المشاركة الأصلية كتبت بواسطة وائل عطية
الموضوع دا كان مستخبي فين ياكريم ؟!!
بجد موضوع هايل واول مرة أخد بالي منه
أنا معاك إن في ناس كتير بتجيب العربية من أجل المنظرة علشان يقول أنا راكب كذا ولا كذا بدون مراعاة للاحتياجات الفعلية أو للمقدرة على تحمل مصاريفها ..يعني تلاقي الواحد راح اتدبس في 140 ولا 150 ألف جنيه تمن عربية وياريت فلوسه وفي جيبه ولكن ياإما سالف ياإما تقسيط والحسابة بتحسب ..طيب هاتلاحق على مصاريفها الدورية ولا البنزين ولا الأقساط ولا التأمين لو هاتأمن ولا ولا ...!!
مثال بسيط يؤكد اتفاقي مع أفكارك
لما كنت اشتريت الاسبيرانزا حسبتها إني مش محتاج أكتر من كده دلوقتي وبالسعر دا وحسبت هادفع كام وهاخد إيه في المقابل ..وبعد مابعتها لقيت إن بفضل الله كان تفكيري سليم لأني استعملت السيارة لمدة سنة وبعتها زي ماشتريتها ..يعني كأني ركبتها سنة كاملة ببلاش !!
ولما غيرت قارنت بين حاجات كتير قوي ..وفعلاً كنت عايز عربية قوية وكبيرة وبالفعل كنت هادفع كتير بدون داعي دلوقتي ..وحجزت وسحبت الفلوس في أكتر من حاجة ..لغاية ماربنا وفقني للفوكاس اللي معايا ..أنا شايف إنها كانت اختيار موفق لأني دفعت فيها تقريباً نصف تمن مثيلتها 2008 والحمد لله حالتها ممتازة وتُلبي متطلباتي من العربية في هذه الفترة (بالمناسبة لو حصل وكنت هاغير قريب برده هاجيب فوكاس 2008 فعلاً متميزة)