الموضوع: اريد شراء البرافو و ارجو المساعدة و الاستشارة يا جماعة

المشاركة الأصلية كتبت بواسطة zamalkawy_6

السلام عليكم يا شباب انا كنت عايز اشتري البرافو هيا العربية دي متوافرة دلوقتي في التوكيل استلمها فوري لو دفعت كاش و لا بنظام حجز ؟

العربية متوافرة فى التوكيل والاستلام اخر الشهر

و يا ترى هتبقى موديل 2010 و لا 2011 و لو 2010 يا ترا 2011 نازلة امتى؟ و كمان بيتحطلها بنزين 92 و لا 95؟ و انا في مقدوري اشتري اللي ب 138000 الفئة التالتة الاوتوماتك و هل دي فيها موضوع الكروز تراكر بتاع حركة الفوانيس و لا مش في الفئة دي؟

ها تبقى موديل 2010 و2011 نازل مش قبل شهر ديسمبر
بيتحطلها بنزين 92 عادى وال95 مش بيفرق غير بعد صيانة ال10 الاف وبيوفر حوالى 15% بس طبعا سعره اغلى من ال92 كتير
الفوانيس عادية ومش بتتحركمع الدركسيون غير فى الفئة السادسة اللى ب165 الف ودى 150 حصان مانيوال.


يا ترى ايه نظام طريقة سواقتها يعني اصل انا حديث عهد بالاوتوماتيك و كل اللي سقته قبل كده مانيوال انا قريت ان ليها طريقة سواقة معينة و الموضوع ده مقلقني لان مسوقتش اوتو غير نيسان ساني اوتو و كان مرتين فقط لا غير و كان كل الموضوع اجيب ال d و اطلع يعني مجرد انقل من ال n لل d و انا دايس فرامل
السواقة عادية خالص، بردو ها تجيب من الN للA وتمشى عادى خالص ولو حبيت تنقل للمود المانيوال تقدر تدوس الفتيس تدوسة شمال وتنقل للوضع المانيوال وده بتنقل من الدركسيون + & - او من خلال الشيفتات اللى فى الدركسيون
هو تكوين الفتيس عبارة عن فتيس مانيوال عادى خالص ديسك واسطوانة ودبرياج كهرباء بيقوم بالنقل لوحده، عشان كده ممكن تحص بنتشة بسيطة اوى خلال النقلات وكل المطلوب منك انك يدوب تخفف رجلك من على الدواسة ولو مخففتش بردو عادى العربية ها تنقل.

كمان كنت عايز اعرف بالنسبة للتكييف هل تكيفها حلو عشان ده يهمني و هل ده بياثر على سحب العربية خصوصا انها 1400 بس؟

تكيفها ممتاز عشان التكييف دنسو يابانى والعربية 1400 تربو فا التكييف مش بيأثر عليها.

كمان هو قطع غيارها بكام انا شفت الموضوع اللي معمول عن اسعار قطع غيارها لقيت الصور بتاعت الاسعار مش ظاهرة يا ريت حد يحطلي الاسعار تاني و اكون شاكر ليه جدا

الاسعار انا رفعتها لحضرتك تانى تحت وهى مناسبة فى بعض قطع الغيار وغير مناسبة فى البعض الاخر

و كنت عايز اعرف ايه افضل شركة تامين اتعامل معاها بعد ما اشتري العربية يا ريت حد يكون معاه البرافو و مامن عليها يقولي و يقولي بيدفع قسط كام كل سنة؟

افضل شركة هى شركة قناة السويس ودى التوكيل بيتعامل معاها مباشر ولو لا قدر الله فى حالة الحوادث بتسيب العربية فى التوكيل وهما بيعملوا كل حاجة وحضرتك تستلم العربية بدون اى اجراءات، هما اللى بيخلصوا كل الاجراءات مع شركة التأمين دى.
مبلغ التأمين مع قناة السويس 4%

بالنسبة للتوكيل اوماترا انا قريت فضايح عنه في المنتدى هنا و انا قالقني جدا حوار التوكيل و الاهمال اللي فيه ده هل دي حالات فردية و لا كله كده و التوكيل ده هيقرفني؟

مفيش توكيل بدون اخطاء بس الاهم هى الرغبة فى تصليح الاخطاء، واوماترا رغم المشاكل لكن هما عندهم الرغبة فى الاصلاح واحنا متابعين مع التوكيل وفى حالة وجود اى مشكلة نقدر نوصلها لمدير فيات فى مصر.

معلش يا جماعة انا طولت عليكوا اوي بس زي منتوا عارفين الواحد قبل ما بيشتري حاجة بيبقى عايز يتاكد من كل حاجة و الف شكر بجد ليكوا

مفيش اسف ولا حاجة يا فنم واهلا بيك معانا عضو واخ جديد فى قسم فيات وما تتأخرش فى اى سؤال عايز تستفسر عنه.

ادى صورة اسعار قطع الغيار يا باشا

المشاركة الأصلية كتبت بواسطة omarelsherbene

الفوانيس الى بتتحرك مع الدريكسيون موجودة من اول الفئة الى ب 147 الف pkg 5 و العربية استلام من يوم 20 ان شاء الله هايكونوا موجودين .. العربية ممتازة من كل الأتجاهات و عيبها واحد بس لكنة مهم جداً توازن العربية على ال\ريق لا يقارن بل جراند و دة عن تجربة العربية مش stable خاالص زى الجراند للأسف و معرفش لية :s !!

تمام يا عمر بس الفوانيس اللى بيتحرك مع الدركسيون دى مش موجودة فى الفئة الخامسة، موجودة فى ال150 حصان

الاتزان فعلا غريبة اوى بالذات لما تيجى تعدى على عيون القط وانت فى ملف، بس هى مش ضايعة يعنى، انت بس بتحس ان العربية بتحدف سنة من ورا.