تويوتا كورولا 2002 ب 50000.........

**mamdouhharbi** · 15-02-2008 10:33 AM

يا جماعة ممكن أعرف رأيكم فى إنى قدامى عربية كورولا موديل 2002 بخمسين الف إستعمال شركة...
بس عاملة حوالى 300000 كم......صيانة توكيل......الشكل الخارجى والداخلى نقول حالة جيدة..
يا ريت تردوا عليا برأيكم هل السعر دة كويس للمواصفات دى........؟

**hazem_khidr** · 15-02-2008 02:30 PM

هو التمن دا مش معقول
عربيه زي ما بتقول كده 2002 يعني الشكل الحديث مش العيون و 300 الف كيلو و حاله جيده مش تقل في اي حالل من الاحوال عن ال 75 او 80 الف انما السعر دا غريب اوي.
خلي سمكري يتفرج عليها و لو كويسه اتوكل علي الله

**mina_ramsis** · 15-02-2008 02:35 PM

300 الف يعنى بتلعب على عمرة و تقريبا كده كل اجزاء العربية هتكون عمرها الافتراضى قرب على الانتهاء
فكر شويه و خلى ميكانيكى و عفشجى نظاف يبصولك عليها

**hero** · 15-02-2008 05:42 PM

العربية كدة سعرها كويس قوي....

حازم باشا....انا عن نفسي مش ممكن ادفع 70 الف جنية في عربية تويوتا عاملة 300 الف كم....ولا حتي عاملة 200 الف كم....ودة تفكير العالم كلة برة ...لكن طبعا مصر غير الدنيا كلها....
العربية زيها زي اي شيء في الدنيا لية عمر افتراضي...ومعامل اهلاك...وساعات تشغيل لكل جزء فية...ولما عربية تعمل 300 الف كيلو في اقل من 6 سنين....يعني العربية ما كانتش بترتاح يومين علي بعض....
واكيد شوية بشوية هايلاقي كل شيء في العربية محتاج يتغير...ابتداءا من الموتور لحد بلي العجل....

يبقي الـ 50 الف معقولين قوي عليها .....ويمكن يبقوا كتير كمان....يعني يستحسن انة يروح يكشف عليها كويس قوي...ويشوف هي ممكن تحتاج اية في القريب العاجل...
علشان يبقي عامل حسابة علية.....

**hazem_khidr** · 15-02-2008 06:00 PM

معاك يا باشا بس لو تلاحظ ان في عربيان معديه ال 500 الف كيلو كمان و موديلات 93 و 94 و بتتباع مش اقل من 55 الف!!!
ف بمقاييس السوق هنا يخليني اشك ان العربيه دي سليمه.
و بعدين فرضا انها كلها كده علي بعضها بايظه بس البودي سليم و ماعملش حوادث.
يبقي تكلفه تغيير الموتور مثلا و العفشه و طقم ابواب كمان لو عاوز ترجعها زيرو و وش دوكو محترم مس حتزيد عن 15 الف جنيه يبقي هو الكسبان

**hero** · 15-02-2008 06:11 PM

انا معاك في حكاية تسعير العربيات الكورولا القديمة....بس برضة ايلي بيتباع منها بـ 55 الف ما بيكونش عامل كيلو متر كبير يعني كبيرها 150 الف كيلو....وساعتها بيكون معاكل الاستهلاك علي الفترة الزمنية طبيعي ....يعني العربية ما تهانتش....
لكن تعمل 300 الف كيلو في 5 سنين يعني بمتوسط 60 الف في السنة يعني 5000 كم في الشهر...والعربية ما ريحتش شهر علي بعضة....يعني انت كدة جبت اخرها ...

وبعدين لو عملية اعادة الحياة لمكونات العربية في حدود 15 الف كانت الشركة عملت بيهم عمرة كاملة ووفرت علي نفسها شراء سيارة جديدة....

اكيد قطع الغيار غالية ناررر...وخصوصا ما يتعلق بالعفشة والموتور....انا اسمع ان عمرة الموتور بس في التوكيل بتعمل فوق الـ 15 الف...ومش عارف الموتور الجديد يعمل كام.....والكبالن بتعدي الـ 6000 جنية ...يعني هاتصرف عليها وتوصل بيها لحد 70 الف ويمكن 80 الف ويبقي في النهاية ....اشتريت عربية قديمة وماشية 300 الف كم ومغير نصها ...ودافع فيها ثمن عربية زيرو ...زي الياريس مثلا ...

انا افضل ادفع الـ 50 الف مقدم سيارة ياريس....واريح دماغي واركب زيرو ...وماضيعش وقتي وفلوسي مع الصنايعية...

وعموما ..ززربنا يوفق الاخ ايلي بيشتري لما فية الخير.....بس برضة ما يتغرش في السعر ويشكف علي العربية كويس قوي قوي قوي.....ويعرف حالة كل شيء فيها ولو محتاج يتغير ....سعر الجديد منة كام....

**mamdouhharbi** · 16-02-2008 11:45 AM

متشكر أوى يا جماعة على ردودكم .........
من الحاجات اللى نسيت أقولها إن العربية اتوماتيك.... وإنها دايما فى صيانة دورية فى التوكيل وعليها تأمين شامل... بس يمكن هية الحاجة الوحيدة اللى مخوفانى إن العربية دى إتغير عليها 5 أو 6 أشخاص يعنى تقريبا كل سنة واحد.....وزى ما إنتو عارفين إن تغيير الرجل على العربية كتير مش حلو ...دة غير إنى أنا حركبها ولو حصرف عليها كمان فى عمرة أو حاجة هل بعد سنتين حعرف ابيعها بسعر مش خسارة كبيرة ليا ولا حبيعها خردة...........؟

**hero** · 22-02-2008 07:11 PM

استاذ ممدوح ..
انا سالتلك سماسرة سيارات علي العربية دي ودة كان ردهم:
العربية لو فابريقة برة وجوة ....او حتي برة علي الاقل ...والصالون نضيف ..مش مبهدل او مقطع او مبقع ...يبقي المبلغ دة لقطة...وممكن تكسب فيها علي الاقل 5 آلاف جنية...

سبب كلامهم :
العربية ياباني ومعمرة والكيلو متر لو معمول بصيانة منتظمة وخصوصا الزيت والفلاتر والبوجيهات وسير الكاتينة...يبقي الموتور مش هايحتاج عمرة حاليا ...
العفشة امرها سهل...ويمكن استبدال التالف منها ....

السيارة ممكن تتباع في السوق وتجيب فوق الـ 60 الف وقبل الـ 70 الف....

طبعا لو هاتعمل الحجات دي بنفسك فهي عايزة وقت زي ما احد الاخوة قال قبل كدة...بس علي الاقل لو السيارة حالتها كويسة ..ممكن فعلا تكسب منها...

الله الموفق..