الموضوع: موقف حصلي مع اللوجان واحكموا انتوا.

يوم الخميس اللي فات وأنا رايح أزور ناس قرايبي في الزقازيق والعربيه على الغيار الخامس لاحظت اني لما بشيل رجلي من ع البنزين الغيار الخامس بيرجع للمور ولما ادوس بنزين بيدي بنزين ع الفاضي.اديت الفتيس تاني الغيار الخامس وجربت نفس القصه حصلت.اديته الخامس كمان مره وبرضو نفس الموضوع لحد مابقى الخامس مايجيش لما أدي الغيار احس انه فاضي.قلت خلاص مش مشكله أبقى اشوف موضوع التوكيل بس اخلص مشواري.باقي الغيارات كانت بتيجي لكن مع صعوبه شديده جدا.المهم فضلت ماشي ع الرابع لحد ماوصلت وركنت العربيه وطلعت قعدت مع الناس ونزلنا هناخد العربيه مشوار نزلت بادي الغيارات لقيت الأول والتاني بس اللي بييجوا بالعافيه والتالت والرابع مكلبشين ومابيجوش لاهم ولا المارشدير.سبت العربيه ف مكانها وطلعت اتصلت بتوكيل رينو قالولي طيب هات العربيه قلتلهم اجيبها ازاي والفتيس واقع.انا كنت عامل حسابي اني هرجع م الزقازيق ف نفس اليوم لما كلمت التوكيل قالولي مفيش مهندسين صيانه دلوقتي ادوني كبير الفنيين عندهم او حاجه زي كده من اسلوبه باين فعلا انو كان فني وواضح انه مش قادر يفهم اللي بقوله،المهم رجعت تاني لخدمة العملا قالولي ان مفيش صيانه جمعه ولا سبت ووصلوني بمسؤول الونش عشان ييجي يشيل العربيه.المهم قلت لمسؤول الونش انه ييجي يوم الاحد الصبح على اساس المشكله تتزبط يعني يوم الاحد،المهم قاللي تحت امرك ياباشا وبتاع شويه لقيته بيكلمني بيقوللي اني ابقى احاسب السواق طبعا انا ضحكت وقلتله طب عايز كام؟قاللي 550 جنيه قلتله بص لا ماتجيش.استنيت في الزقازيق لحد يوم السبت كلمت توكيل رينو تاني خدمة العملا ماكانش عندهم فكره انا بقول ايه بس هم كانوا ناس ذوق صراحه.طبعا انا كان دمي محروق واصريت اني اكلم مدير الصيانه شخصيا قالتلي انه يوم سبت وانه مش موجود وبتاع طبعا انا انفعلت قالتلي طيب يافندم انا هوصلك بيه بس هو بيصلي دلوقتي المهم قفلت معاها بعدين هي رجعت اتصلت بيا وخلتني اكلم باشمهندس محيي مدير فرع صيانة العبور الراجل ذوق جدا ومحترم ومتفهم شرحتله الحدوته طبعا قاللي الونش لما يجيلك ماتحاسبوش احنا اللي هنحاسبو سألني هل العربيه اتخبطت منك من تحت وانت ماشي قلتلو لا ابدا العربيه مره واحده الغيار بيفك قاللي لو العربيه مش مخبوطه من تحت يبقى ماتقلقش احنا اللي هنحاسب الونش،وطمنني قاللي مفيش داعي تيجي تعمل جوب اوردر للعربيه كان ذوق جدا صراحه ومتعاون طبعا شكرته تاني يوم الساعه سبعه الصبح لقيت مسؤول الونش بيكلمني بيقولي ان السواق جايلي في السكه المهم الونش وصل والسواق خد العربيه طلب مني اكراميه طبعا لما طلبها دمي اتحرق ماكانش ف جيبي الا 25 جنيه كان بقالي يومين ف الزقازيق المهم طلعت من جيبي اديته 10 جنيه لقيته بيقولي ايه ده ياباشا مشوار من مصر للزقازيق ب10 جنيه قلتلو انا كل اللي معايا 25 جنيه صراحه السواق كان تعاملو مش مريح عامة هو قاللي خلاص ياباشا خلي ال10 جنيه وبتاع.المهم لقيت واحده من خدمة عملا رينو بتتصل بتسألني لو كان الونش وصل وقلتلها وصل.المهم آخر النهار اتصل فرع العبور بأخويا قالوله ان العربيه جاهزه ممكن آجي استلمها ف اي وقت رحت يوم الاتنين اخدتها طبعا رحت مواصلات من بنها ماكانش معايا عربيه وعشان اوصل للمدينه الصناعيه في العبور ماكانش فيه مواصلات من اول العبور للمدينه الصناعيه وطبعا مش معايا العربيه لما كلمت التوكيل قبل مااروح استلم العربيه طلبت انه يعني ياريت مثلا استلم العربيه ف شبرا او وسط البلد قالولي للأسف يافندم مفيش خدمة توصيل طبعا مش هقولكو ع الحر الساعه كانت 3 الضهر عشان الحق استلم قبل مايقفلوا.المهم رحت واستلمت العربيه وقالولي بس كانت عصاية الفتيس مش ثابته ف مكانها استلمت العربيه وشكرت المهندس ومشيت.العربيه وانا راجع حصل موقف لقيت الكاوتشين اللي قدام وانا راجع ع الدايري من قليوب بيهووا واحده واحده لحد ماجم ع الأرض ودفعت 90 جنيه تصليح الكاوتشات واحد كان فيه 11 خرم والتاني 6 المهم العربيه دلوقتي تمام انا كنت شاكك في قصة عصاية الفتيس عشان كنت رحت قبل كده وركبت مجموعة البريك عشان عضة المارشدير فحسيت انو ممكن يكون اللي قفّل الفتيس ماقفلوش صح وهو اللي سبب اللي حصللي يعني لأنه كانت لسه خارجه من التوكيل من اقل من 10 ايام ومامشيتش فيهم 200 كيلو على بعض يعني.المهم العربيه دلوقتي تمام بس المارشدير بيعاكس شويه بس مابيعضش زي الأول صراحه.اقروا القصه وقولولي رأيكم ( قصه حقيقيه)