الموضوع: يــــــوم مـــثـــيـــرمـــــن اولــــــه مــع الـــسـيراتــــــو !!!!!!!!

الله ينور ياباشا
الف مبروك

ممكن تقولي المرايا دي جيبتها منين وبكام ؟

يعني ايه قفل للجنوط؟

يا جماعة حد يفهمنا ايه قفل الجنوط ده وبعدين هيا ايه المرايا دى هيا مرايا وانت سايق وشاشة وانت واقف ولا ايه النظام عايزين نفهم
ويبقى مشكور صاحب الموضوع لو نزلنا شوية صور

اشكركم جميعا على الروح الطيبه دى وربنا يبارك فيكم جميعا
بصراحه اوبشن الاقتباس المتعدد غير فعال عندى علشان كده مش عارف ارد على كل سؤال على حدى بس هحاول ارد على كل الاسئله وياريت لو نسيت اى حاجه فكرونى
اكتر سؤال كان عن قفل الجنوط
1-القفل ده لحمايه الجنوط من السرقه لان الموضه دلوقت اربع حجارة تحت العربيه وملف عجل وفى 5 دقايق تبقى العربيه على الحجاره
والقفل ده عباره عن اربع مسامير ذى بتوع العجل سن المسمار عادى ذى مسمار العربيه لكن راس المسمار ليها شكل مختلف مش ممكن يتفك بمفتاح العجل العادى انما جاى مع الطقم لقمه ليها من ناحيه عكس شكل راس المسمار علشان تركب فيه والناحيه التانيه للقمه تركب فى مفتاح العجل
يعنى تستخدم اللقمه كانها مفتاح او وسيط لفك مسمار الامان
يعنى بدون اللقمه دى ولا احنا ولا الحرامى نعرف نفك العجله
واعتقد ان فى كذا شكل من اللقمه دى مع كل طقم حسب شكل مسمار الامان اللى معاه والا كان الحرامى جاب طقم وخلاه معاه وخلصت الشغلانه
وسعر الطقم 50 جنيه ويمكن تفرق 5 او 10 من محل للتانى حسب المنافسه والمعرفه
2-المرايا بتركب فوق مرايه الصالون وهى مطفيه مرايا فاميه بنى فاتح وهى والعه طبعا انسى المرايا وخصوصا بالليل لان الصوره بتبقى واضحه جدا انما بالنهار لو والعه بتشوف الصوره المعروضه ولو ركزت شويه تشوف العربيات اللى خلفك لكن بصعوبه والاعتماد بيكون على مرايه الجنب
سعر المرايا يبدا من 300 حتى 600 حسب شكلها وحجمها ومعاها جوى استيك للجامز ولا لا وهل فيها اوبشن البلوتوث ولا لا كل ده بيحدد السعر وهو تقريبا اللى انا شوفته 3 اشكال معرفش فى تانى ولا لا
بصراحه اللى انا جبتها كان اهم حاجه عندى البلوتوث علشان انا اتهريت مخالفات تليفون ودى اعلى واحده فى اللى انا شوفتهم وبعد الواسطه والخدمه والحبتين بتوع السوق اخذتها 575 جنيه بدون عدسه الكاميرا ومش عارف هل ده سعرها ولا سعر جملتها فعلا وهى اسمها
rearview mirror usb/ card player ,وبتعرض انواع الفيلات دى
mp4/mp3/wma/jpeg/native games divx
3- عدسه الكاميرا وهى العدسه اللى بيتخرملها فى الاكصدام الخلفى طبعا كأن البونطه دى جت فى (البطين الايمن والاذين الايسر جو قلبى) وتتوصل على المرايا وبتاخد باور من المرشيدين علشان اول لما تعشق للخلف تنور وتجيب الصوره وراك ولو الدنيا بالليل كفايه النور الصغير مع الانتظار بلاقى الصوره معقوله
سعر العدسه 150 فى المتوسط لان فى موديلات كتير منها اللى بيركب على الزجاج فى الهاتش باك ومنها اللى فى الاكصدام بيركب شحط ومنها اللى بيركب بغويشه قلوظ من جوه الاكصدام
4- وحدات الرفع للزجاج
هقولكم على معلومه مهمه جدا
التوكيل بيرفض يركب وحدات الرفع تماما وكان كلام المهندس لى ان وحدات الرفع بتفضل موصله باور لماكينات رفع الزجاج وممكن تتطيرها علشان كده قالى لو ركبنهالك هتخرج ماكينه الرفع من الضمان وقالى ان دى تعليمات صريحه من كيا الام والله اعلم
طبعا انا قلتله بعد كل ده نخرج من الضمان بلاها وحدات رفع
واللى عاوز يركب على مسئوليته خارج الضمان والامر مفوض لتقدير كل عضو
على فكره الماكينه المناسبه للسيراتو اسمها وان تتش وهى ماكينه واحه للاربع ابواب مش ماكينتين ذى المتعارف عليه وفى منها النوع المعروف اللى اسمه سباى يمكن يكون فى من الوان تتش دى نوع تانى وانا معرفوش
5- ستاير خلفيه
ستاير للزجاج اليمين واليسار الخلفى وفى ناس بتركبها قدام كمان بس انا مفضلتش قدام واكتفيت باللى ورا لان قام تأثير التكيف عالى فحتى لو شمس اللى قدام مش بيتاثر قوى ذى اللى قاعد ورا وهى بتركب على الضلع الافقى قدام الزجاج (راجع السيراتو علشان تفهم قصدى ايه ) هتلاقى الزجاج بينزل جوه الباب وقدامه شفه عريضه يمكن 5سم بتتلزق الشمسيه عليه وهى سوسته يعنى ملمومه على بعضها ولو شدتها وشبكتها بطرف الزجاج هتطلع وتنزل معاه ولو فصلتها هيبقى الزجاج حر وتوصلها وقت الحاجه بس وانا فضلت كده علشان الستاير بتثير اخوانا بتوع الدبابير والنسور بس لو حد ناوى يشبكها فى الزجاج يبقى لازم يفتكر يفتح الزجاج اول ما يقابل اى لحن.........(يجعل كلامنا خفيف عليهم ) علشان مع فتح الزجاج هتتلم الستاره ومش هتبان
سع الشمسيتين 75 ويمكن فى 10 اب اند داون وانتا وشطارتك
6-اخيرا العرقات للكراسى والمعطرات
طبعا دى اذواق وانواع مش عاوز ادوشكم بيها كل واحد وذوقه والسعر المناسب ليه
انا فضلت نوع اسمه عراقه بامبو علشان فيها جزء فى المقعد وجزء فى الظهر خوص او خشب علشان تهوى ومتكتمش اللى راكب عكس اللى كلها فرو او سفتج بتسخن
7-نفسى فى حاجه اخيره لو حد يعرف تفاصيلها
وانا على الدائرى شوفت سيراتو ماشيه جنبر ومركب شويه نواكل على فتحات التكيف فى التابلوه بس شكلها بصراحه لفت نظرى
وكان مركبها على الفتحات الوسطى واللى فى الطراف وكانت عامله ماتشنج مع عصايه الفيس والتاره والاكر
لو حد شفها يقولنا منين وبكام
8-اماكن شراء ما سبق
شارع التوفيقيه وسط البلد طبعا مليان من كل ده
شارع دمشق مصر الجديده
انا جبت من محل فى شارع مصر والسودان

اسف انى طولت عليكم ورغيت كتير بس انا حبيت اوفى كل التفاصيل بالضبط ذى ما حصل معايا يمكن حد يكون محتاج معلومه واقدر اساعده
بخصوص الصور هحاول جديا اعمل كده بس ادونى فرصه لان العربيه عطلتنى الفتره اللى فاتت كتير عن الشغل بس ربنا يسهل واقدر اصور الكلام ده وارفعه
واشكركم على سعه صدركم ومداخلاتكم

المشاركة الأصلية كتبت بواسطة midosalah

يا جماعة حد يفهمنا ايه قفل الجنوط ده وبعدين هيا ايه المرايا دى هيا مرايا وانت سايق وشاشة وانت واقف ولا ايه النظام عايزين نفهم
ويبقى مشكور صاحب الموضوع لو نزلنا شوية صور

المشاركة الأصلية كتبت بواسطة midotefa11

مبروك عليك بس انا كنت عايز اعرف انت كده لسه جوه الضمان بتاع العربيه صح؟؟ يعني لو جبت الحاجات وركبتها في التوكيل خلاص تبقى ضمان الوكيل بردوو؟؟؟ وربنا يباركلك فيها ان شاء الله

بس حضرتك طالما دفعت جوه التوكيل واتكتب ان تم بمعرفتهم حتى لو متمش اعتقد ان كده يبقى جوه الضمان لان محدش لعب فى العربيه غيرهم اى اضافات تمت بمعرفتهم بغض النظر عن الواقعه بتاعتى يمكن مش كل حد يحصل معاه كده
وان كان التلكيك وارد