الموضوع: كل الي عنده مشكله يكتبها!!!

طبعا بعد كمية الرسايل اللى بدأنا نبعتها لفيات ايطاليا, مدير أماترا بدأ يهتم و دة نص الرسالة اللى لسة باعتهاله حالا:

دى قصة معاناتى مع العربية و التوكيل:
فى شهر 7 سنة 2007 حجزت العربية ب1000 جنية فى معرض أوماترا بتاع شارع وزارة الزراعة , فى الحجز قالولى ممكن تختار لونين,
اخترت الأزرق و الأسود لأن العربية ماكنتش موجودة فى المعرض أصلا ساعتها (يعنى حجزتها عميانى)
بعد شهر كلمونى قالولى العربية وصلت و لونها اسود , قلتلهم أنا عايز الأزرق قالولى استنى بقى الدفعة الجاية كمان شهرين!
شوفتها بالصدفة (الزرقاء) فى معرض فى اسكندرية و جبتها من عندهم

كنت مسافر اسكندرية فى مرة (أنا من طنطا ) وعملت صيانة ال 5000 (مجرد فحص عام) , فى "الطارق النيل " فى الاسكندرية الباب الاخضر ,
المكان تعبان جدا و مابتشوفش بيعملوا اية فى العربية .
و لو العربية محتاجة شغل مش حيخلص فى نفس اليوم حتى لو حجزت معاد مسبق , لان التوكيل دة بيعمل صيانة ماركات اخرى زى "سكوربيو" الهندية وهايما الصينية وبالتالى ضغط الشغل عندهم كبير .

عملت صيانة ال10000 فى توكيل أوماترا بتاع جسر السويس و دفعت 380 جنية ثمن تغيير زيت موبيل 1 و فلتر زيت و مصنعية .التوكيل أحسن بكتير من بتاع الاسكندرية رغم انه لا يرقى بتوكيل شركة عريقة زى فيات من حيث الحجم و الامكانيات.
انتظرت أكتر من 3 ساعات رغم انى حجزت معاد بردو ! لأن الظغط علية كبير لأنه المركز الوحيد فى القاهرة (غير مركزين تانين معتمدين للصيانة فقط)
قلتلهم ان التكيف أصبح أضعف من الاول بكتير, كشفوا علية فى خمس دقايق و قالولى دة زى الفل !
قبل ما أروح التوكيل أخدت بالى ان فى جزء من الدهان متقشرة فى زاوية حادة عند الباب الخلفى . لمل قولت للمهندس عليه قالى ان العربية فيها حكة جنب الجزء المتقشر ,وهى السبب فى كدة علشان كدة مش مسؤلين عنها!!

بعد كدة "كفة" المراية اليمين اتسرقت . سألت عليها فى التوكيل قالولى ب 170 جنية بدون الضريبة , و كمان مش موجودة و ابقا اسأل عليها كمان
شهرين ! يعنى حتة مراية تمنها هايعدى ال180 جنية !
دة صاحبى معاه سيفيك 2009 جاب مراية من التوكيل ب140 جنيه , و كنت معاه و شوفت نظافة التوكيل و المعاملة الشيك قوى هناك
مع العلم ان السيفيك ب 150,000 جنية مش ب 70,000 !
فى واحد صاحبى فى ألمانيا جابلى "كفة" المراية من توكيل فيات هناك بما قيمته 120 جنية و للأسف كسرتها بعد فترة و لاقيت التقليد بتاعها فى
مصر ب 60 بس , رغم وجود فرق بسيط جدا فى الجودة

بعد فترة كسرت الفانوس الأمامى اليمين , كلمت التوكيل قالولى ب 800 جنية بدون الضريبة و التركيب (عرفت ان سعره وصل ل1450جنية حاليا), رحت جبت واحد استعمال الخارج بعد ما دخت عليه ب 170 جنية بس
وأنا بغير فردة كاوتش فى مرة لقيت الجزء الكاوتش فى المساعدين متاكل تماما , و حسيت ان العربية أصبحت أوطى ورا و كمان دة سبب ان اللى جالس ورا بيحس بالمطبات جدا

قلت أسيبها كدة لحد صيانة ال20000 و خلاص.
التكييف أصبح أضعف بالتدريج لحد ما بقى زى المروحة! روحت التوكيل بتاع القاهرة علشان التكييف و كمان صيانة ال20000 بالمرة , بعد حجز معاد و كان مليان على اخرة كالعادة.و كنا فى أول رمضان اللى فات, لما وصلت قالولى " مافيش وقت لتصليح التكييف و كمان صيانة ال20000 ,
اختار حاجة واحدة المرة دى" ! أنا اخترت التكيف لأنى كنت بموت من الحر , بعد ساعتين استلمت العربية , قالولى كان مسرب فريون و شحنوه .
قلت طب دى ممكن تسرب تانى لو فى تسريب فى الدورة ولا حاجة قالولى لأ ماتخافش. و ما دفعتش حاجة

بعد اسبوع حصل الاتى :
1- بدأ التكيف يضعف تانى , بمعنى انة ياخد وقت طويل علشان يسقع و فى خلال مدة الهواء برودته تقل لحد ما يبقى زى المروحة.
2- مروحة الردياتير أصبح صوتها عالى بالتدريج لحد فظييييييييع خصوصا لما أشغل التكيف.
3- الدبرياج مع السواقة و الضغط المتكرر عليه بينزل لتحت بالتدريج لحد لما يبقى مقارب لمستوى الأرضية, برفعه برجلى بيطلع لوضعه تانى , و
بعد ربع ساعة سواقة تقريبا بينزل تانى, و هكذا
4- الفتيس مش ناعم زى الأول, و فيه عضه فى الغيار الأول و التانى و المرشدير
5- الكاوتش فى المساعدين المتاكل بيزود الشعور بالمطبات
6- فى أصوات غريبة مختلفة بسمعها من الموتور على فترات مختلفة!
روحت التوكيل تااااااااااااااانى بعد اسبوع علشان صيانة ال 20000 و المشاكل اللى فى العربية . بعد 3 ساعات تقريبا استلمت المخروبة (كرهتها خلاص) و كانت المفاجأة : ما عملوش حاجة تماما غير صيانة ال20000 لأنهم بيقفلوا فى رمضان الساعة 3 .
كاوتش المساعدين قالولى ان الجنوط "العريضة" اللى مركبها هى السبب (عرضها 195), و كدة عادى مش مشكلة!
الدبرياج ظبطوه (قالولى فى كاوتشة اتحركت من مكانها )و المروحة قالولى صوتها عادى كدة!!
قالولى ان تيل الفرامل هايتغير و وافقت على تغيره
و لما شوفته لقيت فيه لسة أكتر من نصفه
الفاتورة : 950 جنية !! لية 950 ؟؟ هى العربية بكام أصلا علشان بعد 20000 كم أدفع المبلغ دة ؟!
غسلوا العربية أى كلام من برة , رشوها بشوية مية و خلاص
و بعدين أخدت بالى ان العربية محكوكة من الجنب حكة طويلة بطول العربية, قلتلهم عليها قالوا ما هو فى علامة فى الورقة أهى قبل التسليم (و العلامة اللى فى الورقة عبارة عن دايرة بالقلم صغيرة بس) قلتلهم العلامة فى الباب الامامى بس لان كان فى خربوش صغير فعلا , قالوا أصل العلامة دى معناها ان ليها امتداد للباب الخلفى . بعد مناقشة فاشلة زهقت منهم و مشيت.
بعد نصف ساعة الدبرياج رجع زى ما هو تانى !!

كنت مشغول و مافيش عندى وقت أسافر للتوكيل تانى علشان المشاكل دى كلها

من 5 شهور العربية عملت 30,000 كيلو كلمت التوكيل و حجزت معاد بعد أسبوع و لكن بعد يومين للأسف عملت حادثة
كلمت التوكيل قالولى هايأخدوا 500جنيه علشان أنقلها لحد هناك و بعد كدة هايعملوا المقايسة و هتأخد اسبوع تقريبا
أنا ماكنتش مأمن للأسف و كنت عايز أصلح العربية بتمن معقول, فغيرت الأتى:
- المقص اليمين (ب330 الأصلى عند الكيلانى) و ب750 جنية تقريبا فى التوكيل
- "شداد الفتيس" أصلى ب300 جنية , ماعرفش سعره كام فى التوكيل بس أعتقد الضعف على الأقل
- الزجاج الأمامى بنوع مشابه للأصلى ب330 جنية , فى التوكيل الأصلى ب 1700 تقريبا
- الفانوس الأمامى يمين ب 450 ماركة ديبو من الكيلانى, فى التوكيل الأصلى ب1450
- 2 كرتير رفرف الأصلى ب150 عند الكيلانى , ماعرفش بكام فى التوكيل
- صلحت الأكصدام الأمامى ب50 جنية بس , طبعا التوكيل كانوا هايغيروه بألفين جنيه
- صلحت جزء من الشكمان (headers) لأنه كان واخد خبطة من تحت ب150 , طبعا كان هايتغير فى التوكيل بس ماعرفش سعره كام
- عملت سمكرة لبعض الأجزاء
- اشتريت طقم جنوط جديد
- الأيرباجز فتحوا و لسة ماصلحتهمش
- العربية بتحدف يمين حاجة بسيطة بعد الحادثة و مش عارف السبب لحد دلوقتى
طبعا المشاكل الأساسية بتاعة الدبرياج , التكيف, صوت المروحة العالى جدا, عضة الفتيس و صوت الموتور الغير طبيعى لسة موجودين و أنا مستحمل العربية و ماشى بيها كدة!
و الجديد بقى: لمبة الباور و لمبة الهاند بريك بينوروا و يطفوا على فترات لوحدهم كدة و أنا سايق

تتوقع لما أى حد يسألنى "البونتو عاملة اية معاك " أقوله اية ؟؟
علما بأن سعر اعادة بيعها فى الأرض خالص لأن فى ناس عارفة تقصير التوكيل و كمان مافيش دعاية ليها فى التلفزيون خالص و بالتالى مش معروفة و منتشرة, على عكس أفيوهاتشباك مثلا أو هيونداى جيتز و غيرهم
لدرجة ان مرتين قبل كدة واحد سألنى فى الشارع " هى العربية دى صينى؟"
العربية: بونتو كلاسيك 2008
الرخصة: أبوبكر محمد صلاح الدين
الشاسية: 1007104

غمراوى باشا كنت قلتلى على موضوع الصوت لما انزل من العربية ده بطاحة مساعد يا ترى دى بتتغير لوحدها ولا ها يقولولى مساعد على بعده و سعرها تفريبا كام عشان ابتدى احوش لاوماترا
:(