الموضوع: اتخبطت

اخوانى فى المنتدى زى ما قلت قبل كده هحكيلكم عن تجربتى مع الخبطة اللى اتخبطتها والتعامل فى الوكيل فى فرع أبو رواش

الفصل الأول: الجمعة 4-6-2010 الساعة 11:00 ص
واقف تحت البيت فى امان الله والعربية متغطية وكنت حاططها عمودية على الرصيف وقاعد بشتغل على الكمبيوتر وهب سمعت هبده محترمة فى الشارع وانذار اشتغل طلعت أبص وعينى أول ما رمت كانت على عربيتى وماكنتش مصدق ان اللى حصل ده حصل معايا
فوجئت أن عربية اسبرانزا داخله بوشها فى زاوية الاكصدام عندى من ناحية الشمال ومن قوة الخبطة العربية بتاعتى لفت حوالى 40 درجة ولبست من ناحية اليمين فى باب عربية بيكانتو واقفة جنبيها
ثوانى ولقيت العربية الاسبرانزا جريت وأنا كمان جريت على الشارع والجيران منهم اللى لقط رقم العربية ومنهم اللى قالى ان اللى سايقها كان واحدة ست ونزلت منها واختفت بين العمارات ومن هنا لهناك اتضح انها جارة لينا فى عمارة قريبة
المهم كشفت العربية لقيت الاكصدام الشمال خرج من مكانه من ناحية الخبطة وحصلت فيه كسرة صغيرة وشوية تطبيقات والفانوس الشمال اتكسر والرفرف الشمال اتنى لبره شوية بدون تجريح وفانوس الضباب الشمال برضه اتفشفش
من ناحية اليمين مش قادر أشوف علشان لسه عربيتى داخلة فى باب البيكانتو

المهم دورت على صاحب العربية البيكانتو وطلعت على القسم وعملت المحضر ورجعت بأمين علشان المعاينة، ولما رجعت لقيت صاحبة العربية الاسبرانزا سايبة خبر عند أمن العمارات وطلبناها ونزلت وقعدت تعتذر ومستعدة لأى تكاليف والحمد لله أنى مأمن على العربية، وهيلا بيلا بعدنا البيكانتو شوية علشان صاحبها يقدر يخرجها وبالفعل وبابها كان اتطبق تماما لجوه وسبحان الله عندى ولا أى حاجة سوى شرخ فى الفانوس اليمين

جربت أفتح الكبوت عندى والحمد لله فتح عادى وماحصلش فيه أى خسائر وبصيت على حوض الماتور شغال مافهوش مشكلة بصيت ناحية العجلة الشمال لقيت الكارتيره اتنت وضغطه على العجلة
جربت أشغل العربية الحمد لله مافيش مشكلة وصوت الماتور سليم وتشييكات الكمبيوتر مافهاش مشكلة

الفصل التانى: الأحد 6-6-2010
بعد محاولات قدرت ابعد الكارتيرة عن العجلة وأتحرك بالعربية لغاية الوكيل فى أبو رواش وطلبت مقايسة وكان هناك اللى بيستقبل الحاجات دى مهندس اسمه سلطان فالراجل قالى لو حاجات خارجية أعملك المقايسة علطول ولكن فيه احتمال ان فيه حاجات فى العفشة فلازم أسيب العربية يومين على مايخلصوا المقايسة وكمان خطر أمشى بالعربية كده لايكون حصل حاجة فى المساعدين أو المقصات قلتله أنا معايا مراتى وبنتى والرجوع من هنا من غير العربية بيهم هيكون مشكلة وبصراحة كمان المفروض أسافر كمان اسبوع والدنيا مدربكة معايا.... الراجل طلع قمة فى الزوق وقالى طيب على الأقل هدخلها ظبط زوايا ومنها هنشيك على العفشة والباقى حاجات ظاهرة ممكن أكتبهالك فى المقايسة قلت ماشى

قعدت مستنى حوالى 4 ساعات خلالها بصيت على العربية من بعيد لقيتهم أولا بيقيسوا زوايا وشوية خدوها على بره الوكيل على الطريق ورجعوا تانى وغيروا مكان العجل وشيكوا عليها تانى

وقفت شوية مع اللى بيغير مكان العجل وسألته؟ لقيته قالى الحمد لله الزوايا سليمة والعربية مافهاش مشكلة... الحمد لله

خلصت العربية ولقيتهم كمان غاسلينها من بره وجوه على السريع كده وقفت مع المهندس سلطان وكتب المقايسة وكانت الآتى
فانوسين، فانوس ضباب، اكصدام أمامى، صدر اكصدام، كارتيره عجلة شمال ، حامل فانوس صاج
قلتلوا يعنى مافهاش مشكلة أمشى بالعربية قالى لأ سليمة، سألته الحاجات دى بالمصنعية تعمل كام
فانوسين 1000 *2
فانوس ضباب 450
اكصدام 1200 وصدر زيه تقريبا
كارتيره حوالى 200
والباقى شوية فبر وكاوتشة فانوس ضباب 150
والمصنعية من 1000-1200
يعنى الاصلاحات داخله بدون الضريبة على 6400

المهم رحت أدفع ضبط الزوايا لقيتهم بيقولوا مافيش مطالبة ... غريبة ؟؟
رجعت للمهندس سلطان قالى علشان احنا شيكنا بس على الزوايا وماطلعش فيها مشكلة والعربية لسه بقالها شهرين... طبعا شكرته جدا وخصوصا ان الراجل ومن ملاحظتى ليه وأنا هناك شعلة نشاط ... تقريبا مابيرتحش ثانية

أخدت العربية وروحت على أساس انى هسافر وبعد اسبوع أجيبها للتصليح

الفصل الثالث: الاثنين7-6-2010
رحت على شركة التأمين واديتهم المقايسة المبدئية وعملت اخطار حادث وفوجئت انهم بيقولوا كان لازم أسيب العربية فى الوكيل لأنها من لحظة اخطار الحادث غير مغطاه تأمينيا بمعنى لو حصلها حاجة لاقدر الله وهى معايا هم مايعرفونيش، الكلام ده بصراحة دربك كل حساباتى

الفصل الرابع: الأربعاء 9-6-2010
استخرت ربنا وقررت انى اسلم العربية فى الوكيل علشان تاخد دور والمهندس سلطان قالى انها بتستنى حوالى اسبوع وبعديها حوالى اسبوع تصليح ويومها مهنس التأمين جه ومضى على المقايسة بس ده حصل بعد ماكنت روحت
وكنت أخدت نمرة تليفون أبورواش علشان أعرف المقايسة رسيت بالظبط على كام والميعاد المتوقع للتسليم ولحد الآن أنا مش قادر أعرف

الخلاصة حتى الآن:
- الحمد لله على كل شئ.

- المهندس سلطان فى الوكيل بأبو رواش راجل يستحق التحية بصراحة سواء على نشاطه أو أسلوبه فى معاملة العملاء وخصوصا فى ظل الضغط الرهيب اللى عليه.

- بصراحة السيراتو عليت قوى فى عينى أكتر واحترمتها أكتر لأن اللى سمع الخبطة وشاف العربية وهي لفه 40 درجة من شدة الخبطة يقول العربية اتبهدلت، وعلى رأى واحد قريبى اللى بعد ماسمع تفاصيل الحادثة منى وجه بص على العربية ماصدقش لأن اللى يشوفها هيقول كسر فانوس وشوية تجريحات فى الاكصدام من اللى بتحصل فى شوارعنا عادى، وبكلمة قريبى ده ان العربية بسم الله ماشاء الله طلع عضمها ناشف

- أسعار قطع الغيار نار فى الوكيل.

-الحاجة كمان اللى مضايقانى انى مش قادر أعرف موقف عربيتى.. لأنى اتصلت الخميس كذا مرة قالولى انها فى التحميل -انتظار الدور- طب الدور ده امتى ... لسه، طب مقايسة الاصلاح وخصوصا المصنعية انتهت على كام فى الاتفاق مع مهندس التأمين ... لسه

الفصل الخامس: برضه لسه
ادعولى تخلص المسرحية على خير