السلام عليكم اولا

اولا الحمد لله علي كل شيء

ثانيا اللي حصل اننا كنا في التجمع الخامس ركنت عربيتي عند البيت وعدي علي واحد صاحبي بعربية ابوه المهم ركبنا فيها وخرجنا وبعد مارجعنا اذ فجاة نلاقي سواق نقل يزنق علينا مرة واحدة وصاحبي اللي سايق وبيفاديه تلاقي ايه مرة واحدة

ليييييييييييييييييييييييي يييييييييه طاااااااااااااااااااااااخ

صاحبي اللي كان سايق دخلنا في رصيف من اولو اللي هو بيكون فاصل بين الشارع العادي وشارع الخدمة

المهم انا حضنت التابلوه انا وصاحبي كويسين هو كان لابس الحزام وانا ماكنتش لابس حزام مما ادي الي خبطة جامدة في التابلوه وحالة اغماء لمدة من 7 الي 10 دقائق ماحسيتش يحاجة
وصداع لحد هذه اللحظة والنظارة اتكسرت

والاثنين اللي كانو ورا زي القرود مافيهمش حاجة

المهم نزلنا نشوف العربية نلاقي القنطرة مدمرة والزيت كولو في الارض والكاوتش مش راضي يحدود لايمين ولا شمال والازاز الامامي اتشرخ والعفشة شكلها مدمر

وقفنا تاكسي ورحت جبت ونش شالها وحطيناها قدام البيت و انا معاكم اهو

روحت امبارح بعد الحادثة عملت كشف شامل علي منطقة المخ والحمد لله الدكاترة اكدولي اني مافيش حاجة وحالة الاغماء طبيعي من قوة الخبطة في التابلوة والصداع هايروح مع الوقت بالعربي كده ........ ربنا سترها

وانا رايح الشغل النهاردة الصبح مش عارف اسوق وايدي بتترعش لما امسك الدركسيون

في ناس معايا في الشغل قالولي ماتخافش كلها اسبوع وتبقي كويس

دلوقتي في طلب مساعدة

العربية نوعها مرسيدس عيون اوديها لمين يصلحها صح

وشكرا والحمد لله علي حال

ابو عبد الله