مرور عين الصيره

**dr_tamer_sh** · 16-06-2010 03:35 AM

كنت عاوز اروح مرور عين الصيره فياريت اقرب واسهل طريقه سواء من المؤسسه او عبود او رمسيس

**w-m-a** · 16-06-2010 03:55 AM

تنور القاهرة
سعادتك هتركب المترو لو من المؤسسه هتغير من رمسيس او السادات للخط الاول اتجاه حلوان
او من رمسيس على طول الخط الاول اتجاه حلوان وتنزل محطه الملك الصالح هتلاقى ميكروباصات السيدة عائشه هتنزلك قدام المرور
وربنا معاك
على فكرة وحده مرور عين الصيرة من انظف الوحدات
وفيها شغل كويس علشان فيها اجانب

**bassem.naguib** · 16-06-2010 12:50 PM

حضرتك حتروح بعربية ولا مواصلات .. ولو مواصلات يبقى زي ما شرح الأخ w-m-a

لو حتروح بالعربية .. يبقى تمسك صلاح سالم في اتجاه السيدة عائشة .. وحتمشي لأخر الشارع وحتلاقي الشارع بيلف معاك (عند ملاهي اسمها كايرو لاند تقريباً) .. حتمشي شوية حتلاقي المرور على أيدك اليمين .

**bassem.naguib** · 17-06-2010 09:31 AM

المشاركة الأصلية كتبت بواسطة dr_tamer_sh

متشكر جدا للاخين الكريمين على ردهم السريع
انا الحقيقه لسه مقررتش اجى بالعربيه ولا مواصلات لانى الحقيقه صفر فى شوارع القاهره وخايف يكون فى اى مشاوير تانيه ومعرفش اسلك
عموما انا كجده عرفت كويس طريقه المواصلات
بالنسبه لو جاى بالعربيه انا هكون جاى من طنطا يعنى اخرى اعرف الدائرى ومش عارف اوصل لصلاح سالم ازاى منه فو امكن شرح مفصل او لو فى طريق تانيه افضل ليه ....وشكرا

طيب علشان نسهل عليك وعلى نفسنا .. حضرتك تعرف أيه في القاهرة .. وممكن من خلالها نشرح لحضرتك لو جاي بالعربية .

نصيحة لو حتيجي مواصلات خليك في يوم الأحد .. غير كدة ممكن تتعب في المواصلات

**bassem.naguib** · 17-06-2010 06:27 PM

أقرب حاجة ليك من على الدائري .. أنك حتكون ماشي في الاتجاه بتاع كارفور اللي يوديك على المنيب .. وبعد كارفور بحوالي 1 أو 2كم بالكتير حتلاقي مخرج من على الدائري مكتوب عليه القلعة والمعادي (المخرج على فكرة بتكون ماشي على الدائري عادي وفيه زي مطلع كوبري "الطريق الدائري العادي" بتنزل من تحت الكوبري)

حتخرج من المخرج ده اللي بيتفرع 3 اتجاهات ، أول حاجة على الشمال يو ترن تحت الكوبري وده بيرجعك في الاتجاه التاني بتاع الدائري .. وطريق في النص وده اللي حيخرجك على الأتوستراد في اتجاه القلعة (الطريق المقصود) ، ومطلع كوبري على اليمين وده بينزلك على الأوستراد برضه بس في اتجاه المعادي وحلوان و15 مايو (ملناش دعوة بيه)

يبقى حنخش على الطريق اللي في النص اللي بينزلنا على الاتوستراد في اتجاه القلعة .. حنفضل ماشيين في الاتوستراد لحد ما يقابلنا كوبري حنطلعه .. وبعد كدة حنكمل عادي حنلاقي كوبري تاني حنطلعة برضه الكوبري التاني ده حتلاقيه بيلف بيك ناحية اليمين من هنا بقى حنبتدي نهدي السرعة شوية علشان في أول شارع يمين (زي ما يكن منطقة مفارق كدة) حنخش يمين (الطريق ده بيودي على المقطم) وحنمشي فيه وحتبقى ملتزم الاتجاه اليمين وحتلاقي الشارع تفرق عدة اتجاهات (ركز في الحته دي ) حتلتزم أقصى اليمين وحتخش مع العربيات (اللي بتبقى نازلة من المقطم) وحتلاقي نفسك ماشي على كوبري صغير كدة وأخره فيه أشارة وأخر الأشاره دي بالعرض شارع (هو ده صلاح سالم) حتعدي الأشارة وتخش شمال .. حتمشي شوية حتلاقي القلعة على يمينك .. وبعد كده حتلاقي كوبري (كوبري السيدة عائشة) .. أطلع الكوبري وأنزل منه وأمشي على طول حتقابل أشاره .. عديها وأمشي على طول لحد اخر الشارع الي حتلاقيه بيلف بيك يمين (عند ملاهي أسمها كايرو لاند تقريباً) .. وبعد كدة مش حتكمل كيلو أو اتنين بالكتير حتلاقي مرور عين الصيرة على أيدك اليمين .

معلش الكلام كتير بس ده الوصف بالتفصيل .. تحياتي وتحت أمرك في أي استفسار .