لملاك الهاتشباك..هل تشعرون بالأمان في سياراتكم؟

**misho2223** · 14-02-2008 08:47 AM

صباح الخير لكل الأعضاء المحترمين

وانا رايح الشغل كل يوم باعدي على واحد سمكرى بلاقى قصاده عربيات كتير عاملة حوادث جامدة
جدًا، وواضح انه متخصص في تجديد العربيات اللى بتبقى متبهدلة بالشكل ده

طبعا حاجة بتسد نفس الواحد من السواقة اساسا بس ربنا يسترها معانا

النهاردة شفت لادا 2105 مخبوطة من ورا خبطة بشعة ، والشنطة بتاعتها ضاعت تماما، اتعجنت ولا كأن كان فيه شنطة من الأساس

وطبعًا اللى يعمل كده فى لادا بقوة صاجها وشنطتها الكبيرة يبقى مش أقل من نقل أوأتوبيس أو دبابة M1A1

والكلام ده عن تجربة طبعًا لأن عربية والدي 2107 واما بسوقها حتى الميكروبصات الرمسيس اللى بتبقى معمولة من صفايح الزبالة بتخاف منى وتوسعلى

المهم المنظر ده الحقيقة حيرني جدًا وهيخليني استبعد أي عربية هاتشباك من قايمة العربيات اللى باقارن بينها عشان اشتريها مهما كانت حلوة وواسعة زي السيدان وسعرها معقول زي السيريون أو الجيتز

يعني أنا دلوقتي مش متجوز، ولو جبتها هاتشباك مش هتفرق لأن مفيش غيرى اللى هيركبها، بس أكيد في يوم من الأيام هتجوز واخلف بيبي صغير، وساعتها ناوى اعمل زي الناس المحترمين اللى بيجيبوا car seat ويركبوه في الكنبة الخلفية ويقعدوا ولادهم فيه

مش الجهلة اللى تلاقيهم سايقين أفخم عربيات وتلاقى الواحد ماسك ابنه البيبي ومقعده على حجره وممسكه الدركسيون وهو ماشى، ومراته جنبه بتضحك وفرحانة بالهبل اللى هما فيه

طبعًا أنا اتخيلت منظرى لو معايا هاتشباك وحصلتلى حادثة زي دي وعربية دخلت فيا كده من ورا (وده وارد الحدوث طبعًا فى مصر:o)

خصوصًًا أن طريقي كل يوم أوتوستراد رايح جاى وده مليان عربيات نقل فى كل وقت
والحادثة دى برضه قالولى انها حصلت اوتوستراد

واتخيلت لو لا قدر الله كان ابني أو بنتي كانوا قاعدين ورا وقت الحادثة
أو حتى حد كبير وبالغ ماهو هيتأذي جامد برضه ده لو مماتش أساسا لاقدر الله طبعًا

يعني بصراحة انا النهاردة زاد احترامي للعربيات السيدان جدًا واللادا بالذات
لأن أكيد لو كان فيه ناس راكبة ورا وقت الحادثة دي فالشنطة دي أكيد أكيد انقذت حياتهم

سؤالى لملاك الهاتشباك، أيا كانت نوعها :

هل حضراتكم مفكرتوش فى الاحتمال ده وانتو بتشتروا العربية؟

ولو كنتم فكرتم فيه وفضلتم الهاتشباك برضه فإيه الأسباب؟

وهل أنتم حاسين بالأمان فعلًا فى عربياتكم أما بتركبوا فيها أي حد فى الكنبة الخلفية؟

وشكرًا جزيلًا وأرجو أني مكونش ضايقتكم على الصبح كده :)

**ahmedateya** · 14-02-2008 08:56 AM

قبل كده دخل و,احد فية من ورا و كان ساعتها معايا بونتو و لقيت الكنبة في ضهري مفرومة
ودي فعلا وجهة نظر حقيقية مش خدعة

**Khalid_Mostafa** · 14-02-2008 09:17 AM

طبعاً انتا معاك حق نسبياً بس العربيات الهاتشباك بيبقي فيها شنطه برضه بس مش كبيرة .ده من ناحية من ناحية تانيه ساعت الحادثه لا قدر الله اغلب الناس بتصاب او تموت من رد فعل الصدمه علي الجسم + ارتطامهم بحاجات ادمهم زي العجلة القيادة او الزجاج ومن هنا جاء إستخدام حزام الأمان و الأير باج . اما عشان تعدي من الشنطه و توصل للكنبه فلازم تكون العربية وقفه و مشدود الهند بريك (مع انه حتتزحلق لأدام برضه)
ولذلك انا مشفتش اختبارات تصادم للسيارات من الخلف ..فقط من الأمام و الجنب
وإذا كان الموضوع بالشكل ده فيبقي كمان الفان و الميني فان ينطبق عليهم نفس الكلام
غير كده احنا هنا في مصر مش بنهتم بالأمان صحيح ولكن اوروبا و امريكا الموضوع بالنسبة لهم يمكن نمره واحد ومع ذلك بتجد العربيات الهاتشباك منتشره هناك .
وفي الأخر ربنا الي بيسلم و يكفينا و يكفيك شر الحوادث الي من النوع ده

**major_memo** · 14-02-2008 09:25 AM

بص يا ميشو هيا وجهة نظر كويسة بس هقولك العربيات الهاتش باك ليها طابع رياضي كويس يعني انا مثلا معايا الجوليت وفضلتها علي لانسر 2001 طبعا الكل هيقول غلطان بس معلشي هيا اذواق انا بحب العربيات الرياضية وشكلها انسيابي والعربيات الهاتش باك كلها ذو طابع رياضي يعني لو حسبتها من وجهة نظر الخطر بس يبقي مش هتركب هاتشباك فعلا
بس معظم العربيات الجديدة سواء هاتش باك او سيدان الصاج بتاعها مش زي الادا انا كان معايا كيا برايد دخلت فيها في 128 قسمتها نصين والعربية اتدغدغت وانا الحمد لله اكصدام ورد صدر العربية حاجة بسيطة وشوفت في التوكيل قبل كدة عربية كيا ريو الشنطة داخلة لحد الكرسيين الي قدام وسالت ولاقتها خبطة في اتوبيس
فبص هوا قدر لو راكب لموزين ومكتوب تموت في حادثة وانت الي سايق هتلاقي اليموزين دخلت في بعضها لحد ما تجيلك ؟؟
وشكرا علي الموضوع يا ميشو

**Islam_galal** · 14-02-2008 11:09 AM

ملحوظة : اللادا الجديد و المصري طبعا اكيد الشنطة زي متكون ملزوقه بصمغ ورق

شوفت ليها كذا حادثة و بتكون بسيطة و اللاقي الشنطة زي متكون اتقطمت

**Ghamrawy** · 14-02-2008 12:03 PM

يا جماعة دلوقتى غير زمان ايام اللادا و 131 و 132 دلوقتى فى حاجة اسمها مناطق امتصاص قوة الصدمة (مناطق انهيار) سواء من الامام او الخلف و الغرض من ده كله منع و صول اثار و تبعات الصدمة للركاب و العبرة فى النهاية بحالة الركاب بعد الحادث سواء من الامام او الخلف و مش مهم منظر العربية و حالتها لانها كده بتكون قامت بدورها فى حماية الركاب و بتترمى و نيجى احنا فى مصر نستورد و نقطع و نلزق تانى.

**أبو عبدالله** · 14-02-2008 02:27 PM

المشاركة الأصلية كتبت بواسطة gemino

يا جماعة دلوقتى غير زمان ايام اللادا و 131 و 132 دلوقتى فى حاجة اسمها مناطق امتصاص قوة الصدمة (مناطق انهيار) سواء من الامام او الخلف و الغرض من ده كله منع و صول اثار و تبعات الصدمة للركاب و العبرة فى النهاية بحالة الركاب بعد الحادث سواء من الامام او الخلف و مش مهم منظر العربية و حالتها لانها كده بتكون قامت بدورها فى حماية الركاب و بتترمى و نيجى احنا فى مصر نستورد و نقطع و نلزق تانى.

كلام مظبوط
في حاجه اسمها نقط انهيار بتبقى في اماكن محدده
بتمتص هيا الصدمة

زي بالظبط لما تشوف الكراش تست بتاع الميكروباص التويوتا الهاي ايس بالظبط
اهو مفيهوش وش خالص ولا في اي حاجه بين الكابينه وبين وش العربيه غير التابلوه والكراش تست بتاعه واخد 4 نجوم تقريبا او خمسه لأن السائق واللي جمبه محصلهمشي حاجه

**Ghamrawy** · 14-02-2008 02:32 PM

[كلام مظبوط
في حاجه اسمها نقط انهيار بتبقى في اماكن محدده
بتمتص هيا الصدمة

زي بالظبط لما تشوف الكراش تست بتاع الميكروباص التويوتا الهاي ايس بالظبط
اهو مفيهوش وش خالص ولا في اي حاجه بين الكابينه وبين وش العربيه غير التابلوه والكراش تست بتاعه واخد 4 نجوم تقريبا او خمسه لأن السائق واللي جمبه محصلهمشي حاجه]
الله ينور عليك يا ابو عبد الله

**misho2223** · 14-02-2008 08:12 PM

مساء الخير...

شاكر جدًا لتفاعل حضراتكم مع الموضوع

الحقيقة النهاردة -ولسخرية القدر- واحد صاحبى عايز يشترى عربية جديدة هو كمان عدى عليا بعد الشغل وخدني فرع دايهاتسو فى مدينة نصر

وياريتني مارحت :(

دي كانت أول مرة أشوف السيريون فيها عن قرب
ومخي رجع يلف ويدور تاني

إيه ده يا جدعان

هو فيه كده؟

يخرب بيتهم فعلا ً

أنا مذبهل وده أقل وصف

العربية جميلة جدًا جدًا جدًا

جمال فاجر مش جمال عادي تشوفه تقول "اه كويسة مش بطالة"

ده حاجة تشوفها تبقى عامل كده بالظبط

وواسعة جدًا جدًا جدًا جدًا من هنا لبكره

أنا طولي 195 سم
وركبى بتتحشر فى أي عربية وبتبقى لازقة فى الدركسيون
ده غير أن مقاس رجلي كبير فى الأحذية

وبالتالى لو عربية فيها مسافات قصيرة بين الدواسات بادوس فرامل وبنزين مع بعض

مكانش فيه عربيات بتريحني غير عربيتي القديمة ال131
وعربية والدي اللادا بفضل تصميمها المكعب العظيم طبعًا :D

إنما لا لانوس ولا فيرنا طبعًا
الكليو والنيو أكسنت والأفيو ممكن بس ارجع الكرسي لورا للأخر وانسى ان حد يقعد ورايا

دخلت ست الحسن والجمال دي النهاردة

والصدمة الأولى أني مكنتش محتاج ارجع الكرسي للآخر
وكنت مرتاح جدًا وركبي مش خابطة فى التابلوه أو الدركسيون

بس رجعته غتاتة :D
ونزلت اركب ورا اشوف لو انا مرجعه للأخر حد هيعرف يقعد ورايا ولا لأ

لقيتني قاعد مرتاح برضه

يعني العربية بلا مبالغة ممكن تشيل تلاتة نفس طولى مستريحين فى الكنبة الخلفية

أنا كده قدامى حل من اتنين

يا اتجوز واخلف...

يا اجيب العربية دي ومركبش فيها حد :D

وأنا ميال دلوقتى للاختيار التانى :D

بس بصراحة برضه هيا فيها عيوب
حكاية الهاتشباك دي اللى ناقشناها

وقطع الغيار الغالية اللى اسعارها محطوطة هنا فى منتدى دايهاتسو
أو على الأقل أنا شايفها غالية

بس متهيألى دي ضريبة الياباني برضه

ونقطة تانية قالها عضو هنا في موضوع قديم عن العربية
وفعلاً شفتاه بعينى النهاردة

حوض الموتور صغير جدًا جدًا ولو اتخبطت من قدام الموتور هيتأذي جامد

وجديًا أنا بافكر فى حل شفته فى عربية سيريون بتركن دايمًا قصاد شغلى
الراجل مركب ورا وقدام قضبان نيكل زي بتاعة الماتريكس بس على أصغر طبعًا

بس الحقيقة مش عارف دي تقدر فعلًا تحمي الموتور وجسم العربية من ورا ولا لأ؟
وياريت لو حد يقدر يفيدنى فى الموضوع ده

إنما بصراحة بصراحة يا أستاذ أبو عبد الله
أنا النهاردة بس فهمت ليه حضرتك أكتر واحد من اللى قريتلهم هنا مبسوط وراضى عن عربيته
وبتدافع عنها بقوة

العربية تستاهل فعلا

وربنا يبارك لحضرتك فيها
ويكفيك أي شر وانت راكبها أنت وأسرتك

اظرف شيء أن بعد ما خرجنا واحنا مذبهلين
صاحبى كان متفق معايا اننا نروح معرض تانى عشان يشوف الجيتز ويقارن بينها وبين السيريون

بعد ماركبنا العربية واحنا سرحانين وموهومين
لقيته اوتوماتيك كده بيلف بالعربية وراجع لسكة البيت مش المعرض اللى كنا رايحينله

بصيتله وابتسمت وقلتله هو احنا مش هنروح نشوف الجيتز؟ :o

بصلى لثانية عبال ما فهم
واتفتحنا فى الضحك احنا الاتنين :D

مع خالص احترامي طبعًا لملاك الجيتز وارجو انهم ميزعلوش منى :)

وخالص تحياتي لحضراتكم

**OlaOsman** · 14-02-2008 11:13 PM

المشاركة الأصلية كتبت بواسطة misho2223

مساء الخير...

شاكر جدًا لتفاعل حضراتكم مع الموضوع

الحقيقة النهاردة -ولسخرية القدر- واحد صاحبى عايز يشترى عربية جديدة هو كمان عدى عليا بعد الشغل وخدني فرع دايهاتسو فى مدينة نصر

وياريتني مارحت :(

دي كانت أول مرة أشوف السيريون فيها عن قرب
ومخي رجع يلف ويدور تاني

إيه ده يا جدعان

هو فيه كده؟

يخرب بيتهم فعلا

ً

أنا مذبهل وده أقل وصف

العربية جميلة جدًا جدًا جدًا

جمال فاجر مش جمال عادي تشوفه تقول "اه كويسة مش بطالة"

ده حاجة تشوفها تبقى عامل كده بالظبط

وواسعة جدًا جدًا جدًا جدًا من هنا لبكره

أنا طولي 195 سم
وركبى بتتحشر فى أي عربية وبتبقى لازقة فى الدركسيون
ده غير أن مقاس رجلي كبير فى الأحذية

وبالتالى لو عربية فيها مسافات قصيرة بين الدواسات بادوس فرامل وبنزين مع بعض

مكانش فيه عربيات بتريحني غير عربيتي القديمة ال131
وعربية والدي اللادا بفضل تصميمها المكعب العظيم طبعًا :D

إنما لا لانوس ولا فيرنا طبعًا
الكليو والنيو أكسنت والأفيو ممكن بس ارجع الكرسي لورا للأخر وانسى ان حد يقعد ورايا

دخلت ست الحسن والجمال دي النهاردة

والصدمة الأولى أني مكنتش محتاج ارجع الكرسي للآخر

وكنت مرتاح جدًا وركبي مش خابطة فى التابلوه أو الدركسيون

بس رجعته غتاتة :D
ونزلت اركب ورا اشوف لو انا مرجعه للأخر حد هيعرف يقعد ورايا ولا لأ

لقيتني قاعد مرتاح برضه

يعني العربية بلا مبالغة ممكن تشيل تلاتة نفس طولى مستريحين فى الكنبة الخلفية

أنا كده قدامى حل من اتنين

يا اتجوز واخلف...

يا اجيب العربية دي ومركبش فيها حد :D

وأنا ميال دلوقتى للاختيار التانى :D

بس بصراحة برضه هيا فيها عيوب
حكاية الهاتشباك دي اللى ناقشناها

وقطع الغيار الغالية اللى اسعارها محطوطة هنا فى منتدى دايهاتسو
أو على الأقل أنا شايفها غالية

بس متهيألى دي ضريبة الياباني برضه

ونقطة تانية قالها عضو هنا في موضوع قديم عن العربية
وفعلاً شفتاه بعينى النهاردة

حوض الموتور صغير جدًا جدًا ولو اتخبطت من قدام الموتور هيتأذي جامد

وجديًا أنا بافكر فى حل شفته فى عربية سيريون بتركن دايمًا قصاد شغلى
الراجل مركب ورا وقدام قضبان نيكل زي بتاعة الماتريكس بس على أصغر طبعًا

بس الحقيقة مش عارف دي تقدر فعلًا تحمي الموتور وجسم العربية من ورا ولا لأ؟
وياريت لو حد يقدر يفيدنى فى الموضوع ده

إنما بصراحة بصراحة يا أستاذ أبو عبد الله
أنا النهاردة بس فهمت ليه حضرتك أكتر واحد من اللى قريتلهم هنا مبسوط وراضى عن عربيته
وبتدافع عنها بقوة

العربية تستاهل فعلا

وربنا يبارك لحضرتك فيها
ويكفيك أي شر وانت راكبها أنت وأسرتك

اظرف شيء أن بعد ما خرجنا واحنا مذبهلين
صاحبى كان متفق معايا اننا نروح معرض تانى عشان يشوف الجيتز ويقارن بينها وبين السيريون

بعد ماركبنا العربية واحنا سرحانين وموهومين
لقيته اوتوماتيك كده بيلف بالعربية وراجع لسكة البيت مش المعرض اللى كنا رايحينله

بصيتله وابتسمت وقلتله هو احنا مش هنروح نشوف الجيتز؟ :o

بصلى لثانية عبال ما فهم
واتفتحنا فى الضحك احنا الاتنين :D

مع خالص احترامي طبعًا لملاك الجيتز وارجو انهم ميزعلوش منى :)

وخالص تحياتي لحضراتكم

كل يوم بيزيد اعجابي بست الحسن و الجمال دي بالرغم من ناس كتير بيخوفوني منها عشان حكاية الانتشار دي و سعر إعادة البيع.. انما انا شايفة ان ما دام عدد المبهورين بيها في تزايد ففي أمل ان شاء الله ان حكاية قلة الانتشار دي ما تبقاش موجودة و تاخد ست الحسن و الجمال حقها بأه في البلد دي