الموضوع: تجريتى مع كيا وشركة التأمين

صباح الخير أنا عضوه جديده فى المنتدى من حيث المشاركه فقط ولكنى عضوه قديمه من حيث المتابعه ..حبيت أحكى لكم عن موقف حصل معايا فى مركز صيانة كيا بابو رواش ولكن مع شركة مصر للتامين أنا عربيتى نيو سيراتو عامله 3000 كيلو متر فقط المهم أنى فى يوم باخرج من ركنة فى وسط البلد الإكصدام الأمامى شبك فى الحديده اللى فى الأرض وإتخلع ولاد الحلال ركبوه لى ولما تبص على العربيه من الإمام تقول ماحصلش ضرر لكن فعلياً الإكصدام إتكسر من تحت الجزء الأسود المعشق مع الكارتيرا المهم رحت التوكيل قابلنى المهندس سلطان صلاح وهو مهندس محترم جداً جداً وسالنى إن كنت مأمنه فأجبت بالإيجاب فقال لى بس ياريت تيجى بكره لأن مندوب التأمين بييجى الأحد والثلاثاء والخميس فقلت له ما أقدرشى ضرورى أخلص النهارده وأنا على إستعداد أدفع التكلقه كامله بس أمشى النهارده المهم أن المعاينه أثبتت إن الإكصدام لازم يتغير وكده كده لازم حاجى يوم تانى علشان يكون إترش فايتركب على طول المهم برضه قاللى أنتظر وهو حايحاول يجيب مندوب معاينة الشركه النهارده والشهاده لله نجح فى كده وله جزيل الشكر فعلاً لأنه ذلل لى الكثير من العقبات وحاول تذليل الباقى ولكن فى حدوده ..المهم جاء مندوب الشركه وعاين وطلعت المقايسه 3000 جنيه وقال لى المندوب إنى المفروض أدفع 10% من التكلفه وبصراحه وافقت وجيت يوم الخميس على التركيب بس بصراحه كنت قريت الوثيقه فى البيت ولقيت مافيش بند يلزمنى باى مدفوعات حتى مبلغ 10000 جنيه بل فى حال لو كانت التلفيات فى الحدود دى يتم التصليح فى كيا بعد المعاينه فقط وعلى حساب الشركه وبدون محضر شرطه وشرط الدفع الوحيد هو 25% على الإيرباجز فقط المهم بعد التركيب رجعت للمهندس سلطان صلاح قرأ الوثيقه فلم يجد هذا الشرط فأتصل بشخص إسمه الأستاذ محمد رياض من شركة التأمين علشان يقوله البند فين قال كلام كتيييييييييير ولم يقل أين البند نصحنى المهندس سلطان إنى أطلع الدور الثانى للأستاذ عبده وهو المتعاقد مع شركة التأمين ممثلاً عن كيا والشهاده لله الراجل كان مستفز ومتشنج ومصر إن هذا متعارف عليه وإن لم ينص عليه العقد وده قرار هيئة الرقابه على التأمين وكل الكلام اللى ما كالش معايا بقرش صاغ المهم أنا تشددت أمامه وقلت مش حادفع قام طلب منى نعمل ميتنج مع مسئولى الشركه وهم يقنعونى "ودى شغلتهم على حد قوله" بس على أن أترك العربيه فى مركز الصيانه وارجع للميتنج يوم الأحد رفضت طبعاً وقلت له ركب لى الإكصدام بتاعى ولما أبقى أجى لك يوم الأحد يحلها الحلال وطبعاً أنا كنت حاسيبه وأطلع على هيئة الرقابه على التأمين فى طلعت حرب وأعيش معاهم بقى بس هو قاللى خلاص إنزلى للمهندس خالد فاروق يركب لك الإكصدام القديم وفعلا نزلت لسيادته ...قابلنى بوجه طلق بشوش بمجرد ما تراه تهدأ مهما كانت مشكلتك وبمجرد ما شرحت له الموقف مع تأكيدى إن تعاملى كان مع كيا وثقة منى فى كيا وليس مصر للتأمين طلب ملف عربيتى فأكدت له إن المشكله مش فى الـ300 جنيه لكن فى المبدأ لأنى أدفع 3000 جنيه بمزاجى لكن ما أدفعش 300 جنيه غصب والشهاده لله تفهم وجهة نظرى بعد تأكيد المهندس سلطان إنى كنت حادفع كامل القيمه مقابل إنى ما أتعطلش ..المهم إتصل سيادته بشركة التأمين وأكد لهم عدم وجود الشرط قالهم أنا عارف إنه متعارف عليه وإن ما حدش إعترض قبل كده لكن ده حقها وغلطتكم فى العقد تتحملوها إنتم وهى متمسكه بالعقد وخرج من الغرفه فلم أسمع باقى المكالمه ولكن عاد سيادته ومعه تصريح خروج عربيتى بدون قرش واحد ...أنا كتبت يمكن يستفيد من تجريتى أحد ...نصيحتى إتمسك بحقك و ضرورة قراءة عقد التأمين جيدا مش لمجرد صدمتك من شكل عربيتك والمبلغ المحدود اللى حاتدفعه تقوم تفرح وتدفع وتقول بركه اللى جت على قد كده لأ دور على حقك إنت دافع 4000 جنيه مقدم تأمين... كما إنى كتبت لشكر الرجل العظيم الذى مهما شكرته لن أوفيه حقه المهندس خالد فاروق صدقونى إبتسامته وذوقه بس كفيلين إنه لو كان طلب منى أدفع كنت حأدفع لكن فعلا برضه إللى بهرنى بيه إنه حقانى فى زمن صعب فبه إن حد ينصفك هذا غير تفهمه موقفى وإنه تمسك بالحق بصرف النظر عن القيمه ...أشكره جزيل الشكر على مجهوده معى وعلى ذوقه وبشاشته التى هونت على الكثير ...