عرض مغرى! - إشترى عربية ساجا و إدفع ثمن عربيتين!
السلام عليكم ورحمة الله وبركاته
أنا إتشرفت بالإنضمام لمنتدى نايل موتورز - بروتون و أنا فى رحلة البحث عن معلومات عن البروتون ساجا
أنا من أشد محبى البروتون و بالأساس من محبى ماليزيا يعنى لو ماليزيا عملة ثلاجه و قالت دى عربية هبقى شايفها أحسن عربية فى الدنيا.
بس للأسف أنا لاقيت 3 مشاكل فى العربية الساجا فحبيت أطرحهم عليكم و أستفيد من رآيكم بس ياريت تدونى رآى عملى بدون عواطف و أهواء. و ده اللى انا إن شاء الله منتظره منكم
ترتيب المشاكل من الأقل أهمية إلى الأهم...
المشكلة الأولى: الألوان اللى نازلة فى مصر ألوان فقيرة للغاية و مضيعه شكل العربية فى الوقت اللى العربيات المنافسه نازله بعشرين لون كلهم احسن من بعض
المشكلة الثانية: ضعف التوكيل و عدم قدرته على الترويج للعربية وده خلى إنتشار العربية فى الشارع قليل جداً بالمقارنة بعربيات تانيه متسواش حاجه بالمقارنة بالساجا. يعنى والا شوفنا إعلان تليفزيون والا حتى بيعمل إعلانات فى الجرائد أنا ماشوفتش غير إعلان يتيم فى اهرام الجمعه من كام شهر.
العربية إنتشارها ضغيف يا جماعه. عارف إن مبقلهاش كتير فى السوق بس برضه ضعيف أوى.
طبعاً كلنا عارفين إن إنتشار العربية ده بيترجم لسهولة صيانه و قطع غيار منتشره و سعر إعادة البيع
المشكله الثالثه: و دى انا بعتبرها المشكله الخقيقية أو الكارثة
مشكلة أسعار قطع الغيار. دى مش غالية و بس دى غالية بشكل مستفز كمان. يعنى ايه تيل فرامل بيتغير كتير جداً خصوصاً مع زحمة مصر يبقى ثمنه 500 جنيه. و إزاى فانوس خلفى مثلاً بيتكسر كل يوم الصبح لما حد يريح عليك كالعادة و هو بيركن يكون ثمنه 600 جنيه. و غيره وغيره و متنساش تضيف 10% ضريبة مبيعات و مصنعيات التوكيل.
هو انا شارى عربية إقتصادية رخيصه 1300 CC عشان أدفع ثمنها مرتين مره فى المعرض و الثانيه فى التوكيل؟!
هسيبكم مع قائمة الأسعار الحالية لبروتون ساجا اللى عملها أخونا Ayman_52
فى موضوعه المتعوب فيه
قائمــة أسعــار قطـع غيــار -Proton SAGA- الحاليــه
http://www.nilemotors.net/Nile/141573-proton-saga.html
و عاوز أرائكم يا جماعه بأمانه لأنى كده للأسف نفسى إتسدت تجاه الساجا للأسف
قائمة الأسعار كالتالى و قبل ما تقرأها خد حباية الضغط
شنطــه : 865 جنيــه
- حلية الشنطه : 81 جنيــه
- مقص امامى : 800 جنيــه
- باكيته سقف : 200 جنيــه
- اكصدام امامى : 510 جنيــه
- اكصدام خلفى : 640 جنيــه
- اللوجو الامامى : 67 جنيــه
- باكيته باب خلفى : 85 جنيــه
- باكيته باب امامى : 115 جنيــه
- ماكينه ازاز امامى : 580 جنيــه
- ماكينه ازاز عاده خلفى : 260 جنيــه
- فانـوس خلفـى شمـال , يميـن :591 جنيــه
- فانوس امـامى شمـال , يميـن : 750 جنيــه
- باب امامى شمـال , يميـن : 1912 جنيــه
- باب خلفـى شمـال , يميـن : 1590 جنيــه
-- رفرف امامى شمـال , يميـن : 445 جنيــه
- رفرف خلفـى شمـال , يميـن : 850 جنيــه
- أزاز باب خلفـى شمـال , يميـن : 280 جنيـه
- أزاز باب أمـامى شمـال , يميـن : 302 جنيـه
- تيل امامى (بوش المانى Line - A) : ـ 498 جنيــه
- تيل خلفـى (بوش المانى Line - A): ـ 322 جنيــه
- قنطره : 4248 جنيــه
شكراُ و منتظر آرائكم فى الموضوع
السلام عليكم ورحمة الله وبركاته