بسم الله الرحمن الرحيم
يا شباب أنا النهاردة حصلي موقف كده قلت لازم أنقلهلكم علشان تستفيدوا من تجربتي...
و أنا ماشي في ملف السندباد .... العربية عومت.. لفت.. خبطت في الرصيف.. جت على جنبها.. إتعدلت...
إيه السبب.. تقريباً عربية نقل كسر عليا و أنا خفت و فاديته.. بس بصراحة مش فاكر اللي حصل خالص للأسف
الحمد لله أنا سليم أنا و اللي كان جنبي و هي شوية خرابيش سطحية قوي علشان سندت على التابلوه و كان عليه فتافيت إزاز و رقبتي وجعاني شوية بسيطة قوي قوي و رايح للدكتور النهارده إن شاء الله.
اللي خلاني أكتب الموضوع هنا إني أقولكم إن سبب من الأسباب اللي ربنا سببها لنجاتي من الحادث هو حزام الأمان..
ياريت يا جماعة متستهونوش بيه خالص... ده فعلاً مهم!!!
على العموم الحمد لله على كل شئ وده قضاء و قدر من ربنا و أنا مش متضايق.. بجد الموقف ده كان فيه حاجات حلوة و شكله هيغيرني للأحسن.. و وراني وقفة صحابي جنبي و منهم ناس هنا برضه في نايل...
هم أخواتي و أصدقائي من الكلية:
أحمد منصور (مقدرش ييجي بس بلغ كل الناس)
مهاب بهنسي و مصطفى إبراهيم (جولي و راحو طلبولي الونش من البنزينة و مهاب كمان حاسب الونش)
أحمد سامي و أحمد عفيفي و إسلام (برضه جم و ساعدوني في لم اللي وقع من العربية و خلافه)
و في سواق تاكسي إبن حلال ساعدني نعدلها علشان كانت بعرض الطريق
و صحابي ساعدوني و عدلوهالي تحت البيت و الراجل بتاع الونش بصراحة مامشيش إلا لما عدلها معانا...
و اللي كان راكب معايا طلع معايا الإكصدام لحد البيت(الدور السادس).

اللي حصل للعروسة اللي زعلانة و بتعيط تحت البيت....
الجنب اليمين عاوز سمكره و رش
مراية يمين
الإكصدام ممكن يتلحم فبر .. و الله أعلم
قنطرة
شنب
رادياتير
سربنتينة
كارتيرة زيت
و الله أعلم في إيه تاني.. ده بس من معاينتي ليها بعد الحادث و بعد ما إطمنت على اللي معايا

على العموم ربنا يستر طريقكم و يكفيكم شر الحوادث

في رعاية الله
(ملحوظة: أنا لسة راجع من بره بقالي حوالي ساعتين فمقدرتش أصورلكم حاجة.. و أمانة عليكم تلبسوا الحزام حتى لو ماشي على 40)