عملت حادثه .. كلاكيت تانى مره !!
أولا وحشتونى جدا و اسف على عدم وجودى بالمنتدى الأيام السابقه و لكن لى عذر و هوه انى عملت حادثه بعربيتى الجديده ( ريتمو موديل 79 و 1500 سى سى ) طبعا هتسألوا طيب عربيتى الأرجنتا راحت فين ؟ أحب أقولكوا ان والدى صلحها و مرضيش يرجعهالى و أعطانى عربيته عشان يعلمنى الأدب ( أصل أنا بكره حاجه اسمها جر أمامى كبالن يعنى و طبعا الريتمو على كبالن )
المهم من فتره كنت راجع أنا و واحد صاحبى من المهندسين و ماشى على طريق أوسيم - البراجيل الطريق ده فيه وصلتين واحده ضيقه و واحده واسعه الوصله الضيقه بيسموها وصلة الموت لكثرة الحوادث اللى بتحصل عليها .. المهم أنا ماشى فى حالى و لقيت نور جامد أوى جاى فى المقابل قمت محضن على الترعه اللى على يمينى عشان معرفش حجم العربيه اللى جايه و كانت الساعه 2 بالليل و على فكره الوصله دى مفهاش نور و مفيش رصيف بين الحارتين بتوعها ... المهم النور قعد يقرب منى و أنا مش شايف أى حاجه من الطريق و بعد ما العربيه عدت لقيت نفسى هقع فى الترعه اللى على يمينى لان الطريق مش كله مستقيم قمت جيت سنه شمال و العجل اليمين عندى كان داس فى الطينه اللى جنب الترعه و بعدين لقيت العربيه لفت و تقريبا خبطت الاكصدام الخلفى بتاع العربيه اللى جايه فى المقابل و قمت داخل فى شجره و عامود بجنب العربيه اليمين ( ناحية صاحبى )
النتيجه :-
رجل صاحبى الشمال اتكسرت كسر مضاعف و تم عمل جبس من أول الفخد لحد القدم و حصله شرخ فى كتفه اليمين و 6 غرز ورا ودنه اليمين
بالنسبالى أنا تقريبا محصليش حاجه يعنى حبة جروح و كدمات فى جسمى كله و وجع فى رقبتى و ظهرى قعد أسبوع و حاليا مفيش وجع