السلام عليكم
يا جماعة أنا مخي وقف من التفكير ومش عارف اعمل ايه ؟

امبارح كان يوم غريب ومليء بالمفاجآت والحمد لله
وانا مروح بالعربية كنت سرحان جدا لان كان في بعض المشاكل والحمد لله

المفروض كنت آخد يوترن وللاسف نسيت وكملت رحت راجع بظهري وبعد لما اتأكدت ان مفيش حد ورايا فجأة لقيتني لابس في عربية bmw 520i موديل 2002 بقوة كبيرة جدا
التلفيات بالنسبة للبي ام الرفرف الامامي ناحية السواق اتخبط جامد مع خدوش في باب السواق وعندي الحمد لله محصلش اي حاجة غير ان الجريدة اللي على الاكصدام اتقطعت

المهم ان الست نزلت هي والسواق وبداية الكلام اني لازم اصلح العربية في التوكيل
طبعا قلتلها نجوم السما اقربلك من اني ادخل التوكيل اصلا
وحصل كلام كتير جدا آخره انهم هايروحوا التوكيل ويشوفوا التوكيل ايه رأيه في حل المشكلة دي وبعد كده يرجعولي ننزل نسأل على سعر الرفرف استيراد وادفع تمنه وهم يكملوا الباقي ويصلحوا في التوكيل

وطبعا خدو رقم موبايلي وعرفوا طريق شغلي يعني من الاخر بسهولة هيعرفوا يوصلوا لي (وانا معنديش اي نية للتهرب)

طبعا الخبطة ممكن تتصلح وكلمت العقيد خالد الله يكرمه وقالي تعالى وابقى راضي السمكري وخلاص بأي حاجة (يعني من الاخر الراجل مشكورا بيقف جنبي في المصيبة دي)

المهم دلوقتي الناس مصرة على رفرف استيراد والله اعلم ايه اللي هيتم في الباب ؟

اعمل ايه ؟