الموضوع: اخطر مشكلة فى السيراتو - الجزء الثانى

طبعا فى كتير تابع المشكلة اللى حصلت معايا واتكلمت فيها فى كل التفاصيل
http://www.nilemotors.net/Nile/152992-a.html



مش عارف ابدا منين ولا اتكلم ازاى لاول مرة اكتب موضوع من غير ما يكون فى تحضير

بس اللى يهمنى دلوقتى انى اعرض مشكلتى علشان الكل يستفيد .

طبعا موضوعى للاسف بقى من ضمن الاسباب اللى بقت تخلى الناس تهاجم السيراتو وكل ما كنت افتح موضوع بعيد عن القسم الاقى الناس بتتكلم عن العيب اللى فى السيراتو

وبقى الموضوع بيضرب بيه المثل فى عيوب العربية زى موضوع حادثة المهندس غازى

والمشكلة اللى بيقرا الموضوع بيشوف فيه اللى هو عاوزه بس وخصوصا اللى مستنيين الغلطة
فى العربية ومش بيشوف الباقى وليا كلام تانى بخصوص الموضوع ده .

بعد تقريبا 10 ايام اكتشفت ان المشكلة لسه موجوده بس المرة دى بتختفى بمجرد ما العربية تهدى

رحت المطار من الهرم حوالى 40 ك بركن العربية لقيت العربية راحت رجه جامد وهنا قلبى وقع
لان الموضوع ده معناه حاجه واحده ان العربية بقت على الغيار التالت وهى واقفه نفس المشكلة تانى
بجد اترعبت ومكنتش مصدق من الصدمة . كان معايا ناس كنت رايح اجيبهم من المطار ( اختى )
سبت العربية ورجعت ادور الاقى ولا كان شى حصل بتجيب الغيارات كلها

فى ايه ؟؟؟؟

سؤال بساله لنفسى طول الطريق ايه اللى حصل معنى كده ان المشكلة من الاصل متحلتش طب ازى
وهى بتجيب معايا باقى الغيارات معنى كده انها اتحلت
قررت اروح مركز تكنو وان ورحت فعلا وقلت بالمرة علشان اعمل شهادة الضمان على العربية
طبعا كلمت كريم منير زى الاتفاق علشان اعمل شهادة ضمان قلى روح وكلم هو احمد الشحات
وفعلا رحت للمهندس احمد قلى هنعمل كشف على العربية علشان نقدر ندخلها الضمان
فى هناك مهندش تانى مختص بالموضوع ده كشف على العربية بالجهاز والمفاجاة

العيب مازال موجود على الجهاز !!!!! ؟

طب ازاى والعربية ماشية عادى بتجيب كل الغيارات ده كان سؤالى والرد كان

المهندس احمد / انا قلتلك لاازم نغير الكنترول ومش هنقدر نعملك شهادة ضمان طول ما العربية
ما الجهاز مطلع عيب قلتله معنى كده ان العربية من الاصل لسه فيها المشكلة قلى ايوة
طب ازاى والعربية بتجيب باقى الغيارات ؟؟؟ قلى انا كشفت على العربية ووقتها قلتلك جربها وانت قلت بقت تمام .

من الاخر مقدرش يقولى تفسير لانه ببساطة معندوش تفسير تانى غير ان الكنترول لاازم يتغير .

الجهاز مسجل ان فى عطل فى الكنترول يونت الخاص بالفتيس والمهندس مسح العطل من على الجهاز
وقلى جرب .
طيب والضمان ينفع اشتريه قلى لا خلاص كده مينفعش اعمل ضمان لعربية كان فيها عيب
( العربية ا تعلم عليها )

قلتله حتى لو العيب اتصلح قلى حتى لو اتصلح .

مشيت وانا مش فاهم فى ايه كان معايا الاولاد وامهم فى العربية طبعا والحزن والغم هو الانطباع اللى موجود فى العربية بتكلم مع زوجتى فى المشكلة راحت قالت ماتشوف الكتيب بتاع العربية يمكن تفهم منه حاجه . قلتلها لما نبقى نروح

تخيلو معايا ليلى بنتى مسكت الكتيب وبقت تقلب فيه وتقولى بابا ان شاء الله هتلاقى العيب اللى فى العربية موجود هنا انا شفته اهو .
ضحكت يا ليلى انتى فاهمة حاجه ؟؟ فالت لا بس مش عاوزه اشوفك زعلان .

استنونى لسه الموضوع فى مفاجات كتييييييييييييييير .