الموضوع: يا جماعة من فضلكم حد يعبرني!؟ سؤالي مش صعب اوي كدة وفيه هنا خبرة ما شاء الله !

تعريف نسبة الانضغاط:
نسبة الإنضغاط هي حاصل قسمة حجم الإسطوانة بالكامل (الحجم المحصور بين الحد السفلى الذي يصل له المكبس وحافة غطاء الاسطوانة(وش السلندر)) مقسوماً على حجم غرفة الإحتراق (المحصورة بين آخر نقطة يصل إليها المكبس وحافة غطاء الاسطوانة (وش السلندر))
نسبة الإنضغاط = حجم الإسطوانة / حجم غرفة الإحتراق
= تتراوح بين 7 إلى 12 وقد يصل إلى 15 في بعض محركات سيارات السباق ولكن على حساب عمر المحرك الذي يقصر بشدة في هذه الحالة
وكلما زادت نسبة إنضغاط المحرك كلما أصبح المحرك متأقلم مع نوع بنزين أعلى في رقم الأوكتان
وهذه بعض النسب التقريبية لكل محرك ونوع البنزين المناسب له:
بنزين 90 - 91 لمحرك ذو نسبة إنضغاط 9
بنزين 92 لمحرك ذو نسبة إنضغاط 10
بنزين95لمحرك ذو نسبة إنضغاط 11
وللتعرف على نسبة الإنضغاط الخاصة بمحرك سيارتك يجب الرجوع إلى كتالوج السيارة أو موقع الشركة على النت
بمعني أن السيارات ذات الموتورات القديمة ذات نسبة إنضغاط منخفض فمن الأفضل أن تضع لها بنزين ذو أقل رقم أوكتاني يعني ولو وضعت بنزين برقم أوكتيني أعلى تصبح كأنك ترمي فلوسك في الهواء بدون مبالغة

المشاركة الأصلية كتبت بواسطة hokaboka

السؤال ببساطة: عربيتي C180 Kompressor موديل 2010 بمحرك نسبة الانضغاط بتاعته 9.3:1 هل احط بنزين 92 علطول وانا مطمن ولا لاء؟ يعني الموتور مش حيبوظ؟

وده مع العلم ان الكتالوج بيقول بنزين 95 وممكن بصورة مؤقتة 92 وده حياثر علي الموتور (بس مش واضح إزاي) وإستهلاك البنزين....

أرجو الافادة ويكون الكلام علمي او عن تجربة لفترة طويلة مع عربية kompressor

وشكراً مقدماً

نسبة الانضغاط عامل اساسي في السيارات العادية، انما السيارات المشحونه سواء تيربو أو سوبرتشارجر زي عربيتك فده بيعتمد على نسبة الانضغاط + الشحن boost

يعني مثلا نسبة انضغاط 9:1 تقدر تستخدم معاها بنزين 87 بدون مشاكل ولكن نسبة انضغاط 9:1 + ضغط 8PSI من السوبر تشارجر مثلا حتخليك لازم تستخدم اكتان عالي.وكل متزود ال boost لازم تزود نسبة الاكتان

عموما المرسيدس فيها knock sensor فحتى لو حطيط 92 مظنش انه حيعمل مشاكل ، كل اللي ممكن يحصل مش حيتعدى ضعف بسيط في الأداء واستهلاك اعلى نسبيا في البنزين مقارنة باستخدام 95 لأن ال knock sensor بيحس ان حيحصل تسقيف في الموتور فال ecu حيدي امر بتأخير الشرارة في البوجيهات.

ربنا يباركلك فيها يا hokaboka بس واضح فعلاً ان انتا عاوز جواب نهائي من الأعضاء علشان تقدر تستقر على رأى فى نوع البنزين

وانا مش هعرف افيدك فى الموضوع ده لأنى مش على دراية كاملة بموضوع الأنضغاط ده ... بس انا هقولك رأيي بأمانة

انا لو منك محطش فى تنك العربية غير بنزين 95 وخصوصاً اما تكون موديل السنة 2010 ومرسيدس وكمان كومبروسور يا hokaboka

وعلى فكرة انا بقولك من تجربة واحد كان فى احد المنتديات وكان بيقول انه بيحط بنزين 92 لنفس نوع عربيتك بالظبط بس موديل 2008

ولما فكر انه يغير لبنزين 95 عشان كان برده خايف لحسن يسب ضرر للعربية .. الى ذكره انه اول ما غير لبنزين 95 محسش بالفرق الا بعد عدة ايام

لما العربية اتعودت عليه .. ومن ناحية السعر : لتر بنزين الـ 92 بـ 1.75 ... ولتر بنزين الـ 95 بـ 2.75

وطبعاً انا زى ما بقولك يا بشا انا لو معايا مرسيدس كومبروسور موديل 2010 مش هحط فى التنك غير بنزين 95

على الأقل يا hokaboka هتبقي متأكد انك فى الـ safe side وده مبدأى هتكون مطمن ومش مقلق من الكلام المتطاير الى بنسمعه دايماً ده

زى الماتور يصفر ومش عارف ايه يسقف .. طيب وليه ده كله خليك فى الأمان وخليك مع افضل نوع بنزين لأن عربيتك من افضل انواع السيارات

وربنا يباركلك فيها يارب .. ويارب اكون أفدتك ... وان شاء الله الأعضاء برده يدلوك ويفيدوك اكتر