع فى الاخر عميلة وباشتغل عند هشام طلعت مصطفى

هههه داحنا عملنا دراسة جدوى كمان اهو

يبقى كده لازم نشترى لادا لانها 1500 سي سي ويبقى الحرامية اللى بيبعولنا اى عربية تانية 1500 او اقل وب3 اضعاف سعر اللادا


على فكرة بحسباتك دى انا مستعد اجبلك شقة المتر ب 800 جنيه (اظن سعر لقطة) وفيها نفس الخرسانة والاسمنت والحديد اللى فى مدينتى واقرب كمان يعنى مش متكلف تكلفة نقل..فايه رايك تحب تروح تسكن هناك؟ هو فى شوية معلومات بسيطة بس..اولا انها فى حارة وتفتح الشباك (اذا كان فى شباك اصلا) تلاقى حمام جارك فى وشك...وحكاية المرافق دى مش مضمونة اصلا وطبعا انسى لا فى جراج ولا اختراع اسمه نادى ولا جناين ولا اى حاجة باكتير او ى لو فى بلكونة ممكن تجبلك قصرية زرع وتحطها جواها

بس مش مهم ...المهم الاسمنت والخرسانة

على فكرة لو رحت الرحاب ولا اى كومباوند حتفهم انت بتدفع ايه..ومش وجاهة ولا منظر ...حاجة اسمها (لايف ستايل) اسلوب حياة

طيب نرجع للحسابات حضرتك قلت انها ب520 الف على 10 سنين!!! طيب ازاى احسب حاجة بالقسط على 10 سنين زى الكاش؟

يعنى هل الالف جنيه اللى حتدفعها دلوقتى هى الالف جنيه اللى كنت بتدفعها سنة 99؟ اكيد لا

يبقى طبيعى مينفعش احسب ال520 الف جنيه باسعار دلوقتى ودى ليها طريقة حسابية بسيطة لكن من غير فذلكة منى حقول انها بتعتمد على فايدة البنك يعنى لو حسبت الفايدة 10% فى السنة يبقى خلال العشر سنين لو شقة كاش ب 200 الف تبقى بالتقسيط حتبقى ب400 الف؟ مش قادر!!! ادفع كاش...طيب ولو على عشرين سنة حيبقى سعرها 600 الف على الاقل (طبعا الارقام اعلى من كده بكتير)

اذن الشقة اللى ب520 الف هى سعر الحالى يساوى 260 الف فقط (اقل كمان)

اذن سعر المتر حوالى 3 الاف جنيه

واظن كده يبقى رينج طبيعى جدا لمنطقة وخدمات (مليش دعوة بالخرساننننننة)

مش عارف ازاى حسبت ان المقاول بياخد الفلوس يحطها فى البنك ويستفيد من العائد بتاعها (اومال الشقق بتتبنى ازاى؟)

وفى النهاية طبعا كل واحد ينام على الجنب اللى يريحه زى مفى ناس بتدفع نص مليون فى عربية وفى الاخر حتادى نفس المهمة اللى بتاديها عربية ب50 الف

وطبعا الجملة التقليدية اللى لازم كل واحد معارض يقولها (والله ميشتغل فى مدينتى ولا ساكن فيها ولا فى الرحاب بس نفسي اسيب مدينة نصر واروح اى حتة فيهم ولو فى نص شقتى ومش علشان المنظرة علشان الحياة)

المشاركة الأصلية كتبت بواسطة dolly13

رابعا موضوع هو خد متر الارض بكام دى مش مهمة قوى لانه بيخلق جو جديد فى المنطقة اللى بيروحها
يعنى منطقة القاهرة الجديدة كلها قبل الرحاب كانت حاجة وبعدها حاجة تانية
الشروق بقالها زمن لا يراها اى انسان بالرغم من حجم الاستثمارات اللى اترمت فيها ولم ينظر لها الناس الا عندما بدا العمل فى مدينتى
بمعنى ادق لو خد الارض ببلاش فالدولة برده مستفيدة منه لانه بينمى الاستثمار العقارى بشكل رائع
وتقبلو مرورى ولو انى عارفة انى هاطلع فى الاخر عميلة وباشتغل عند هشام طلعت مصطفى

اخيرا حد قدر يقول الراى ده...الناس كلها بتتكلم الارض خدها بكام؟ طيب لو مكنش خدها كان زمانها صحراء جرداء
حتقولى وزعها على الناس...حقولك كانت حتبقى حبة عشوئيات وتلاقى كل واحد واخدلك الارض وراكنها ولا بناها وخلاص ومش عارف يسوقها

لكن تبص على الرحاب دلوقتى تقول لو كنت قعدت وراها 100 سنة مكنتش حتوصل للكثافة دى



امضاء
عميل رقم 3 لطلعت مصطفى

وكمان من الحاجات المنتشرة انه بياخد الارض ببلاش مع ان الحكومة عملت حركة حلوة جدا ومع ذلك انتقدوها
يعنى اللى عمل الحركة دى استاذذذذذذذذ

قالوله مش حناخد فلوس تمن الارض حناخد بدالها شقق

وطبعا مع الارتفاع الرهيب فى اسعار الشقق عامة حيقدروا يحققوا عائد اعلى بكتير ملو كانوا باعوا الارض مقابل فلوس

تقريبا حيطلعلهم 7 مليار جنيه ده لو محتفظوش بيها شوية كمان