الموضوع: فيكترا cdx خلاصة تجربتي معاها

السلام عليكم
بما اني اعتبر نفسي من المحظوظين الحمدلله عشان عندي فكترا B - CDX فاحب اشارك معاكوا تجربتي مع العربية:

اولا المواصفات:

وانا بتصفح هنا في المنتدى لقيت ناس كتير بتتكلم على مواصفات ال CDX وبيزودا فيها حاجات كتير مش موجودة او معلومات غلط، فانا هتكلم عن الموديل اللي هنا ف مصر:
1- العربية متجمعة في مصر مش في المانيا
2- الموديل دا بالمواصفات اللي هاقولها مخصوصة لمصر واي حاجة تانية تبقى متركبة
3- الموتور 2000 سي سي ، كود الموتور: c20sel ودا متصنع ف استراليا في شركة هولدن
4-الموتور دا نفسه كان بينزل ويتصنع في أوروبا بس وقف سنة 1999 وكان كود الموتور: x20xev
5- الفرق بينهم ان الأوروبي فيه ُEGR valve عشان التحكم في العادم، ودا مش موجود هنا
6-العربية منزلتش بفتحة سقف
7- الطارة مكنتش ملتي فنكشن
8- السي دي فيه 4 اسطوانات بس مش 6
9-الكراس تحكم يدوي ومفيش سخانات
10-المرايات كهرباء بس مبتقفلش كهرباء (الاستيراد بتركب وبتقفل كهربا)
11-التكييف مش تاتش
12- الأيرباج 2 بس مش اربعة

بالنسبة بقى للكماليات الزيادة عن ال CD :

1-فرش جلد بالكامل حتى الابواب (صنع في مصر) لكن فخم جدا
2- 2 ايرباج
3- تراكشن كنترول (بس مفيش زرار يطفيه)
4- شاشة متعددة الوظائف
5- كمبيوتر رحلات
6- مثبت سرعة
7- زجاج كهربا تاتش في جميع الابواب
8- جهاز انذار
8- سي دي ف التابلوه (4 سي دي)
9-ظهر الكنبة الخلفية قابل للطي 60/40%
10- احزمة الامان الخلفية ممكن التحكم في ارتفاعها
11- فوج لايت امامي و واحد خلفي
12- جنوط اسبور 15 انش
13- وحدات رفع للزجاج

بالنسبة للمشاكل والعيوب المتكررة (زي اي فيكترا):

1- ال IDLER بيبوظ و يخلي ال RPM مش منتظم ، و دا عيب متكرر في مواتير ال ECOTEC ، ممكن شراء واحد استيراد بس في الغالب هيكون فيه نفس المشكلة او هتحصل بعد شوية، الحل: تشتري جديد بس ب حوالي 2000 جنيه!!!! لو ليك حد برا خليه يجبهولك بحوالي 1000 جنيه والصيني ارخص بكتيييير

2- العربية من الداخل فيها بلاستك رديء في كذا مكان زي الهوايات و مقابض الابواب و دي ديمن بتعمل اصوات سكسكة و تكتكة مزعجة في بعض الاحيان

3- التكتكة دي برضو بتيجي من الكراسي الامامية و ملهاش حل
4- صوت الموتور عالي خصوصا بع 4500 RPM لكن مع التكييف والكاسيت مبتسمعوش
5-حساس الكامة في الموتور دا كتير بيهيس بدون سبب، عندي بهز السلك و بيشتغل (مع انو سليم والفيشة سليمة)
6- خرطوم التكييف قريب جدا من الشكمان و احيانا بيتلسع و يضرب
7-اخر جزء في قطمة الدركسيون (الصليبة) بتبوش و تعمل طقطقة مقرفة في الدركسيون
8-فرش السقف بيفك
9- المرايا الخارجية غير عملية تماما و مجال الرؤية فيها سيء (مع انها طبعا من ملامح العربية الجميلة جدا في التصميم)
10- معقدة في الصيانة (زي كل الاوروبي) عشان تفك حاجة لازم تفك خمسين فيشة و تلاتين مسمار، مثلا في لمبة فس الفانوس عشان تغيرها لازم تفك الفانوس و عشان تفكوا لازم تفك الاكصدام والشبكة !!!
11- تعتبر مكلفة بالتسبة للصيانة الدورية ، الكاتينة مثلا كل 50 الف و بتغير معاها طرمبة الميه !!!
12- الفتيس الاتوماتيك مزعج (بالنسبالي) خصوصا داخل المدينة ، مشكلتو انو في الزحمة بينقل كتير و اول متسيب رجلك من على البنزين ينقل على الرابع ، عشان كدا دائما بسوق في وسط البلد على 3 مش على ال D
، لكن هوا مريح في السفر

نيجي بقى للحاجات الحلوة و المميزات

طبعا بعد اللي قريتو فوق زمانك كرهت العربية، لكن هيا دي ميزة الفيكترا ، انها عايزة صاحب مزاج عشان يحبها و يفهمها بعد دا كله.... و انا بصراحة بعشقها (:

العربية ما شاء الله فخمة جدا و شيك جدا وفيها كماليات مش موجودة لحد النهادرة في عربيات زيرو ( في مصر بس طبعا)

علي الطريق راسية و مريحة (العفشة ناشفة شوية في المطبات) لكن ثابتة جدا على الطريق حتى على السرعات العالية

التكييف ما شاء الله كويس جدا والعربية في الطبيعي مبتسخنش مش زي الناس ما بتقول .

الموتور كويس و بيوصل لسرعة معقولة ، حوالي 210 كلم/سا ، مع العلم انه متصمم اصلا عشان يكون اقتصادي و مناسب اكتر للسرعات المتوسطة..

استهلاك البنزين في السفر ممتازة جدا خصوصا في متوسط سرعة 130-140 ، لكن في الزحمة ممممم يعني مسرفة شوية (:

الفرامل معقولة مش هقول ممتازة و مش وحشة برضو.. وسط

الكراسي واسعة و مريحة قدام و في الخلف ، لكن الكنبة مصممة ل شخصين بس، اللي في الوسط مش مريح..
ظهر الكراسي قدام كويس و مريح خصوصا اسفل الظهر لكن مساند الراس بعيدة جدا !!

نصائح عامة بقى:
العربية عايزة اهتمام بالصيانة الدورية و تكون عند واحد متخصص (و حط تحت متخصص 100 خط)
اهتم جدا بقطع الغيار ، الاصلي ياريت او الألماني المعروف زي topran w febi
العربية دي مش بتاعت فرك و بهدلة، دي عربية ركوبة.. دلعها تدلعك (:

و بالنسبة للترخيص، انا لسه مجدد 3 سنين السنة ب حوالي 800 جندي

دا تقريبا كل اللي في دماغي دلوقتي و لو افتكرت حاجة تاني هقولها ان شاء الله
و اللي عندو اي سؤال انا تحت امركم (بالمناسبة انا مهندس صيانة في ميتسوبيشي (:

تحياتي

موديل 2002 و ماشية 220000 كلم