مقارنة مبيعات الجين2 vs البيرسونا ؟

**mangere90** · 09-06-2010 11:54 AM

السلام عليكم ورحمة الله وبركاته

يا أخواني انا لاحظت من ساعت ما نزلت البيرسونا مبيعات الجين2 قلت شويه وطبعا علشان
في كتير من الناس بيقولو ليه اخد عربيه شنطتها مش واسعه وفي عربيه هيه هيه وشنطتها اوسع
وكمان تمنها اققل صح مش في ناس كتير بتفكر كده ، انا مش عايز الأمر ده يتوصل زي ماحصل
في الجولف 5 والجيتا برده المصنع بعد مانزل الجولف 5 وطبعا كلنا عارفين اد ايه العربيه دي
جميله ، راح بعد كده المصنع منزل الجيتا هي هي الجولف 5 بس عائليه طبعا الناس برده فكرو بنفس
الفكر ليه اخد عربيه من غير شنطه وفي عربيه بشنطه وبنفس السعر وابتدت تقل مبيعات الجولف5
لغاية لما المصنع واقف انتاجها ودي كانت اول مره تحصل في الجولف لأني الجولف 5 هي الوحيده
اللي نزلها عربيه مماثله وهي الجيتا ، اما بقيت الجولف من 1 لغاية 4 ماكنش ليها مماثل فطبعا مبيعتها حتي في اعادة البيع المستعمل مازالت ممتازه ، ودلوقتي اقدر اقول لحضراتكم هوهو نفس
اللي حصل في الجين2 المسكينه ، طبعا في ناس عارفه ان الجين حاجه والبيرسونا حاجه بس دول
اللي فاهمين بس الفرق مابين الأتنين حتي لو كان هايشتري البيرسونا بس هو مش مشتريها علي
اساس ان شنطتها اوسع وارخص من الجين2 .

يارب اكون عرفت اوصل الفكره اللي في دماغي ويارب اصحاب البيرسونا مايزعلوش مني !!

**ehabsharaf** · 09-06-2010 01:16 PM

ياباشا البرسونا اغلى الف جنية من الجن 2 الجن 2 ب 91 الف البرسونا 92 الف
اعتقد اللى عايز يركب الجن 2 عمرة ما هايفكر فى البرسونا الا القليل واللى حابيب البرسونا موش هايفكر فى الجن 2 الا قليل جدا مع احترامى لاراى حضرتك دية حاجة ودية حاجة حتى لو الاتنين مشتركين فى معظم المكونات انا مثلا الساجا لما نزلت عجبتنى جدا وفعلا حجزتها وبعد كدا فكرت فى الواجا وفى الاخر رسيت على البرسونا وغيرت الحجز يعنى ال جن 2 مكانتش من ضمن اختياراتى لانى من الاول بفكر فى عربية سيدان موش هاتش باك او لبفت باك

(الاختلاف في الرأي ...لا يفسد للود قضية)

**aly_hosny** · 09-06-2010 02:07 PM

طب هو ايه الفرق بينهم ؟؟؟؟
اصل انا بصراحة مبعرفش افرق بينهم غير لما اشوف الشنطة

**Mostafa.Mahran** · 09-06-2010 02:30 PM

اكيد كل واحد بيبص لاحتياجاته
يعنى لو شاب او اسرة صغيرة هيلاقى ان الجين مناسبة ليه و العكس لو اسرة كبيرة البيرسونا ممكن تكون مناسبة اكثر علشان الشنطة

وغير كده الاذواق تختلف

**zkralla** · 09-06-2010 09:57 PM

المشاركة الأصلية كتبت بواسطة mangere90

السلام عليكم ورحمة الله وبركاته

اللي حصل في الجين2 المسكينه ، طبعا في ناس عارفه ان الجين حاجه والبيرسونا حاجه بس دول
اللي فاهمين بس الفرق

هو فيه فرق غير الشنطه ؟

**MohabSaeed** · 10-06-2010 01:06 AM

بس الجين2 مساحه الشنطه فيها كبيره ...ماتعتبرش صغيره

غير ان الجين2 ليفت باك ... مش هاتشباك " فرق بين الاتنين فى المساحه الداخليه و مساحه الشنطه .

الاختلاف مابين الجين2 و البيرسونا ان ديه سيدان و ديه ليفتباك... و ده كان موجود فى الويرا ... ويرا ليفت باك و ويرا سيدان .

**Raul_7** · 10-06-2010 04:47 AM

مش شرط, يعني انا مثلا كنت عايز جين 2 بعدين لقيت البيرسونا اكبر و سيدان و كده بس بصراحة مكنتش مقتنع بيها أوي و فضلت الجين 2 هي الي مسيطرة علي عقلي, حتي لو الشنطة اصغر شوية.

بينما أكيد ناس تانية حسوا العكس بالظبط.

بس هو مين قال انها ابتدت تنقرض, انا نسبة الجين الي بشوفها في الشارع اعلي من البيرسونا, و حتي أخر مرة و انا في مخزن عز العرب كنت شايف دفعة جديدة من الجين و بيقولو دلوقتي انها شبه خلصت. يعني أكيد العربية عليها اقبال.

تحياتي.

**Hmatchy** · 10-06-2010 05:34 AM

المشاركة الأصلية كتبت بواسطة mangere90

السلام عليكم ورحمة الله وبركاته

يا أخواني انا لاحظت من ساعت ما نزلت البيرسونا مبيعات الجين2 قلت شويه وطبعا علشان
في كتير من الناس بيقولو ليه اخد عربيه شنطتها مش واسعه وفي عربيه هيه هيه وشنطتها اوسع
وكمان تمنها اققل صح مش في ناس كتير بتفكر كده ، انا مش عايز الأمر ده يتوصل زي ماحصل
في الجولف 5 والجيتا برده المصنع بعد مانزل الجولف 5 وطبعا كلنا عارفين اد ايه العربيه دي
جميله ، راح بعد كده المصنع منزل الجيتا هي هي الجولف 5 بس عائليه طبعا الناس برده فكرو بنفس
الفكر ليه اخد عربيه من غير شنطه وفي عربيه بشنطه وبنفس السعر وابتدت تقل مبيعات الجولف5
لغاية لما المصنع واقف انتاجها ودي كانت اول مره تحصل في الجولف لأني الجولف 5 هي الوحيده
اللي نزلها عربيه مماثله وهي الجيتا ، اما بقيت الجولف من 1 لغاية 4 ماكنش ليها مماثل فطبعا مبيعتها حتي في اعادة البيع المستعمل مازالت ممتازه ، ودلوقتي اقدر اقول لحضراتكم هوهو نفس
اللي حصل في الجين2 المسكينه ، طبعا في ناس عارفه ان الجين حاجه والبيرسونا حاجه بس دول
اللي فاهمين بس الفرق مابين الأتنين حتي لو كان هايشتري البيرسونا بس هو مش مشتريها علي
اساس ان شنطتها اوسع وارخص من الجين2 .

يارب اكون عرفت اوصل الفكره اللي في دماغي ويارب اصحاب البيرسونا مايزعلوش مني !!

اعزرنى انا عاوز اسئلك سؤال انت شايف ايه الحل يوقفوا انتاج البيرسونا مثلاً؟؟؟
ولا يرخصوا الجين 2 و يغلوا البرسونا؟؟؟؟
اللى عاوز يشترى هاتش باك او اوت باك موش هيفكر فى سيدان والعكس صحيح
و اعزرنى على معلومة اول جولف تنزل سيدان هى الجيتتا و انها اثرت على مبيعات الجولف
اولا هى اثرت على مبيعات البسات موش الجولف
تانى حاجة لو على كلامك الجيتا اثرت على الجولف ما البورة كانت موجودة من 2002 تقريبا و اتباعت و الجولف كانت بتتباع بردو وكان فى اشكال للجولف القديم سيدان بردو
استاذ mangere الشركات بتعمل كدة علشان تلبى احتيجات اكبر عدد من المستهلكين و خد بالك السيدان حاجة وليه ناسوا و الهاتش بالك حاجة وليه ناسوا والكوبيه حاجة وليه ناسوا و لولا اختلاف الاذواق لبارت السلع

**Toldooo** · 10-06-2010 03:07 PM

يا جدعان ال جين 2 اجمد من البرسونا بكتير دى كفايه الكراسى بتاعتها الى مش موجودة اصلن فى البرسونا ال جين 2 عربيه سبور بكل المقاييس اما البرسونا عربية عادية زى اى عربيه سيدان