الى خبراء 504 أرجو النصيحة أيهم أفضل أنا مش أشترى أية لكن ريسيت فى النهاية على الاختيار ما بين اللادا 2107 الروسى الجديدة و بيجو 504 ومحتار أنا بصراحة معجب أوى ب 504 لكن خايف منها لانها طبعا مستعملة فأرجو يا خبراء المنتدى المساعدة فى الاختيار
عرض للطباعة
الى خبراء 504 أرجو النصيحة أيهم أفضل أنا مش أشترى أية لكن ريسيت فى النهاية على الاختيار ما بين اللادا 2107 الروسى الجديدة و بيجو 504 ومحتار أنا بصراحة معجب أوى ب 504 لكن خايف منها لانها طبعا مستعملة فأرجو يا خبراء المنتدى المساعدة فى الاختيار
ال 504 قطع غيارها بقي اغلي من البي ام .. لو تقدر عليها اشتريها .. انا شخصياً انصح بال لادا.. لكن الادري بحالك هوه انت .. العوامل كتيره هيا اللي بتحدد مناسبه العربيه دي من عدمه ..
انت تقصد 504 اللي انتاج اوائل ثمانينات القرن الماضي ولا 405 تفرق كتير
الاولي عربيه خدمه شاقه ومش منظر خالص يعني اعتبرها نص نقل من الاخر وموديلها قدم
انا شحصيا ركبت واحده منها موديل 79 عربيه كلها مشاكل عمره موتور وكربراتير ودينامو ومارش وكونتاكت وضفيره ومارش وديتامو وسيرفو وماساتر
ولما اتضبطت بعتها واللي اخدها ركب لها موتور تويوتا جاز لانها كانت استشن
الادا كويسه والشكل الجديد حلو اخيرا الروس غيروا شكلها بس يعيبها ان صوتها عالي والكرونه خشنه شويه
بس الجديد جديد
لو 405 ده افضل شرط الحاله
انا معايا ال 504 وحالتها أحسن من الجديد وقطع غيارها متوفة ورخيصة وكمان بتبقى جديدة مش غالية ولا حاجة أنا لسه مغيرلها كاربراتير جديد 250 جنيه
انا معايا ال 504 وحالتها أحسن من الجديد وقطع غيارها متوفة ورخيصة وكمان بتبقى جديدة مش غالية ولا حاجة أنا لسه مغيرلها كاربراتير جديد 250 جنيه
وثابته على الطريق وحنينه
أنا معايا ال 504 أحسن العربيات وقطع غيارها متوفرة ورخيصة وحنينة فى المطبات عكس 2107 نشفة أوىىىىىىىى
أنا بشتغل فى شركه مقاولات بتحب تجيب اللادا عشان رخيصه
ومن تجربه هذه السيارات نجد إن السياره اللادا الجديده مشاكلها كتير وعربيه غير مريحه بالمره
ولما بقارن اللادااللى على الزيرو بال 305 اللى معايا ألاقى إن ال 305 لا تقارن بها أبدا ويبقى ظلمناها لما ندخلها مقارنه مع اللادا اللى على الزيرو
أما ال 504 فهى أحلى مليون مره وأقوى من ال ال 305 من غير شك - ونظلم ال 504 لو دخلناها فى مقارنه مع ال 305
فما بالك باللى يدخل ال 504 فى مقارنه مع اللادا- حرااااام
عموما أنا لو ماعنديش عربيه النهارده وبافكر أجيب عربيه مستعمله موش هاجيب 305 أو 504
لكن على طول هاختار ال 405 وهى دى اللى أنصح بيها
وربنا يوفقك
السلام عليكم
يا جماعة بعد اذنكو بلاش التضارب فى الكلام , بمعنى ان واحد يرد ويقول
البيجو 504 زبالة وماتتركبش وقطع غيارها مولعة ......
والتانى يرد ويقول
البيجو 504 عربية كويسة جدا ورائعة وتحفة وقطع غيارها رخيصة ...
انا وغيرى من عديمى الخبرة بنحتار وش بنبقى عارفين نثق فى مين
برجاء من كل الاعضاء الكرام اللى رايهم معارض لرأى عضو سابق لهم ان يوضحو وجة نظرهم بكل الاساليب
وكذلك يردو رد مقنع لاى حد يقرا
قول يا رب واشترى الادا متوجعش قلبك فى المستعمل مع ان المستعمل مش كلة وحش وبيبقى حظوظ ولو محتاج اى استفسار تانى تحت امرك
يا جماعة
انتو ببتكلموا على 504 ان سعر قطع الغيار غالية جدا
لية بس السمعة الوحشة دى
حتى و لو كانت غالية اشتر قطعة غالية و تقعد 6 اشهر ولا اشترى رخيص من بتاع الناس الطلاينة و اغيرها كل شهر
انا كان عندى 128 و دلواتى راكب 504 فى فرق كبير اوى فى قطع الغيار و العمر الافتراضى بتاع القطعة لازم ناخد ده فى الاعتبار اما نيجى نقيم عربية
يا برنس ما تتلخبتش
دى اراء و وجهات نظر ربنا قسم الارزاق محدش عجبة رزقة و قسم العقول كل واحد عجبة عقلة الى بيقول ان البيجو 504 زبالة هوا صح من وجهة نظرة بس غلط من و جهة نظرى
هقولك لية لو نتكلم بشك واقعى ال504 كانت بكام من اول 35 الف حتى 45 الف جنية الكلام دة من 6 اشهر فقط
بسبب السمعة و قانون المرور و الاحلال و التجديد بتاع التاكس و كمان شوية حركات من التجار بقى سعرها من 18 الف حتى 25 الف جنية
يبقى دلوقتى ممكن اشتر ب 22 الى كان بيتباع ب 40 صح و العربية هى العربية
تانى حاجة الشكل و الاداء
فى عربيات كتيرة اجمل فى الشكل من ال504 بس هل اداءها زى 504 و بنفس السعر 22 الف جنية دة اللى نتكلم فية
يا مؤمن الفرنساوى ولا الكورى او الايطالى
الوديلات الجديدة حلوة بس بكام انا اتخيرت ما بين ادفع فلوسى كلها فى لانسر كرستالة فبريكة بشكل غريب ولا احط جزء من فلوسى فى 504 و اعمل حاجة تانية بباقى الفلوس و على فكرة المشوار الى بيتراح بلانسر بيتراح بالبيجو بردة مش بيبقى اقصر يعنى
و على فكرة يا كبير ال504 الوحيدة اللى ليها مكانيكية مابيشتغالوش الى حاجة تانية غير بيجو 504 حتى لو رحتلهم ب 505 بيقولولك معلش يا بية مبشتغلش غير 504 و لو عايز اسمائهم و عنوينهم عندى
أقولك تثق فى مين أركب ال 2107 وجربها وال 504 وجربها وأسأل بنفسك على قطع غيار كل واحده منهم وكده تبقى أنت بنفسك عرفت الأحسن ومحدش يزعل ولا أيه ؟؟
انا املك 504
عربية متينة... ممتازة... تدخل فى الحيط. و لو حصل فيها اى شىء ممكن بردك تتصلح و تتشد و ترجع جديدة
و لكن....
انا لا انصح بشراء العربية دى حاليا.
اولا: خطوط الانتاج اللى بتنتج قطع الغيار الاصلية توقفت ( يعنى معظم قطع الغيار مش اصلية ولا حتى اوروبى)
و الحل انك تروح تجيب قطعة غيار مستعملة استيراد ( الملنى او فرنساوى) و دى كمان اصبحت قليلة
معنى هذا باختصار ان قطع الغيار الكويسة غالية جدا على قيمتها الحقيقية ( دا اصلا لو لقيت قطعة الغيار النضيفة)
ثانيا: العربية دى غووووول فى استهلاك البنزين ( خراب بيوت) لو عملت معاك 180 كيلو فى الصفيحة يبقى كويس
و عشان تعرف تروح و تيحى بيها مشاوير يبقى لازم تستعمل بنزين 80 ( عشان تقدر على تمنه مع استهلاك العربية الرهيب)
ثالثا: لانها عربية قديمة جدا فلما تشتريها لازم تشدها و تراجعها و تزبطها من اول و جديد. و من المتوقع انك تغيرلها شوية حاجات. ولكن تبقى مشكلة ان العربية قديمة و ممكن تبيعك فى اى وقت و تعطل
و اخيرا العربية دى بتحرى جامد .... وحش على الطريق لكن بتصبح عالية و خفيفة و انسى الثبات على الطريق ( زلطة ممكن تقلبها). كمان الثقل بتاعها مش متوزع كويس و ده بيخليها تتزحلق و ت7طمس بسهولة مخيفة مع اى حبت زلط او رمل ( صدقنى انا كنت هاموت من شهر على الدائرى فالحركة دى)
يمكن ركوب اللادا مش زى البيجو بس اللادا مطلوبة و قطع غيارها مرمية و برخص التراب و اكيد اوفر فى البنزين. دا غير انك لو اشتريتها هاتعرف تبيعها لكن البيجو لما تيجى تبيعها هاتبقى تجربة مؤلمة اوى
و فى النهاية اقول انى غيرت فى سنتين:
طبلة الباب
رفرف
كل الفلاتر اللى تتخيلها بتتغير مع الزيت ( و بغير بوجيهات و ابلاتين و كندنسر كل مرتين)
سوست الشنطة
طارة دركسيون اصلية مستعملة ( ملقيتش غير واحدة بس نضيفة فى عزبة شلبى و اخدتها ب 220 ج بعد الفصال)
اليد بتاعة الفتيس السوداء المكورة دى ( الاصلية ب 30)
عوامة البنزين (ب25 و العيب رجع تانى لان العوامة الاصلية لم تعد تباع فى مصر)
كربراتير سوليكس اصلى جديدج(2000 جنيه)
دينامو 90 امبير الماتى استيراد (180 جنيه)
مارش المانى استيراد (170 جنيه)
شكمان كامل (3 علب من الفرن لغاية الاخر اتكلف 350 ج)
3 مساعدين مستعمل
نصف عمرة موتور
طقم جلب و صبابات و شمبر
بلية و دسك و اسطوانة الدبريج
طقم ماستر الدبرياج
مشغل لمبة الفرامل
البوبينة
ولاعة ( والكتاوت و الفيوزات و كل السلوك بتاعة الفوانيس)
مفتاح النور
مفتاح الانتظار (اتغير مرتين)
جميع الفوانيس
جنط ( الجديد ب 250 و الاستيراد ب 130)
و كل ده فى اقل من سنتين ( اما الحادثة اللى حصلت لى على الدائرى من شهر فديه عايزة لستة تانية اقول لكم عليها لما العربية تخلص من التصليح
و قصدى من كل الكلام ده انى لما باقول ان العربية دى بتصرف الناس تعرف انى عارف انا باقول ايه
بص يا سيدى انا جربت الاتنين و لمدد طويلة اكثر من 10 سنوات كل واحدة واقولك نصيحة لوجة الله وانت حر - اذا لقيت 504 حالتها نظيفة جدا وده نادر جدا جدا فاشتريها فورا وقطع غيارها مازالت مناسبة
اما اذا لم تلاقى نظيف منها فلا تفكر ابدا فى شراؤها -اللادا عربيية خشنة وغير ممتعة فى السواقة بالمرة ولا تنفع الا تاكسى وربنا يوفقك
الراجل ده كلامه صح. و احب اضيف ان حتى لو العربية الجيدة موجودة فهى محتاجة مصنع قطع غيار جيد يعمل قطعة الغيار بمستوى جيد و سعر مناسب ( و للاسف لم يعد هذا موجودا)
صدقنى احيانا ببقى نفسى الاقى قطعة الغيار الاصلى ( عشان تبقى كويسه) و مش مهم بكام. لكن فى حجات لم يعد موجود منها قطع الغيار الاصلية و تروح تجيب المضروب برخص التراب... و يا يكون جودته اى كلام... يا يبوظ
معلش اعذروني
الاخ MollaElolla
معلش عن تجربة شخصية مع الـ 504 شكلك كده يقولك راكب اي حاجة تانية غير ال504
ايه يا عم اللي انت قاعد توصف فيه ده
وايه كل قطع الغيار اللي انت بتغيرها دي .. دي اكتر ميزة في ال504 انك بتحط قطع الغيار وتنساها.. ده انت يابني لو راكب تاكسي وبتلف بيه ال 24 ساعة مش هتعمل فيها كده
انت حالتك دي تقول انك يا إما واخد عريبة متبهدلة وبتجمعها من الاول تاني وده الارجح فعلا انك واخد العربية دي من ورا واحد مالوش فيها
يا إما انت معلش في الكلمة تعاملك مش نضيف مع العربيات وعايز دبابة تسوقها
لازم تعرف ان اي عربية حتى لو كانت مدرعة استعمالك الوحش لها هو اللي هيجيب اجلها
ولو عندك عربية ورق وبتحافظ عليها هتعيش معاك طول العمر يعني استعمال الشخص عليه عامل كبير في العربية
وبعدين مش معنى انك بتعمل عمرة وبتشد العربية كلها تفضل ترصلنا كل الحاجات اللي عملتها وترجع تقول ال504 وحشة
بسم الله الرحمن الرحيم
انا من اشد المعجبين بالـ بيجو 504
ولكن النصيب
اشتريت تويوتا كورولا
انا راى كالتالى:
اولا: حجم المشاوير المطلوبة
لو كنت هاتمشى بيها مشاوير "طحن" ... وفيه سفر كثيير ... يبقى الافضل البيجو ... سواء كانت 504 او 405 او 505
ثانيا: حجم الناس اللى هاتركبها
لو كنت هاتخرج بالاسرة الكريمة .. ومعلهش فى اوزان كبيرة ... طبعا البيجو هاتتفوق ... ولكن اللادا ايضا هاتسد معاك لانها مرتفعة على الارض ... لكن البيجو ممتازة وعمرها ما تشيل ركاب وتحك فى اى مطب
اسألنى انا عن التويوتا ... "بضرب سلام لاى مطب" وانا بعدى عليه ... ورغم ذلك العربية تحك فى المطب
ثالثا: القدرة على التحمل
طبعا البيجو "حمالة آسية" ... قطار سكة حديد ... ما شاء الله ولا حول ولا قوة إلا بالله .... واللادا ايضا قوية جدا ... واللى له نصيب فى اى خبطة من اللادا "مالوش دية" ... الاثنين جامدين
رابعا: استهلاك البنزين
لو كنت هاتمشى بيها كثيير ... يبقى اعمل حسابك على ان استهلاك البيجو الـ 504 هايكون كبيير معاك ... خصوصا انها 2000 سي سي ... اما اللادا يوجد منها ابتداء من 1300 سي سي وده اوفر لك فى استهلاك البنزين ... لكن الاثنين من الممكن استخدام بنزين 80 معاهم وده شىء كويس جدا
خامسا: قطع الغيار
هنا تتفوق اللادا على البيجو ... اللادا ما زالت تنتج ... وقطع غيارها موجودة زى التراب ... ورخيصة ... لكن موش معمرة قوى ... لكن شغالة ... اهم حاجة موجودة ... اما البيجو قطع غيارها معمرة وقليلة شوية واغلى من اللادا .... استهلاك قطع الغيار فى اللادا اكثر من البيجو
سادسا: وده اهم حاجة وهو الخلاصة
الميزانية فى البيت
لو كانت ميزانيتك معقولة وعندك اطفال ونفسك فى عربية
لو كان مشيك بالعربية قليل ... يبقى العربيتين كويسين ... لكن الافضل البيحو .... هاتسافر بيها زى الفل ... هاتشيل ناس موش هاتشتكى ... واسعة ... وكل حاجة فيها جميلة الشرط الوحيد انك تشتريها حالتها كويسة وسعرها فى الحالة دى موش هايقل عن 30 الف جنيه ...
وهاتلاقى ناس تقول لك ... اللى يخليك تدفع 30 الف جنيه فى عربية بيجو .. زود شوية وهات لك هيونداى اكسيل ... شكل شيك وقطع غيار موجودة وحديثة ... لكن طبعا موش نفس القوة والاحتمال
اما لو اشتريت لادا وكان مشيك بيها معقول ... هاتكون معاك زى الفل ... وقطع غيارها زى التراب ... وحمالة اسية ايضا
الخلاصة: حالة العربية هى اللى بتحكم من الآخر
لو فيه امامك عربية بيجو حالتها كويسة ... اشتريها بدون تردد .... خصوصا انك بتحبها ونفسك فيها ... يعنى موش بعد شراء اللادا .. تزعل فى البيت وتفضل تفكر فى البيجو
لو مافيش امامك بيجو نظيفة
خلاص امامك عربيات كثيير قوى لادا ... اشترى اللى يعجبك وبأسعار تبدأ من 15 او 17 الف وانت طالع ده المعقول منها
ارجوا ان اكون وفقت
مع اطيب التمنيات
اخوكم حسين غزالة
لا مجال للمقارنة مع احترام اراء الاخريين
انا هلخص لحضرتك الموضوع فى كام كلمة انا والدى معاه واحدة 504 وجاب واحدة تانية لاخويا الكبير و إن شاء الله العربية الى هتيجى ليا هتكون بردوا 504 مش هقولك على ال504 غير حاجة واحد انها بجد عربية
اولا هذا الاسلوب فى الكلام غير مناسب
ثانيا "الرص" اللى مش عاجب حضرتك ده مش موجه لييك دا موجه للعضو اللى بيسال و انا باجاوبه بامانة
ثالثا انا لم اقل ان العربية " وحشة" انا قلت "وحش" و الجمع "وحوووووش"اعد قراءة المشاركة بتاعتى هتجد ان اول شىء قلته انها عربية متينة و تدخل فى الحييييط و افصل عربية ممكن تشدها
اما بالنسبة للاخ هيرو فمعاه حق ان لا يوجد مقارنة ده صحيح لكن احنا هنا يا اخ هيرى مش بنعمل مقارنة بين امكانيات العربية لكن الفكرة ان العضو بيسال اى المناسب فى مصر الان
ال504 وحش فعلا و انا بقالى 3 سنين معاه و على فكرة غيرت حجات تانية غير اللى قلت عليها دى و انا بسافر فى طرق مش حلوة و عربيتى لازم تعمل 1000 كيلو فى الشهر
لكن الفكرة يا جماعة ان العربية الجميلة جدا دى... اصبحت مكلفة...
الكربراتير الاصلى بتاعها ثمنه يعدى ال "3000 و مش موجود جديد
الموتور ثمنه 9000
طقم العدادات لم يعد موجود جديد و مرغم تشتريه مستعمل
العربية جميلة بس بتحتاج مصاريف و قطع الغيار النضييييييفة لم تعد متوفرة بسهولة
لعربية جميلة بس بتحتاج مصاريف و قطع الغيار النضييييييفة لم تعد متوفرة بسهولة
قطع الغيار النضيفة المعمرة الاوربية دى اصبحت قليلة و البحث عنها اصبح مرهق
لان خطوط الانتاج الاصلية اللى كانت بتعملها توقفت... الموجود اصبح صينى و تركى اما الفرنسى و الاوربى مش موجود منه اللا بعض حجات.... الواقع الات اصبح مختلف عن من 5 سنين فاتو
ايوا موتور استيراد يعمل من 8000 الى 9000
لدرجة ان احد الاخوة الاعضاء حاول يفكر يسقط موتور 405 لانه ب 3000 بس و الموضوع موجود انا مش باجيب حاجة من عندى
اما كربراتير ال 504 gl الاصلى مش الصينى او حاجة تانية فى منه نوعين
solex استهلاكه فى البنزين مش جامد و بسيط و بيتصلح ثمنه 2000 جديد و متواجد.
و فى الموديل الاكبر الاكثر تعقيدا zenith ده بقى بلااااعة بنزين و لو حاولت تعمله صيانة بيبوظ بسهولة لكن سحب العربية تحفة و ده لما سالت عليه جديد قالوا مش موجود و سعره يعدى 3000 و ممكن توصى حد يشتريهولك من الخارج
و الله إستفدت كتير من قراءة هذا الموضوع
جزاكم الله خيراً
lمع احترامي ليك , الكلام ده مش صح خالص و أنا بقوله من خلال خبرة و عشرة مع العربية من ساعة ما كان عندي 3 سنين لحد النهاردة يعني حوالي 32 سنة عشرة
قطع الغيار رخيصة و متوفرة جدا و أي صنايعي ممكن يشتغل في العربية بس الأحسن تروح لواحد كويس و تثبت عليه عشان يفهم العربية و يقدر يظبطها كويس
شوف الموضوع ده كمثال لأسعار الصاج بتاعها
http://www.nilemotors.net/Nile/140377-504.html
أنا أول مرة أسمع الأرقام دي في ال 504 هتخلوني أنزل أسأل كده عشان دي أرقام عالية قوي
ازاي الموتور ب 9000 جنيه و أنا ممكن أعمل عمرة كاملة و قطع غيار فرنساوي ب 2000 أو 2500 جنيه
الديسك و الاسطوانة و البلية الفرنساوي ب 300 جنيه و 50 جنيه تركيب
انتوا بتجيبوا السعار دي منين بس !!!!!!!!
مش معقول الكربراتير ب 2000 جنيه
طقم اصلاح الكربراتير ( 2 باب و أكس ) ب 70 جنيه
كربراتير استعمال بالضمان ب 250 جنيه
يبقى ازاي الجديد ب 2000 بس
انت متأكد الكلام ده عن بيجو 504 ؟
المواتير ب8000 و 9000 ده كلام صحيح
لو الحالة تمام جدا
ولو الحالة 60% مثلا ممكن يبقى ب 5000 و 6000 !!!
ويا سلام بقى لو جبت موتور الـ 505 الانجكشن وحبيت تسقطه هيبقى بـ 11000 وشوية ده غير الضفيرة والفتيس بتوعه
جزاكم الله خيرا جميعا على ما قدمتموة لنا من معلومات وخبرات ومقارنات بصدد البيجو 504 واللادا 2107 لآفادة جميع الآعضاء الكرام
وجزاكم الله خيرا , والله الموفق والمستعان
الأسعار دى من فين انا لسه سأل على كربراتير لعربيتى كان فى نوع 350 جنيه و الثانى حوالى 500ج بس فى شارع دمشق .:U_thin1[1]::U_thin1[1]::U_thin1[1]::U_thin1[1]::U_thin1[1]::U_thin1[1]:
رأى للأخ اللى بيسأل لو فى عربية 504 كويسة و أستعمالها كويس توكل على الله و مش هاتندم خالص و خاصة لو مشوايرك كتيرة و مسافات طويلة.
و لو انت عايز حاجة موديل اعلى شوية و بردة تستحمل ممكن 405 .
و لازم الاستخارة علشان تكون مطمئن.
طبعا انا عارف ان الموضوع قديم
و اكيد صاحب الموضوع يقولنا هو اشترى ايه - لكن اسمحولى اقول رأى انا كمان فى المقارنه بين علامتين بارزتين فى العربيات القديمه
انا معايا دلوقتى 504 و هى اصلا بتاعت الوالد عليه رحمة الله و هو كان جايبها زيرو 1983 (لما كان عندى سنه واحده ) و معتنى بيها جداا (ماعدا اخر سنتين قبل وفاته بدء يهمل فيها بس بحدود) و بالتالى انا بتكلم على عربيه 504 لما تبقى حالتها ممتازه
ال 504 زى ماقالو الاعضاء وحش على الطريق بس ثباتها مش قد كده على السرعات فوق ال 100-- صاجها ناشف جدا (حتى بالنسبه للعربيات القديمه - انا كان معايا كورولا 78 قبلها و كانت ورق بالنسبالها) - مريحه جداا و عفشتها تنافسيه زى العربيات الجديده خاصه لو حتمشى فى طرق مكسره و مدقات حتحس انك راكب 4*4 - دركسيونها خفيف جداا و مش محتاجه انك تركب فيها باور و زاويه انحراف الدركسيون لما تجيبه للاخر كبيره اوى (اكتر من عربيات كتير ركبتها)
عربيه حجمها كبير نسبيا (فى العرض بالذات) و بالتالى حتقرفك شويه لو بتدخل بيها حتت زحمه و فى الركنه عاوزالها مكان واسع
لكن خد بالك العربيه دى لو ملخبطه حتكرهه عيشتك و بتبقى قرفان على الاخر و انتا بتسوقها
قطع غيارها اغلى من اللادا طبعا لكن مش اغلى من اليبانى - انا ماغيرتش فيها حجات كتير فممكن مابقاش دقيق فى موضوع قطع الغيار ده
بس اللى اعرفه ان شرع العشرين فى عين شمس فيه كذا واحد بتاع بيجو استيراد
اكبر عيب فيها من وجة نظرى هو عدم ثباتها على السرعات العاليه و شكلها الغبى اللى بقى علامه مميزه ليها
اللادا انا سوقتها كتير - بالنسبه للصاج فصاجها مصفح و اتقل من البيجو كمان
لكن العربيه فعلا تقيله جداا و عفشتها بتبقى ناشفه اوى اعطالها كتير و قطع غيارها متوفره بس مش معمره
اقتصاديه فى البنزين
بالنسبه لثباتها على السرعات العاليه فمعرفشى لأنى عمرى ماجبت بيها 100 و ماسمعتش ان فيه حد جاب بيها 100 لأنها عربيه تقيله
لكن لو جابت ال 100 اعتقد حتبقى ثابته لأنها عربيه تقيله
لكن مش واسعه و لا مريحه زى البيجو و طبعا على المدقات و الطرق المكسره حتحس انك راكب علبة سلامون - و كل مطب بيتنقلك بكل امانه و بشفافيه
اقصى زاويه دوران ليها ديقه اوى (من اقل العربيات اللى ركبتها )
لو عاوز تجيب عربيه و تشغلها تكسى يبقى هات لادا - لكن لو عاوزها ليك و لاسرتك يبقى بيجو من غير تفكير
لو عاوز حاجه شكلها حلو يبقى بيجو 505 او 405 - لكن بصراحه اللادا مش مقتنع بيها لاسره نهائى
على فكره العربيتين لو عطلو و حبيت تزقهم حتطلع روحك و لازم اتنين على الاقل فى الزق
مع احترامى للادا ما ينفعش اصلا تتقارن بالبيجو
البيجو رمز للنعومة في كل شيء واللادا رمز للخشونة والقرف في السواقة ( مع احترامى الكامل لكل ملاكها ) بس ده حتى دارع الكلاكس فيها تقيل ، مش هقولك بقى دركسيون ودبرياج وفتيس
بجد اكتر عربية بكرهها
اسمحولي اشترك بصورة تانية في النقاش... كل الناس اجمعت على قوة و تحمل 504 و العيوب ندرة قطع غيارها... الاصلي موجود بس قليل و غالي شوية بس تحطه و تنساه....
الاول ابعاد العربية و الاتساع و الشنطة في صالح ال504 عن اللادا...
ارتفاع العربية برضه في مصلحة 504
الفرامل برضه 504 تكسب......
توافر و رخص قطع الغيار اللادا
قوة القطع الميكانيكية و الهيكلية 504 بدون منافسة اساسا.....انا لسه مظبط عفشة العربية كل حاجة فيها من غير مساعدين... التظبيط ده تاني مرة في عمر العربية و الي جاي بعد 11 سنة من المرة الاولى و الحمد لله لسه المساعدين تمام... مع ان عربيتي يوم ما تمشيش تعمل في حدود 50 كم في اليوم و هي ملاكي
العفشة اقوى بمراحل في 504 ولا بيضه تملص ولا مقص يتكسر غير الفيات واللادا
ده اذا اتكلمنا عالعربية استاندرد... لكن خد عندك بقى.... انا بحب الجري و التعديلات دي اتاكدت من انها ممكن تتعمل و ان شاء الله هعملها اول ما اجهز فلوسها...
الكاربراتير بتاع ال 131 ال2000 سي سي weber بيتعمله قاعدة عند الخراط... و يديك قوة و تسارع و استهلاك ممتاز.... تقريبا 200ك في الصفيحة
طقم الفرامل كامل( اجهزة الفرامل و السكاكين الامامية و الخلفية) بتاعت ميجان 2 2000 سي سي تركب بدون تعديل... بس هتضطر تغير الجنوط.... و دي فرصة انك تعرض شوية الجنط و الكاوتش و ده يزيد ثبات العربية على السرعات.... و في حاجات تانية ممكن تتعمل بس مش هقولها دلوقتي... اما اعملها عندي الاول عشان محدش يجرب و يقول مشتغلتش و يرجع يلومني :)
تحياتي للجميع