يا جماعه عايز اغسل موتور اللوجان ( كل حاجه تحت الكبوت)
هل ممكن اعمل كده , مين احسن حد اغسل عنده
عرض للطباعة
يا جماعه عايز اغسل موتور اللوجان ( كل حاجه تحت الكبوت)
هل ممكن اعمل كده , مين احسن حد اغسل عنده
فالتوكيل اظن فيه غسيل ماتور بس معرفش بكام
انما عامة اى محطة بنزين نضيفه هتلائى فيها غسيل ماتور بس ميغسلوش بالخاز عشان الخراطيم الكاوتش متنشفش وتتشقق
ممكن تخلليه يغسله بضغط الهوا بس من غير اى حاجه وهتلائى الماتور نضف
بلاش الجاز
ممكن بالميه فقط و مش كتير كل 10.000 مع الصيانه و كده افضل
انا كنت سألت المهند عمرو ابو الفتوح هناك قالي نصيحة بلاش تغسلو برة و لو لازم هاتو هنا و احنا نغسلهولك فقررت مع كل صيانة 10000 هغسلو مرة و خلاص و يبقوا مسئولين عن كل حاجة لأني مرة في اللادا غسلته في البنزينة و طيرلي موبينة ب 660 جنيه
هم بينظفوه فى الصيانات الدورية بالهواء ..... ,مجانا
ودة احسن حاجة ...مادام بتابع فى الصيانات الدورية.... حلو عليه اوي كل 10 . الاف كم
غير كدة عليك وعلى car care
ربنا يجزيكم كل خير على المعلومات المفيده
ممكن جردل ميه وتفتح الكابوت وتقوم تعد 1 2 3 وتدلق
والله ما بهرج :36_6_3[1]:
انا فى الجراج بغسل العربيه بنفسى
وبخرطوم ميه وبفتح الكابوت واحمى الماتور كله اخليه شوربه
والكاتاوت وكل الحباشتكنات دى معزوله اصلآ
ومافيش مانع من ميه بصابون فى الجردل وحمى حمى يا ريس
بدور بعدها العربيه بتفضل تدخن بتاع نص ساعه
طبعآ بتبخر الميه اللى على الماتور والرداتير
طيب السؤال بقى بالمرة هو فين الكومبيوتر ده؟!
افتح الكبوت ، ارسم خطين متعامدين بحيث يقسموا الكبوت أربعة أرباع
الكمبيوتر عبارة عن كارت واقف كده فى الربع الأمامى (الخارجى) على أيدك اليمين وانت باصص للعربية من قدام.
طيب ممكن صورة؟!
بالهوا او غسيل كيماوى
أنا مقرر محطش نقطة ميه على الكبوت
هوه بالهواء المضغوط وربنا يسترها
لو كان الكمبيوتر مكشوف وحساس لأقل حاجه على كلامكم
كان زمانه باظ من زمان
انا من يوم ما استلمت العربيه فى شهر 11 وانا وبغسل ماتور
غسلته بتاع 4 او 5 مرات فى البنزينه
بيرشو جاز وصابون وميه وهوا
ونفس الكلام غسلته بنفسى مرتين بالميه والصابون
معتقدش يا جماعه الناس دي غبيه للدرجادى عشان يحطو حاجه حساسه زي دى مكشوفه من غير اي عازل
والا كان زمانها اقل نقطه ميه بوظت الدنيا
انا شايف حاجات كتيره معزوله فى الماتور وده اللى مطمنى بصراحه
و انا متعور في لادا يعني عربية مش معقدة تماما
غسيل الكبووووووووووووووووووت بالفوم ..... المياااااه لا لا لا مش كل مرة تسلم الجره
بعد مشوار حلو كده تفتح الكبوت وهوا دافي والكمبروسر وتطير اي تراب موجود وتديها فوووووووووووووووووووووووو م تسيبها 10 دقايق وبعدين بقماشة وتمسح هوا اصلا مع الدفء بتاع الموتور بيفرد وبيروح لوحده بس برده بالقماشة وبعدين بالكمبوسر كمان مرة وادعيلي العربية هترجع كأنها لسه طالعة من المعرض
وفعلاااااااااااا ده الصح لانها بتتعمل في التوكيل كده
فى صيانة الـ 5 ، قلت هيغسلوا العربية والموتور .. بس جات أوت ..
قلت يبقى أكيد بيعملوها فى العشرات ..
النهارده كنت فى صيانة الـ 10 ، خلصوا ، وسلمونى العربية بترابها
أنا : ايه يا باشمهندس ، انتوا ما غسلتوهاش ؟؟
الباشمهندس : أنت ما طلبتش
أنا : ليه ، هى الغسيل بتاخدوا عليه فلوس ؟؟
الباشمهندس : لأ ، مجانى ..
أنا : طب ، ده اسمه كلام؟ يبقى مستنى أطلب ليه ؟؟
الباشمهندس : تحب نغسلها لك ..
أنا : لأ ، عايز أروح.
فدلوقتى بقى ، أنا عايز أشوف الموضوع ده بره التوكيل عشان العنكبوت قرب يطلع فى حوض الموتور اللى ما اتغسلش من ساعة ما جبت العربية من 8 شهور.
هل يكفى موضوع النفخ بالهواء المضغوط
واللا أشوف حد يعمل حوار الفوم ؟
وبعدين فيه ناس قالوا علشان تاخد أحسن آداء من التكييف المفروض السربنتينة بتاعته تتغسل من التراب كل فترة ، فمين ممكن يعمل الموضوع ده؟
وعلى فكرة النهارده كان توكيل المقطم زحمة جداً ، قعدت فى طابور تسليم العربية ساعة وكان قدامى ييجى حاجة وعشرين عربية ..
شكلى هاحول على العبور فى الصيانات القادمة.
ونصيحة للى هايعمل صيانة فى المقطم اليومين دول .. شوفوا لكم طريق غير (طريق مجرى العيون - صلاح سالم - كوبرى السيدة عائشة) ، علشان الكوبرى مقفول فى الفردة بتاعتنا (الناحية التانية مفتوحة) وأنا اتنفخت النهارده بمعنى كلمة اتنفخت ، طالع من بيتنا 7 صباحاً والمفروض أوصل الساعة 9 ، كنت فى مجرى العيون الساعة 8.5 ، والخنقة بدأت ، وماوصلتش التوكيل غير الساعة 10.5 .. تخيلوا ؟؟
ووقفت فى طابور تسليم العربيات ساعة كمان ..
يعنى عامل حسابى وأنا طالع من بيتنا أخلص على الساعة 12 ، ما سلمتش العربية غير الساعة 12 .. :majd(4):
يا باشا متقلقش روح اغسلها فى اي بنزينه نضيفه
وهما بيعرفو يتعاملو كويس .. ( عشان بياخدو فلوس )
فى التوكيل هيغسلوها عك عك وليس كله كويس
بيرش ميه ويسبها ثوانى تنشف ويقولك اخلع اخلع
عشان انا شوفت المغسله اللى فى توكيل العامريه كانت زي الزفت
واحد ماسك خرطوم وموقف العربيات جمب بعضها ورش رش رش
يرش شويه على العربيات وشويه على هدومه وشويه وهيستحمى وهو واقف
ما هو قاعد بيسقى الزرع مش بيغسل عربيات
ده انا بشوف فى البنزينه احدث عربيات يا راجل
بى ام دبليو وسكودا وفولكس ومرسيدس وكلها موديلات السنه
وبتغسل مواتير بالجاز والصابون والميه
وعادى جدآ
هو إنتوا بتغسلوا الماتور ليه
أنا مش مقتنع بغسيله خالص
إلا يعني كل فين و فين بهوا مضغوط مش لازم أخليه بيلمع يعني بمية و صابون
تراكم التراب على مر الزمن وعوامل الرطوبة بتعمل طين بيغطى الموتور ومكونات الحوض بما يؤثر على التهوية الطبيعية للأجزاء المعدنية ، أيضاً على آداء التكييف.
بس سيبك من ده ، الأهم الاحساس النفسى انك سايق عربية تحت كبوتها قبر معفن احساس مش كويس.