هل هناك علاقة بين دواسة البنزين و صوت الكاسيت (ماروتي 2010)

**zooma783** · 08-06-2010 12:50 PM

أهلا شباب الماروتي...
عندي مشكلة (متكررة ولكن غير مستمرة) ساعات أكون ماشي بالعربية (زيرو ماروتي 2010) والعربية تكون ناعمة و100 مية ، وبعد شوية أروح مشوار 3 أو 4 ساعات وبعدين أرجعلها أول ما أمشي بيها و مع زيادة سرع العربية (مع دواسة البنزين) أسمع صوت (صفارة) من الراديو (طبع مش ضبط المحطة لأني بضبطها على درجة نقاء الصوت المظبوطة)،، وبعد ما أخفف رجلي من على دواسة البنزين الصوت يبدأ في الانخفاض. لو طفيت الراديو يختفي الصوت تماما.

في حاجة كمان (غيرت فلتر البنزين) وحاسس ان العربية في بعض الأحيان مش بتجري (حاسس اني ماشي وأنا رافع فرامل اليد) مع العلم ان الفرامل كويسة ومعنديش مشاكل فيها.
(ملحوظة: العربية عاملة 3500 كم والمشاكل دي ظهرت بعد ما ودتها التوكيل بعد 1000 كم (الصيانة الدورية))
وشكرا لحسن استماعكم.

**m7nsh** · 08-06-2010 06:58 PM

لا حول ولا قوه الا بالله
يعنى بعد ماودتها الصيانه بدأت المشاكل
طب انت غيرت الفلتر ليه ؟؟؟ اول صيانه ( الألف كيلو ) مش بيتغير فيها فلتر البنزين ؟؟
ممكن تكون فولت من بنزينه مضروبه .. جرب بعد التفويله دى تحط بنزين من حته تانيه
بالنسبه لحوار الصفاره ده فالحقيقه مش عارف .. انا شفتها قبل كده بس مع تقليب نور .. و طبعا بيكون عيب كهربا او تلميس .. بس مع البنزين دى مش عارف ؟؟!!
منتظر معاك ردود باقى الأعضاء
و ياريت كده بالمره تقولنا عملت ايه فى صيانه الألف و دفعت كام

**zooma783** · 09-06-2010 12:45 PM

أشكرك على ردك.
أولا: انا غيرت فلتر الزيت مش البنزين (أعتذر عن الخطأ)
ثانيا: صيانة الألف كيلو مجانية، بس بدفع ثمن الزيت و الفلتر وده كلفني حوالي 150 جنيه
ثالثا: أنا أغلب الأحيان بحط بنزين 90 من امارات مصر (على ما أعتقد انها محطة بنزين نظيفة) والمشكلة ما زالت موجودة
رابعا: كان عندي وش فانوس الاشارة اليمين مكسور تخيل غيرته بكام في التوكيل !!!!
الوش كان تمنه 35 جنيه + حبة مصنعيات كده مع لحام الاكصدام (الاكصدام خرج من مكانه و ركبوه تاني) مع توصيلات الكهرباء + جلبة لوش الفانوس يعني الحكاية كده دخلتلها في 550 جنيه ،،، يعني لو كنت غيرت وش الفانوس عند أكتر ميكانيكي حرامي فيكي يا بلد كنت وفرت بتاع 400 أو 450 جنيه (ادي العيش لخبازه ولو ياكل 10 أضعافه)

**ayman 2010** · 09-06-2010 02:00 PM

المشكلة دى مش من البنزين لآ المشكلة دى مشكلة كهرباء او اسلاك الوجيهات شيك عليها مظبوطة ولا اية
واطمن العربية دى اصيلة جدا واكيد هتكون حاجة بسيطة

**fawzyyyy** · 09-06-2010 02:20 PM

بقوللك ايه الكاسيت اللي انت مركبه صيني........????
لو صيني يبقي ده الطبيعي ...لأن مقاومة الكهرباء بتاعته ضعيفة فأما يسخن بتطلع الصفارة في السماعات.....!!

**dr.hazem** · 09-06-2010 08:52 PM

فعلا لو نوع الكاسيت نوع تعبان حتى وان كان متن التوكيل بس تعبان هيعمل كده اساسي
وتحس ان صوت المكنه بقا في السماعات
هههههههههههههه

اما لو الكاسيت ماركه محترمه فأعتقد ان في غلط في توصيل اسلاك السماعات والله اعلم

تحياتي