الموضوع: لادا نيفا 4x4 ....

لصاحب الموضوع تقبل مروري. عندي رأي و هو أن الادا نيفا سيارة ممتازة في فئتها السعرية يعني لو عايز دفع رباعي في حدود 65 ألف يبقى مفيش غيرها. لا يؤخذ عليها غير إن القوة الحصانية ضعيفة مقارنة بالسعة اللترية للمحرك. لو عايز عربية تستحمل مطبات و حفر و طرق المحروسة المكسرة يبقى إشتري و إنت مطمئن. لاكن لو عايزها للغرز و الرحلات في الصحرا وسفاري البشوات فدي مش بتاعت الكلام دا. لو معاك مليون و ميتين ألف إشتري لاند كروزر أو شيفروليه من اللي بيشربوا تلاتين لتر بنزين لكل ميت كيلو و كدة كدة مش حيفرق البنزين معاك لو عندك عربية زي دي. صحيح الفلوس تجمد القلب.

المشاركة الأصلية كتبت بواسطة mnmmnmmnmmnm

أنا إجابتى إن شاء الله إنها عربية مريحة و فيها كل الإمكانيات الأساسية (إنجكشن , باور , تكييف)

هذه الإجابة موضوعية بالنسبة لى لأنى إنسان و الحمد لله قنوع و برضى بالقليل

و هذه أيضا إجابة غير موضوعية بالنسبة للآخرين الذين يبحثون عن الرفاهية و الراحة القصوى

فمثلا عندى لازلت أحتاج إلى تركيب فوج لايت أمامى و خلفى و كاوتش على البابين الاماميين لزوم عزل الهواء عشان التكييف ما يهربش هذه الأشياء عندى لا تمثل عيوب أما بالنسبة لغيرى فيعتبرها أساسيات تؤثر فى قرار الشراء و هكذا.

فهى مسألة نسبية

فأنا مثلا أعيش فى ضاحية من ضواحى القاهرة و بالتالى أى سيارة بالنسبة لى تعتبر مرسيدس أما بالنسبة لشخص يعيش فى و سط البلد فالسيراتو أو الكورولا أو الجيتا فاتعتبر عربيات عادية و أقل مستوى يمكن للمرء أن يبدأ التفكير فيه.

هى وجهات نظر تعتمد على رؤية الإنسان للحياة و خبراته و تجاربة و قياسة فى تقييم ما يعرض علية من مواقف حياتية
إيه الكلام الجامد دوة

يعنى هى دى الدنيا , فروق و اختلافات و موازنة و لا يوجد قياس ثابت

الأمريكان عندهم كلمة ظريفة لما يسألوا على "قيمة" الشئ
What is the best value for the dollar when buying Something
و حرفيا تعنى "ما هى أعلى قيمة للدولار عند شراء شئ ما"
و معناها "أشترى إيه و يكون تمنه فيه" بحيث أحصل على أعلى قيمة ممكنة بأقل إنفاق ممكن.

و طبعا كل واحد و مستواه المادى

يا سيدى الفاضل أنا كان قصدى "ضهر سعادتك أخباره إيه مع المطبات و المدقات و الحفر و غدر الوزارة"؟ :) :)

و لو إن إجابتك كشفتلى عن حاجات جديدة :) أنا بالنسبالى ميهمنيش لا فوج لايت و لا ديفندر لكن بما إنك قلت فالتكييف بيهرب صحيح؟! يعنى أعالج العيب ده من الأول و لا حسب الحالة؟

و شكرا جزيلا ليك على مساعدتك ليا

المشاركة الأصلية كتبت بواسطة bambino

يا سيدى الفاضل أنا كان قصدى "ضهر سعادتك أخباره إيه مع المطبات و المدقات و الحفر و غدر الوزارة"؟ :) :)

و لو إن إجابتك كشفتلى عن حاجات جديدة :) أنا بالنسبالى ميهمنيش لا فوج لايت و لا ديفندر لكن بما إنك قلت فالتكييف بيهرب صحيح؟! يعنى أعالج العيب ده من الأول و لا حسب الحالة؟

و شكرا جزيلا ليك على مساعدتك ليا

الله أنا ضهرى كان واجعنى من قبل ما أجيبها و لما جبتها وزنى نزل و ضهرى اتظبط الحمد لله

أنا لما غيرت مية الريداتير الراجل ربط الأبزيم بتاع الخرطوم مايل فلما كانت المية بتغلى كانت بتسرب المهم إنى فكيت الأبزيم و عدلته و فى بتاع ساعة لأن المكان كان مزنوق بس إيه خسيتلى فيها بتاع 2 كيلو مرتاح

مرة لقيت مية التكيف بتنقط فا كنت فاكرها زيت , و رفعتها على الكوريك بتاعها شفتها و اطمنت إنها مية مش زيت و خسيت بتاع نص كيلو فى الحركة دية

أما لما فلتر الزيت سرب رفعتها على الكوريك و نزلت تحتيها و شيلت الإستبن اللى فى الكابوت و نطيت جوة الكابوت عشان أعرف مصدر الزيت لغاية ما إتأكدت إنه فلتر الزيت و خسيت برضه بتاع 2 كيلو.

و عموما كده كدة أى توكيل سيارات فى مصر حيخسسك لوحده 5 كليلو مرتاح من ساعة ما تفكر تشترى أى عربية لغاية ما تعمل بيها صيانة صيانة ال 5000 كيلو

أما بانسبة لموضوع الراحة
أنا أخدت بيها مطبين فى شارع التسعين اللى فى التجمع الخامس
واحد على 80 كم و دوة نطيت فووق و نزلت زي الباشا كل اللى قدرت أعملة إنى دست دبرياج و الحمد لله ربنا ستر
المرة التانية كنت ماشى فيه و مركز جدا فى لحظة , آه و الله لحظة , قلت أبص يمين أشوف عديت العنوان و لا لسه لقيت نفسى كأنى راكب جمل رجعت لورة و طلعت لفوق و اترزعت لتحت و إتزقيت لورا أنا صنفت الظاهرة دية على إنها مطب صناعى بشارع التسعين فى القاهرة الجديدة بإتجاها أى مركز صيانة سيارات فى مصر لأى نوع سيارة.
المهم أنا لغاية دلوقتى ماشفتش المطب لا قبل ما آخده و لا و أنا فوقه و لا حتى شفته فى المراية و الكلام دوة الساعة 12 الظهر فى الحالتين.

أنا الكراسى عندى شبة السبورت شوية يعنى الكرسى عريض أكبر من عرض الواحد 10سم يمين و شمال و مسند الراس حتة واحدة مع مسند الظهر فنسبيا مريح.

عموما موضوع الظهر دوة مسألة كراسى و مساعدين مش أكتر ملوش علاقة بالسيارة يعنى أنا ركبت عربية لانوس مرة كان كراسيها كأنى قاعد على الرصيف بالظبط , متنجدة و جديدة بس إيه حطب.

و فى المدقات ماشية كويس الحمد لله بس طبعا اعمل حسابك إنها عالية فالمزع فى المطبات و المدقات حايحدفك جامد أكتر من الملاكى يعنى كأنك راكب لورى.

بجد مش عارف أشكرك إزاى... و أجمل حاجة أسلوبك الساخر و القنوع فى الرد. ربنا يجزيك كل خير :)

أنا سعيد جدا بصداقتك و أوعدك إنى لما ربنا يأذن أكتبلك تقارير مفصلة و بالصور عن الحبوبة الغالية :) :) :) كنوع بسيط من رد الجميل و برضه للفايدة العامة

كل سنة و انت طيب و ربنا يعيد عليك كل عيد و "نيفتك" و انت معاها بأحسن و أطيب حال و يباركلك فيها و يكفيك شرها

الراحه مش راحه كراسي

المقصود هنا الراحه وآلام الضهر مع عفشة النيفا الناشفة


يا جماعه النيفا دي لما الروس عملوها ماعملوهاش لا للمدن و لا للصحراء و اي عربية نيفا بتمشي كويس في الصحرا بتبقى متعدلة من اول الكاوتش العريض و انت طالع عفشات و مواتير

النيفا عملتها روسيا للمزارعين الروس في الريف (الفلاحين) يعني معمولة للمدقات و الطريق الغير ممهدة بين الحقول و المزارع

بالمناسبة نيفا بالروسي يعني حقل