بعت عربيتى من سنة و3 شهور وعيزة حد يفكرنى بسرعة قبل ماستلم العربية الجديدة ان شاء الله لأنى خايفة اكون نسيت واخبطها
عرض للطباعة
بعت عربيتى من سنة و3 شهور وعيزة حد يفكرنى بسرعة قبل ماستلم العربية الجديدة ان شاء الله لأنى خايفة اكون نسيت واخبطها
شوفى مدرسة قيادة وقوليلهم عاوزة حصص سواقة عادية وانك معاكى رخصة و بتسوقى والافضل انك تشوفى مركز فيه عربيات جديدة
okا نا عيزة عنوان دى المنصورة يعنى مبلاقيش اي حاجة اعوزها اصلا
مفيش حد من قاريبك أو أصحابك عنده عربية خالص؟
أولا الف مبروك على العربية الجديدة ومتنسيش تقولى دعاء الحاجة الجديدة ((اللهم انت رزقتنى من غير حول منى ولا قوة اللهم ارزقنى خيرها وخير ما صنعت له وابعد عنى شرها وشر ماصنعت له ))
ثانيا فى مركز فى الجلاء قريب من كلية الاداب اسمة رايت ممكن يعمل الحكاية دى بسهولة مفيش مشكلة وابقى اعملى لينا تقرير عن العربية الجديدة
الله يبارك فيك بس حكاية التقرير دى موعدكش انا مش شاطرة للدرجة دى
في واحد اسمه شتا في اداب تقريبا ... واقولك على حاجه احسن من كده بكتير واسهل
شوفي اي سواق تاكسي واتفقي معاه .. هتلاقي الموضوع سهل ومش هيمانعو وشوفي هياخد كام في المره بس مش هياخد كتير يعني .. اعتقد 25 او 30 جنيه ومدام انتي اصلا بتسوقي يبقى مش هتحتاجي كتير
المراكز دى طلعت ؟--××؟ اتصلت بمركز كان كاتب فالوسيط الساعة ب 20 ج اقولهم معايا رخصة وبسوق بقالى 7 سنين يقولو ملناش دعوة هو الكورس ب 200 ج دانا لما اتعلمت مدفعتش 200 ج!!
و اسأل امال ال20 ج اللى كاتبينه دى ايه يقولوا ده تعليم اختبار القراطيس بتاع المرور بس
محمد امين
0103937733
هو صاحبى اصلا وعلم ناس هنا فى المنتدى (فردين او تلاتة تقريبا)
هو امين جدا ومؤدب وشاطر اوى اوى فى التعليم
ومادام انتى عندك فكرة الموضوع هيبقى اسهل كتير جدا
توكلى على الله واتصلى بة واتفقى معاة - ان شاء الله مش هتندمى -بالتوفيق
السلام عليكم
مش هايعلمك إلا سيارتك
لما تشترى السيارة الجديدة إن شاء الله ، شوفى حد بيسوق كويس وان لم تجدى فشوفى سائق تاكسى وهايفرح أوى انه هايركب ملاكى جديد
وربنا يوفقك
أنا عملت كده
انا اعرف واحد بيعلم فى مدينه السماد لانها فاضيه وطرق جميله والراجل تمام اوى
بيدى كورس 8 حصص ب 200 جنيه..... بس هو عامل نظام كويس والكل بيشكر فيه وانا شخصيا رحتله من 4 سنين
لو مهتمه قوليلى
حاجه قالهالى اللى علمنى السواقه زمان
ان السواقه ما بتتنسيش بس انتى جمدى قلبك و امشى براحه لغايه ما تتعودى على ابعاد عربيتك الجديده ربنا يباركلك فيها
ياه .......... هو الواحد ممكن ينسى السواقه !!!!؟؟؟
شكرا يا جماعة على الردود بس الواحد مش بينسى السواقة بمعنى انه مش هيعرف ينقل ويمشى بالعربية لأ مش للدرجة دى بس انا اتفقت مع واحد فعلا ولما طلعنا بعربيته لقيتنى ناسية حاجات فى الملفات وكده والأهم انى من جوايا كنت خايفة وده اللى كان لازم اتخلص منه وهو قاللى انا شايف ان ده وهم
بس انا لسه قلقانة لأن العربية هيبقى عليها اقساط وانا خايفة تتخبط بشكل مبالغ فيه
و ابعادهامختلفة تماما عن القديمة وكمان لأن مش شايفة المقدمة بتاعتها وعموما انا لسه مستلمتش
الحل
انك بعد الاستلام ان شاء الله
تشوفى اماكن فاضيه كل يوم تمشى فيها كده واحده واحده مع نفسك
لغايت ما تاخدى على العربيه وتكونى واثقه من نفسك
بصى الموضوع مش مستاهل انا من رائى السواقة عمرها ما بتتنسى انا فضلت اتعلمت السواقة وقعد مش بسوق اكتر من سنة وبعدين جبت العربية وطلعت بيها وكنت فاكر كل حاجة الاول كنت متخيل انى هنسى وهعمل حادثة بس مجرد رجلى ما اتحطت بفتكر
ممكن حضرتك تشوفى اى عربيه تبعك تطلعى بيها وقت الفطار مثلا او بليل متاخر شوية وتلفى بيها شوية هتلاقى نفسك فاكرة كل حاجة
اهلا اهلا بلدياتى ..... بصى السواقة عمرها مابتتنسى و موضوع الخوف ده فعلا وهم او حاجة نفسية كده عشانبس انك خايفة تتخبطى
عموما الف مبروك عالعربية الجديدة و ربنا يباركلك فيها و زى ماقالو الناس حاولى تنزلى مع حد قريبك او تعرفيه تلفوا شوية كده فى شوارع فاضية و انتى تفتكرى كل حاجة و الرهبة اللى عندك دى تروح
و بعدين نصيحة منى .... اللى يخاف من العفريت يطلعله .... و انتى عايشة فى مصر يعنى العربيات بتبقى واقفة و تتخبط و ده عادى جدا ده غير سواقين الميكروباصات و العربيات النقل .... عودى نفسك ماتزعليش على اى خبطة فى العربية .....
و كمان مرة الف مبروك على العربية الجديدة و ربنا يباركلك فيها و يديكى خيرها و يكفيكى شرها