فكرة مجنونة لتسقيط موتور على 504...

**kisho55555** · 15-06-2010 02:43 AM

الفكرة ببساطة .... تركيب موتور شيفى امبالا 1974 على 504 ... ياترى ممكن ؟؟؟؟

الموضوع ان انا قدامى عربية امبالا مركونة من 20 سنة وتكييف وباور وهيدروماتيك .... وصاحبها عايز يبيعها ففكرت فيها انى اشتريها واركبها وبعدها قولت ان الناس هتقعد تضحك عليا ... ففكرت فى الحاجات اللى انا عايزها منها لقيت الموتور اهم حاجة وهو موتور 8 سلندر 4500 سى سى وده بيطلع عليها 275 حصان ... بالتالى لما يركب على البيجو ممكن يطلع 300 حصان واكتر مسترسح ...

بس المشكلة دلوقتى فى قواعد الموتور والفتيس ... ممكن نحاول نعمل قواعد وقنطرة وشدادات للموتور ويركب عليها ... ولا الحوض هيكون ضيق عليها ... ؟؟؟؟

لو حد يعرف اى معلومة يقول وممكن نفكر مع بعض ممكن نعمل ايه ؟؟؟

**magyver** · 15-06-2010 02:49 AM

اية العربية الشيفي امبالا دة
ياريت صورة ؟

**osama.m** · 15-06-2010 02:55 AM

هترخص ازاي ؟

**م.محمد علاء** · 15-06-2010 03:19 AM

**amrelsaqqa** · 15-06-2010 03:20 AM

كريم باشا
انت فينك ياعم

العربية الامبالا دى سعرها كام ؟

هى الفكرة جامدة جدا بس في كذا نقطة لازم نفكر فيها

الموتور ده عشان يركب صح وتستفيد بإمكانياته هيفتح فتحة كبيرة
متهيألى لازم يركب بالفتيس بتاعه ( الفتيس اوتو مش كدة ؟ )
والمشكلة ان الفتيس و الموتور تقال جدا
وممكن تلاقى الفتيس كبير ومش هيظبط على عمود الكردان
وهتحتاج تغير الكرونة على ما اعتقد عشان تبقى سريعة وتمشى مع الفتيس الجديد
وطبعا زي مانت قلت محتاج شغل جامد في الشاسيه والقواعد وشدادات وحوارات

بالنسبة للحوض هو ممكن ياخد الموتور بالعافية بس صعب ياخد ملحقاته كلها
يعنى اكيد مثلا محتاج ردياتير ضخم جدا من الحاجات الامريكى القديمة وده مش هتلاقيله مكان في البيجو

ده غير مشكلة الترخيص اللى هنفترض انك هتحلها
و كمان في مشكلة انك مش هتستفيد من الموتور بجد الا لو عملت تغيير جذرى في عفشة وثبات وفرامل العربية وده صعب

والا هيبقى الموضوع كله مجرد سحب جنونى لحد 100 وبس على كدة وطبعا استهلاك بنزين بالهبل ودى مشكلة لوحدها

كل المشاكل دى ممكن نفكر فيهم واحدة واحدة انا مش بقفلها ولا حاجة
انا بتخيل الوضع
بس الفكرة كويسة وتستحق الواحد يتخيلها و يفكر فيها

**magyver** · 15-06-2010 04:34 AM

طيب مشكلة الترخيص اهم حاااااجة هاتعمل فيها اية
تسقيط المكنة سهل مافيش حااجة صعبة

**disha_2020** · 15-06-2010 11:05 AM

مفيش مشلكه فى الترخيص هترو المرور ترخص عربيت 3 سنين ولا حاجه قدام وروح سقط الموتور برحتك ومتشغلش باالك مفيش حد هيوقفك يقولك افح كبوتك ورينى المتور متحطش موشوع الترخيص فى دماغك المهم هينفع تنزل الموتور ده ولا لا لو ينفع تبقى بجد فكرة صايعه دنتا لو ظبط كمان الموتور شويه حاجات ممكن توصل معاك 400 حصان وانتا فاهم بقه يعنى ايه 400

**John_Samy_1** · 15-06-2010 11:29 AM

أنا حاسس إن الموتور ده هايخد العربية وهيقع بيها لقدام. ده موتور ثقيل اوي. والعربية الامريكاني بتبقى 2 طن. وبعدين ال504 الايروديناميكس بتاعتها ماتستحملش 200 حصان هتطر توطي العربية جامد عشان متعومش. بس مش عارف بقى العافشه هتستحمل ولا لأ. بص لو الChevy ديه عاجباك هاتها واعملها Restore (هتكليفك واحتمال تستوردلها حاجات مخصوص) واديها لون كلاسيك جامد وبيعها بعد كده.