برجاء الإفادة .. ضروري جدا ..خاص بأهل الأسكندرية

**aliabutaleb** · 17-06-2010 08:59 AM

المشاركة الأصلية كتبت بواسطة بحري

المنطقة دي صعب جدا تلاقي في فعلا مفروش باليوم لأن كلها أهالي وساكنين
أقرب مكان لها ممكن تلاقي فيه حاجة زي كده هي مدينة المستقبل في منطقة الساعة (أو دربالة)...منها تكون قريب للمواصلات الرئيسية ومنها في مواصلة من عند المدينة لشارع الشركة العربية..وفي أكتر من سمسار هناك...لو لسه لم تستقر على شئ وعاوزني أشوفلك حد هناك ترتب معاه تؤمرني
وسيبك من قصة العجمي دي لأنها فاشلة في الصيف

فعلاً، المسافة من العجمي كبيرة جداً وكمان بالمواصلات هاتلاقي عذاب رهيب
كنت داخل أقترح مدينة المستقبل زي ما د. بحري اتفضل واقترح
بس فيه الأقرب منها
عمارات كيروسيز اللي عند شارع الشركة العربية
ميزتها إنك مش هاتحتاج مواصلات لغاية مجمع المدارس
كلها 5 دقايق مشي وتوصل
وأكيد هاتكون أرخص من مدينة المستقبل بس تلاقي فيها مفروش
فيه اقتراحات تانية
زي عمارات عثمان اللي في شارع مصطفى كامل
برضة لو لقيت فيها هاتحتاج مواصلة واحدة لغاية مجمع المدارس، ميكروباسات العوايد.
وكمان عندك عمارات اسكندرية اللي في ميدان المطافي يمكن تلاقي فيها
وعندك جاردينيا اللي في شارع مصطفى كامل اللي تحتها فتح الله ماركت
وعندك عمارات الشركة المتحدة اللي عند الشهر العقاري في شارع أديب معقد
وعندك عمارات الأطباء اللي في أول شارع أحمد أبو سليمان من ناحية ميدان الساعة
كل دول هايكونوا مناسبين لك كقرب مسافة لو لقيت فيهم حاجة

دي منطقتي وكنت أتمنى أكون قاعد هناك حالياً كنت ساعدت حضرتك ولفيت معاك لغاية ما نلاقي حاجة.
أنا رايح في أجازة ليوم واحد بكرة إن شاء الله لو قدرت أجيب لحضرتك أرقام سماسرة من الأماكن دي هاقوللك.

وياريت لو تسمح تبعت لي رقمك على الخاص لسهولة إرسال الأرقام
أنا حاولت أبعت لك رسالة خاصة لقيتك مانع استقبالها

**بحري** · 17-06-2010 10:32 AM

المشاركة الأصلية كتبت بواسطة أبو حمزة

بس فيه الأقرب منها
عمارات كيروسيز اللي عند شارع الشركة العربية
ميزتها إنك مش هاتحتاج مواصلات لغاية مجمع المدارس
كلها 5 دقايق مشي وتوصل
وأكيد هاتكون أرخص من مدينة المستقبل بس تلاقي فيها مفروش

الله ينور يا أبوحمزة
دي فعلا لو فيها مفروش تبقى حل أكثر من ممتاز

**aliabutaleb** · 17-06-2010 10:37 AM

المشاركة الأصلية كتبت بواسطة بحري

الله ينور يا أبوحمزة
دي فعلا لو فيها مفروش تبقى حل أكثر من ممتاز

منطقتي يا دوك

**Ahmad_Nawwara** · 17-06-2010 04:42 PM

أخي الكريم أبو حمزة
ألف مليون شكر على المعلومات الذهبية القيمة دي ... بارك الله فيك ...كده يبقى ان شاء الله أنزل قبلها بيوم على الأماكن دي وأسأل وربنا معانا وان شاء الله نلاقي حاجة مناسبة ....
أشكركم ياأجدع وأحلى وأذوق رجاله

**hany_mohamed** · 17-06-2010 06:58 PM

تنور اسكندرية يا باشا
مش هقدر ازيد على ما قاله الزملاء انما برشح رأى الاستاذ شنورى فى انك تجد شقة فى سيدى بشر بحرى أو ميامى علشان تعيش فى جو اسكندرية وتقدر تخرج على الكورنيش و تبقى المعمورة والمنتزة قريبة ليك
أما عن الهانوفيل بالعجمى ومكان عملك فكأنك بتقول شقة فى شارع النجدة بدمياط والشغل فى مستشفى الصدر بالمنصورة
ويفضل لو أمكنك تأجر عربية فى فترة تواجدك تبقى 100%

**hany_mohamed** · 18-06-2010 07:25 PM

المشاركة الأصلية كتبت بواسطة hussein

طب يا جماعة اللى عايز يروه اسكندريه هو والعائلة ( انا و مراتى و ولدين سنتين و 5 سنين) 3 ايام كدا من يوم السبت يروح فندق ايه يكون على البحر و يكون سعر الغرفة مثلا 300 جنيه ف اليوم؟ و يكون الغرف و اسعه و نضيفة

لا أعتقد أن فيه فنادق بالسعر ده
بس ممكن تسأل فى فندق المحروسة و فنادق مثل مكة و المدينة المنورة وريجينسى
والافضل تشوف قرية فى الساحل الشمالى علشان تعرف تستمتع انما شواطىء اسكندرية زحمة جدا