الموضوع: Over drive

المشاركة الأصلية كتبت بواسطة sab3aawy

الأوفر درايف ببساطة معناها سواء يالنسبة للسيارة المانيوال او الأوتوماتيك هى النقلة العالية، يعنى نقلة الخامس فى السيارة المانيوال اسمها اوفر داريف واعلى غيار داخل جير بوكس السيارة الاوتوماتيك والذى عادة يكون الرابع يسمى اوفر درايف

يعن انت لو راكب سيارة مانيوال ونقلت على الخامس يبقى انت اسمك سايق اوفر درايف، وسبب التسمية اوفر درايف ان الخامس فى السيارات اليدوية بيكون النقلة الوحيدة اللى الفتيس مش بيخفض فيها سرعة المحرك لكن بيعليها ، يعنى مثلا ممكن تلاقى نسب تخفيض الفتيس اليدوى كالآتى: الأول 1 الى 4 يعنى كل ما الموتور يلف اربع لفات عمود خرج الفتيس يلف لفة واحدة، التانى 1 الى 3 مثلا، الثالت 1 الى 1.5 ، الرابع 1 الى 1 لكن الخامس مثلا بيكون 1.25 الى واحد يعنى خرج الفتيس يلف اسرع من الموتور ، ونفس الحال بالنسبة للرابع بتاع الفتيس الأوتوماتيك

فيه نوعين من شكل الحارات بتاعة عصاية الفتيس الأوتوماتيك، فى نوع عبارة عن 4 حارات امامية (1,2,D3,D) وحارة N وحارة R وحارة P زى اللانسر واللانوس مثلا،ونوع آخر فيه 3 حارات امامية فقط وزرار اوفر درايف زى الصنى

الحارة 1 او ساعات بيكون اسمها L وظيفتها فى النوعين ان الجير الأوتوماتيك يفضل على الأولانى بس وماينقلش منه

الحارة 2 فى النوعين وظيفتها انها تخلى الفتيس ينقل بين الغيارين الأول والثانى بس

الحارة D3 فى النوع الاول تقابل استخدام الحارة D مع إغلاق زرار الأوفر داريف فى النوع الثانى، يعنى تكون لمبة الأوفر درايف فى التابلوه منورة،وهذا الوضع يسمح للفتيس الأوتوماتيك انه يغير بين الأول والثانى والثالت فقط ولا لسمح له انه يروح للرابع(ملحوظة هامة جدا: لمبة الأوفر درايف اللى فى التابلوه بتنور لما يكون زرار الأوفردرايف مقفول وليس مفتوح ، وحتى تلاقىى اللمة اللى فى التابلوه مكتوب عليها o/d off، معنى ان اللمبة مضاءه ان السيارة غير مسموح لها تنقل على الرابع)

الحارة D فى النوع الأول تقابل الحارة D مع فتح زرار الأوفر درايف فى النوع التانى(لمبة الأوفر درايف مطفية) دى معناها ان الفتيس حر يغير بين الأربعة نقلات زى ما هو عايز حسب ظروف السرعة والطريق

نستنتج من كل هذا ان زرار الأوفر داريف فى السيارات المزودة به هو بديل الحارة الرابعة فى السيارات الغير مزودة به ووظيفته السماح للجير بوكس انه يستعمل النقله الرابعة او منعه من ذلك

لا علاقة نهائيا لموضوع الأوفر درايف بما تفعله بدواسة البنزين، اللى انت بتعمله لما تكبس على دواسة البنزين اسمه كيك داونkick down وليس اوفر درايف، الكيك داون بيخلى العربية تنقل من ايه نقلة الى النقلة السابقة لها ، يعن مثلا لو الجير بوكس واخد تالت وانت كبست هايروح نازل على التانى علشان يديلك عزم، ولو كان على الرابع هاينزل على التالت وهكذا

اللبس اللى بيحصل عند الناس هو ان بعض الناس لما بيدوس زرار الأوفر درايف ويكون الجير بوكس على الرابع في هذة اللحظة الزرار بينزل الجيربوكس اجباريا من الرابع للتالت لأن مع إغلاق الأوفرداريف لا يكون مسموح للفتيس باستعمال الرابع،وده هو نفس تأثير الكيك داون فالناس بتفتكر انهم نفس الحاجة، لكن لو ساعة استعمال زرار الاوفر درايف وكان اصلا الجير بوكس على التالت او التانى مثلا هنلاقى ان استعمال زرار الاوفر درايف معملش اى حاجة، كما ان مع الكيك داون العرية لما بتاخد سرعتها بترجع تنقل تناى للنقلة الأعلى لكن لو استعملت زرار الأوفر درايف فالعربية عمرها ما هاتاخد الرابع مهما جريت بيها حتى لو الRPM دخلت فى الزون الأحمر، غير لما ترجع تفتح زرار الأوفر درايف

فى جمل سريعة:
1- الأوفر درايف معناه اعلى نقلة فى السيارة سواء يدوية او اوتوماتيك
2-زرار الأوفر درايف فى السيارات الأوتوماتيك المزودة به هو بديل الحارة الرابعة فى السيارات الأوتوماتيك الغير مزودة به
3-وظيفة زرار الأوفر درايف السماح للجير بوكس او منعه من استعمال الغيار الرابع
4-الكيك داون عن طريق كبس دوراسة البنزين ينقل السيارة الى النقلة الأدنى لتجميع عزم للسيارة وحسن تصل الى سرعة عالية تعاود النقل الى النقل الأعلى
5-لمبة الأوفر درايف تضئ حين يكون الأوفر درايف مغلق وليس مفتوح، معنى ان اللمبة مضاءه ان السيارة غير مسموح لها تنقل على الرابع

كلام عشرة على عشرة ولا غبار عليه ماشاء الله عليك

لكن اسمحلي انا مش متفق مع حضرتك في بعض النقاط

بالنسبة لان الاوفر درايف مقتصر فقط على السماح للجير بوكس للوصول للنقلة الرابعة وان الاوفر درايف هو نفس ال D في العربيات اللى مش موجود فيها زرار اوفر درايف انا مش متفق مع حضرتك في النقطة دي

وفي نفس الوقت لو جبت الخامس وحرقت عليه بدون ماتسقط نقلة التسارع هيتأخر وهتبقى محتاج انك تسقط نقلة عشان تدي العربية العزم المناسب وتحقق اقصى تسارع ممكن

وسواء انت ماشي على وضع ال D العادي او ماشي على وضع ال Ds العربية هتنتقل للغيار الاعلى بدون مشاكل الا في حالة لو حضرتك حولت العربية للوضع المانويل وحددت الفتيس بنقلة معينة يتلزم بيها

اللى توصلتله من خلال بعض التجارب على عربيتي (ياريس اتوماتيك) وعربيات زمايلي (بعضها فيها نمط Ds بدون 3,2,1 زي الفكترا موديلات 2000 وبعضها فيها D بالاضافة لفتيس تيبترونيك زي السيراتو وبعضها فيها D بالاضافة لزرار اوفر درايف زي النيسان صني)

اللى توصلتله ان الاوفر درايف او مايسمى بوضع ال Ds مختلف تماما عن السواقة في وضع ال D

السواقة في وضع D دي السواقة العادية اللى كل الناس بتمشي عليها بحيث ان الجير بوكس بيسمح ان العربية تنقل من الاول للتاني والتالت والرابع هكذا وده بيعتمد على قوة الدوسة على البنزين كل ماتزيد دوستك على البنزين كل مايزيد التسارع ولو ماشي براحة بينقل بدري ممكن تبقى على ماشي على الرابع على سرعة 70 عشان يقلل استهلاك البنزين

وفي حالة الكيك داون بيسقط نقلة ويحرق عليها وبعدين ينقل للنقلة اللى بعديها

اما بالنسبة للاوفر درايف فده نظام عشان يدي العربيات الاتوماتيك نفس عزم وقوة العربيات المانويل

بمعنى انك لو ماشي على نمط ال D وعملت كيك داون وحرقت وال Rpm عند 4 سبت رجلك من على البنزين هتلاقي ان عداد ال Rpm نزل بشكل اتوماتيك ل 1 مرة تانية

وفي الدوسة التانية تلاقي العربية بدات من الاول وهتحتاج كيك داون تانية عشان العربية تجمع وال Rpm يعلى وده بياخد وقت وبيأخر عزم العربية عشان في كل مرة هتدوس على البنزين هيبدأ الماتور من عند الف لفة في الدقيقة ثم الفين وهكذا

اما لو ماشي على نمط Ds او مشغل زرار الاوفر درايف وحرقت وال Rpm عند مثلا 4 وسبت رجلك من على البنزين هتلاقي ال Rpm فضل زي ماهو ! ! طول مانت مادستش فرامل او هيقل بنسبة بسيطة جدا ! ! ! وبالتالي في الدوسة التانية هتلاقي الماتور بدأ من عدد لفات اعلى وده هيديلك عزم اقوى وتجميع اسرع وهتلاقي العربية اكنها عايز تطير من على الارض

وبالنسبة للعربيات اللى مافيهاش Ds هتلاقي الفتيس فيه حاجة من اتنين ودول بيقومو بنفس المهمة بالظبط وهي تثبيت ال Rpm وسرعة التجميع

اما هتلاقي فيها L,2,3 او هتلاقي الفتيس تيبترونك

في حالة لو الفتيس فيه L وده معناه الغيار الاول

2 = الغيار التاني

3 = الغيار التالت

العربية بتتحول من اتوماتيك لمانويل واكنك ماشي على الغيار الاول او التاني او التالت وهتفضل ماشي عليه لحد اما ماتنقل لغيار اعلى او اقل او ترجع لوضع D

وده بيديلك نفس الخاصية الموجودة في زرار الاوفر درايف او وضع Ds وهي تثبيت ال Rpm وانه مايسمحش لل Rpm انه يرجع لاف لفة في الدقيقة عشان تزود عزم العربية ويسرع تجميعها

في حالة لو العربية فيها فتيس تيبترونيك

نفس القصة العربية بتتحول لمانويل وال Rpm بيثبت في حالة الحرق وده بيديلك عزم اقوى وبيزود التجميع

العربيات الحديثة بيبقى فيها الاتنين Ds و فتيس تيبترونيك هتقول ازاي وانت لسه قايل ان الاتنين تقريبا واحد !

هقولك صحيح ان الاتنين بيعملو نفس الوظيفة تثبيت ال Rpm على العالي ولكن نمط ال Ds مش بيديلك حرية التحكم في النقلات بحيث امتى تنقل او امتى تسقط نقلة بعكس التيب تروينك او ال ( L,2,3 )

يعني بإختصار شديد :

الاوفر درايف او ال Ds :

1- بيمنع ال Rpm انه ينزل في حالة لو سبت رجلك من على البنزين وبيديلك نفس قوة وعزم تسارع المانويل عشان الماتور مايبقاش محتاج انه في كل مرة يرجع يلف بداية من الاف لفة في الدقيقة وتبقى محتاج تعمل كيك داون وكل ده بياخد وقت وبيقلل سرعة التجميع بعكس لو ال Rpm فضل عالي والماتور بدأ يلف من اربع او خمس الاف لفة في الدقيقة (L,2,3 نفس الخاصية ونفس الوظيفة )

2 - لو ماشي على نمط D بتبقى محتاج تعمل كيك داون عشان العربية تسقط نقلة وتجمع اسرع بعكس لو جايب على نمط ال Ds او الاوفر درايف او المانويل اقل لمسة على البنزين بتخلي العربية تجمع باقصى عزم وقوة الدوسة على البنزين مش بتبقى العامل اللى بيحدد قوة التسارع والتجميع (يعني لو جايب على المانويل مافيش حاجة اسمها كيك داون )

3 - بمجرد انك تدوس على زرار الاوفر درايف او على Ds العربية بتسقط نقلة بشكل مباشر للغيار المناسب فمش هتبقى محتاج للكيك داون

4 - في حالة استخدام (L,2,3) او المانويل (تيبترونيك) مش محتاج انك تسقط نقلة لانك خلاص حددت للفتيس اي نقلة انت هتمشي عليها L= الاول , 2 = التاني , 3 = التالت وهتبقى محتاج تنقل بشكل يدوي عن طريق تحريك عصا الفتيس

العربيات اللى مافيهاش اوفر درايف هتلاقي الفتيس فيه (L,2,3) لانها بتقوم بنفس المهمة (زي الياريس واغلب العربيات الاوتوماتيك )

العربيات اللى مافيهاش (L,2,3) هتلاقي فيها Ds وده نفس زرار الاوفر درايف وبيقوم بنفس المهمة (زي البيجو 307 واغلب العربيات الالماني عموما)

العربيات اللى مافيهاش لا Ds ولا (L,2,3) هتلاقي الفتيس تيبترونيك وبالتالي المانويل بيقوم بنفس المهمة (اشهر مثال السيراتو)

وممكن حضرتك تجرب بنفسك تكون ماشي على الوضع D وتسيب رجلك من البنزين وشوف ال Rpm وبعدها دوس تاني

وجرب نفس الموضوع في حالة لو انت جايب العربية على Ds او على المانويل (L,2,3) او من خلال الفتيس التيبتروينك هتلاقي فرق فظيع ! !

وفي حالة لو انت ماشي بدون الاوفر درايف وعلى نمط ال D فقط هتلاقي العربية بتنقل بدون اي مشاكل لكل الغيارات بداية من الاول للرابع

ولو مشغل الاوفر درايف العربية مش بتنقل الا لما الغيار يوصل لاعلى سرعة ممكنة فيه وقبل الريد زون مباشرة هتلاقي العربية نقلت

في حالة لو المانويل انت هتتحكم بنفسك في النقلات