تقييمى ل صنى 2010 ex اوتو موديل 2010 عاملة 13 الف كيلو ...

**eng.octooo** · 09-06-2010 05:13 AM

بسم الله الرحمن الرحيم

هاندخل على طول فى الموضوع

العربية كتر عنها الاشاعات والى يقولك الباور بتاعها ضعيف جدا وزى اللادا

والى يقولك العربية التكييف فيها مالهوش لازمة

والى يقولك العربية تقفيلها سىء
والى يقولك العربية كل يوم عند الميكانيكى
والى يقولك العربية تقفيلها مصرى ..ابعد عنها دة العربيات الصينى برقبتها

دة كلة كلام نص كم .....انا هاقولكم على تجربتى للعربية ومش واحدة بس لا دول 3

الاولى عربيتى موديل 2010 ex اوتو عاملة لحد دلوقتى 13 الف كيلو

الثانية عربية عمتى موديل 2000

الثالثة عربية ابن خالى موديل 2005

والحمد لله العربيات مافيهاش مشكال (تذكر)

نبتدى التقييم عن عربيتى

العربية صوتها عالى (اة صوت الموتور عالى) بس مش الى يخليك تتخض ... يعنى وانت قافل الزجاج لو الار بى ام فوق ال 3 هاتسمع صوت الموتور لو تحت ال3 مش هايكون لة صوت

الثبات

الثبات فى العربية ...بجد والله تحفة وانا جبت بيها 180 على مصر اسكندرية الصحراوى ( كنت على الفجر وحبيت اجربها مش اكتر)
وكانت تحفة وكان ممكن اجيب اكتر بس الطريق كان كلة تحويلات
وثباتها جميل جداااا يعنى لو انت على 120 ممكن تاخد بيها غرزة مثلا وانت واثق فى ابعاد العربية ( انا مش بتشجع على الغرز على فكرة )

التسارع

التسارع بتاعها ممتاز اوى لحد ال 130 : 140 وبعد كدة بتحس ان العربية مخنوقة اوى وبتمشى زى السلحفة لحد ال 150 : 160 وبعد كدة بتفتح على البحرى ( بس طبعا احنا من هانفتح على البحرى لان لينا اهل وارواحنا امانة )

وما افتكرش حد عاوز يمشى بيها اكتر من 130 : 140 صح ؟؟؟

الباور

الباور ستيرنج فى العربية ناس كتيير بتقول علية تقيل ..بصوا انا لاحظت انك لما تبقى لسة متحرك بالعربية وسرعتك تحت ال 40 بيكون تقيل ومن ال40 : 120 ناعم جداااا وبعد ال120 بيبتدى يتقل علشان الثبات وتقدر تتحكم فى العربية على السرعات العالية

العفشة

العفشة بتاعة العربية حلوة جدااااا وبتديك ثبات خرافى بمعنى الكلمة بس بتحس ان العربية عفشتها ناشفة شوية بس دة بسبب الجنوط الكبيرة ومقابل الاداء الرياضى

العزل الخارجى

العزل الخارج مش هاقول ممتاز بس هاقول جميل جداااا لانك لو قفلت الزجاج مش هاتسمع غير اصوات خفيفة جدااا ...

وكمان عزل الهواء جميل انا جبت بيها 180 وماكانش فية صوت هواء داخل من الزجاج ولا حاجة الحمد لله

ابعاد العربية

ابعاد العربية جملية اوى وتقدر تقول عليها مثالية ..بس انا مش مرتاح مع الابعاد الخلفية فى الرجوع باحس انها عالية اوى من الخلف مش عارف لية ...بس الركنة بتاعتها سهلة

المرايات والرؤية الامامية والخلفية

بالنسبة للمرايات الجانبية الرؤية جميلة جدااااا
ومراية الصالون كويسة بس كان ممكن تكون احسن
الرؤية الامامية ممتازة
والرؤية الخلفية كان ممكن تكون احسن من كدة برضة بس مش سيئة

الصالون

اولا خامات التقفيل ممتازة
وجودة التقفيل مش ممتازة بس كويسة للقيمة السعرية
عرفتوا الفرق
يعنى التابلوة مصنع بخامات حلوة بس تركيب التابلوة تحس انة مش بجودة التيدا مثلا ...مش معنى كدة انة توكتوك لا هوة كويس وتقدر تقول علية نفس جودة تابلوة الاوبترا مثلا ويمكن احسن

الصالون ضيق شوية ..وخاصة للركاب فى الخلف بس فى المقابل عندك شنطة كبيرة جدا وتقدر تحط فيها حاجات كتير

و الصالون فية اماكن تخزين كتييير فوق الكونسول والتابلوة ومسند اليد وتحت الكاسيت ومكانين تحت الدركسيون والابواب وتحت الكراسى ...وشكلة جميل مع انة فية ناس مش بتحب شكلة الكلاسيك ..بس انا بحب شكلة جدا لانة بسيط وعملى لابعد الحدود

واماكن الازرار والمفاتيح والانوار والمساحات ممتاز وسهل الوصول ليهم

التكييف

التكيف ممتاز وبيوصل الهواء للركاب الخلفيين بسرعة وتبريدة جميل ..

بس بياثر على السحب وهاتحس بية لو انت محمل العربية او طالع مطلع جامد او بتشد مع حد بس لو بتمشى هادى مش هاتحس بتاثيرة

وفية عيب تانى خطير انة بيأثر جامد على سحب البنزين يعنى الصفيحة يدوب بتكمل ال 150 مع التكييف ( مش عارف دة عند كلة ولا عندى انا بس ) وعربيات قرايبى عندهم نفس المشكلة برضة

البعبع ( استهلاك البنزين)

استهلاك البنزين بيعمل متوسط حوالى 180 : 190 ك فى الصفيحة مع ان الار بى ام تحت ال 3

الجسم الخارجى

العربية صاجها عادى مش متين ولا ضعيف .. بس انا عندى الاكصدام فية شرخ صغير حوالى 5سم بسبب عربية ريحت علية ..بس عموما كويس مش ضعيف
والانوار الامامية اضائتها حلوة جدااا سواء فى الفوجات او العالى او الواطى
والاضائة الخلفية بالليل حلوة ومميزة واستجابة الاشارات جميلة وواضحة فى الظلام

وفى الاخر ...مش هاقول غير كلمة واحدة

العربية ممتازة جدااااا بالنسبة لفئتها السعرية والعربية بجد عربية عائلية من الدرجة الاول

وادعولى ...لان فية كام مشكلة شخصية نفسى يتحلوا

**ahmad--ezzat** · 09-06-2010 05:18 AM

والله تقييم ممتاز لعضو ممتاز
الف مبروك

**blazer** · 09-06-2010 05:22 AM

شكرا على التقييم
بس انا العربيه سقتها ex auto عامله 7000 كم
العربيه مش ثابته !
اكتر حاجه مدايقانى فيها احساسى ان العربيه مش راسيه
لما اجيب 120 وحته فى الطريق مش مزبوطه بحس ظهر العربيه هيبتدى يلعب !
الفارق بينها و بين الامبريزا على نفس السرعه فرق السما من الارض !!!!!
العزل بتاعها مش حلو وفعلا صوت المحرك زى ما انت قولت عالى

بس فى المقابل العربيه ارتفاعها حلو عن الارض و سحبها كويس والاهم سعرها كويس جدا جدا
ملحوظه : انا سقت العربيه حوالى 400 او 500 كم

**م.محمد علاء** · 09-06-2010 05:43 AM

جبت ال 180 دي إزاي يا أوكتووووو
انا حتجنن...مش عارف أعدي ال 170!!!!!!!!!!!!!

**dolly13** · 09-06-2010 06:54 AM

الف مبروك عليك وبجد التقييم عملى جدا

**eng.octooo** · 09-06-2010 12:13 PM

شكرا على ردودكم .....

بس العربية ثابتة جداااا ودة بشهادة كل مالكيها
اتاكد من العفشة مربطة كويس والكاوتش مظبوط ...لان كل الى معاهم العربية بيشكروا فى ثباتها
بس هوة موضوع الظهر دة بسبب حاجة فى العفشة ناقصة عن السوبر صالون مش فاكرها ..
ومحمد ههههههههههههههه انت عاوز تعدى ال170 لية

انا عندى العربية بعد ال140 مثلا بتقفل قفلة غريبة تحس ان حد بيشدها لورا اما بعد كدة بتفتح فتحة غبية اوى ...

جرب كدة فى وقت يكون فاضى وطريق نضيف واطفى المكيف واقفل الزجاج واطلع طلعة بالراحة وخليها تاخد الغيارات بسلاسة هاتجيب معاك حاجات عالية .... بس خلى باللك السرعة مش لذيذة

**Ahmed.TV** · 09-06-2010 01:57 PM

اوه اوه اكتووووووووووووووووو
تسلم ايدك على التقرير القوى ده والعملى , والمفصص , والشامل , حقولك ايه ولا ايه ,خلصت كل الكلام , ههههههه
متالق بجد , ووحشتنا وجودك معانا
وربنا يوفقك وتحل كل امورك على خير باذن الله

**blazer** · 09-06-2010 07:07 PM

المشاركة الأصلية كتبت بواسطة eng.octooo

شكرا على ردودكم .....

بس العربية ثابتة جداااا ودة بشهادة كل مالكيها
اتاكد من العفشة مربطة كويس والكاوتش مظبوط ...لان كل الى معاهم العربية بيشكروا فى ثباتها
بس هوة موضوع الظهر دة بسبب حاجة فى العفشة ناقصة عن السوبر صالون مش فاكرها ..

تقريبا Sway bar
+ sport suspension

**SeaShark** · 09-06-2010 09:03 PM

انا جبت الاي اكس صالون 2010 و بقالها معايا كذا شهر بس هي عربيه كويسة اوي فعلا بس انا حاسس اني ندمان اني مجبتش السوبر صالون هي كانت هتفرق 10000 بس الواحد مش هيجيب عربية كل يوم يعني....انا ندمان لدرجة اني بفكر ابيعها و اجيب السوبر صالون !!

الموضوع: تقييمى ل صنى 2010 ex اوتو موديل 2010 عاملة 13 الف كيلو ...

LinkBack

أدوات الموضوع

عرض

تقييمى ل صنى 2010 ex اوتو موديل 2010 عاملة 13 الف كيلو ... - انشر الموضوع فى :

-

-

-

-

-

-

-

المواضيع المتشابهه

اكسارا 2 عاملة 30 الف كيلو موديل 2002 ؟؟؟

الباور مش شغال فى فيرنا 2010 عاملة 5500 كيلو حرامممممممم

فانتازيا مانيوال 2010 ولا سيراتو اوتو 2010

تغير السيراتو 2010 خليجي اوتو فاضيه بسيراتو 2010 كامله

رينو رينبو موديل 97 عاملة 300 ألف كيلو!!

الكلمات الدلالية لهذا الموضوع

المفضلات

المفضلات

ضوابط المشاركة