رعشة فى الموتور تستمر بعد التبطيل

السلام عليكم ورحمة الله وبركاته
الاخوة الاحباب
بعد ما ببطل العربية الموتور بيفضل شغال لثوانى وبيرعش كده بصوت عالى بيخلى الناس تقعد تتفرج عليا
ظبطت كهربا وكانت عاليه شويه بس برده نفس الحكايه
الكونتاكت كان باظ قبل كده وجبت واحد جديد ومريحنيش فركبته شويه لحد ماصلحت القديم وركبته
فهل ممكن يكون من الكونتاكت؟ والا فى سبب تانى؟
مع بداية الموضوع ده العربية بتسخن جامد بتوصل ل 90 فى اقل من 10 دقايق رغم ان الزيت والميه تمام
حاسس ان الموضوع سهل بس للأسف ميكانيكية وكهربائية مصر بعافيه شويه
عايزين الواحد يروح يقولهم غير كذا او اعمل كذا وخلاص
ياريت الاقى حل معاكم للموضوع ده
العربية فيات 132 2000 سى سى
اخوكم
ابو احمد

سخونية العربية شىء غريب ويقلق بصراحة حاول تظبت التاكيهات وتكشف على دورة المية
اما بالنسبة للرعشة بعد التبطيل فبعد تظبيتك لكهربة العربية خلى الميكانيكى يظبتلك هوا الماتور

كهربا زيادة ......دى للرعشة

اكشف على الرياداتير ممكن يكون مسدود
وربنا معاك

الرعشه دي أكيد كهرباء زياده ودي أمرها سهل أى كهربائي يظبطهالك

السخونية ممكن يكون فى مشكله فى دوره التبريد شوف الرادياتير ممكن يكون مسدود

شكرا يا شباب على الرد
بس انا فعلا مظبط كهربا
ومش عارف بقى موضوع التاكيهات ده هايفيد وال لا

اقتباس:

---

الكونتاكت كان باظ قبل كده وجبت واحد جديد ومريحنيش فركبته شويه لحد ماصلحت القديم وركبته
فهل ممكن يكون من الكونتاكت؟ والا فى سبب تانى؟

---

ممكن يكون القديم أتصلح أى كلام

والمفروض تجرب كونتاكت تانى

وخصوصا لو كانت الظاهره بتاعة أستمرار الدوران مع التبطيل دى ( شكواك الحاليه )

مكنتش موجوده مع الكونتاكت الجديد اللى مكنش مريحك

اقتباس:

---

المشاركة الأصلية كتبت بواسطة samirayad

ممكن يكون القديم أتصلح أى كلام

والمفروض تجرب كونتاكت تانى

وخصوصا لو كانت الظاهره بتاعة أستمرار الدوران مع التبطيل دى ( شكواك الحاليه )

مكنتش موجوده مع الكونتاكت الجديد اللى مكنش مريحك

---

تسلم يا باشمهندس سمير
هى فعلا المشكله ماكنتش موجوده فى الكونتاكت الجديد
بس مشكله الجديد ان مفتاحه كانت الشرشرة فيه من جهة واحده فكان بيعذبنى على ما بعرف ادخله فى الكونتاكت
هى دى بس مشكلته المقرفه رغم بساطتها
اما القديم فمفتاحه بيدخل فى اى اتجاه لانه مشرشر من الناحيتين عشان كده صلحته وركبته تانى