تفاصيل التجديد و عمل معارضة للمخالفات .. للفائدة
اخواني الاعزاء بناء علي طلب من بعض الاخوة لمعرفة تفاصيل عمل المعارضة اثناء اجراء التجديد للسيارة اكتب هذا الموضوع لتسهيل الموضوع علي من يواجه هذا الموضوع و يحتاج للمشورة لانه لن يجد من يدله في المرور اثناء الاجراءات
- في البداية اذا اردت ان ينتهي الموضوع في يوم واحد (طبعا في حالة عدم وجود اي مخالفات ) لانه في حالة وجود مخالفات فأنك بلا محالة ستحتاج الي يوم آخر لتعارض فيه و لكن بأمكانك في هذه الحالة ان تستفيد من وقتك و طالما ذهبت للمرور يبقي تخلص كل اجراءتك و تبقي المعارضة فقط ليوم المعارضة . عليك ان تكون في المرور في تمام الثامنة
- لابد ان يكون معك بطاقتك الشخصية و رخصة السيارة و رخصة قيادتك الخاصة و ان يكون معك علي الاقل 5 نسخ من كل اثبات شخصية و قلم ازرق جاف و حوالي 100 جنيه خمسات و عشرات
- ستذهب للفحص في البداية و هذه اسهل الاجراءات فهي تشمل اخذ البصمة و رقم الشاسيه و الموتور و الفحص الفني و التشييك علي الطفاية و بالطبع للفني الخاص بالبصمة و الفني الخاص بالطفاية لابد من تظبيطهم لان دول بالذات لو ما ظبطهمش ممكن يعملوا مشاكل و علي فكرة كان فيه رأي للشيخ محمد حسان ان في هذه الحالة لا تعتبر راشي (بدون الدخول في تفاصيل ) بالنسبة للموديلات الحديثة لا يوجد اي قلق اثناء الفحص الفني
- تركن عربيتك و تذهب للادارة ففي البداية تدخل في اجراءات شهادة المخالفات و ستجد نفسك ماشي بقوة الدفع يعني بمجرد وصولك لاول شباك سيتم تسليمك لبقية الشبابيك و في حالة عدم وجود مخالفات يكون خير طبعا و بتروح علي تنفيذ الاحكام و تختم و بتدفع رسوم بسيطة و بتاخد شهادة براءة
في حالة وجود مخالفات قدامك حاجة من اتنين لو انت شايف المخالفات صح و انت فعلا ارتكبتها فممكن تديها لاي سمسار من اللي حيتلموا عليك عشان يجيبولك تخفيض و بتديله النصيب و اذا لقيتها كلها افتراءات و ليس لها اساس من الصحة فبتروح علي شباك اجراء المعارضة و بتدفع رسوم بسيطة برضه و بتاخد تصريح بميعاد الجلسة و تحاول تظبط الموظفة عشان تختارلك يوم يكون فيه قاضي كويس
بتاخد التصريح المختوم ده و بتصوره و بتروح تكمل اجراءات التجديد عادي جدا... يعني لو عايز تجدد 3 سنين تدفع ضريبة 3 سنين و تأمينها و لو حتعلق لوحات جديدة تدفع قيمتها اللي هي 150 جنيه و بتستلم تصريح مؤقت لغاية ميعاد الجلسة زي الترخيص بالظبط انما تاريخه حتي ميعاد الجلسة
- في يوم الجلسة تذهب صباحا مبكرا ايضا لانك ستجد رول طويل جدا تعرف رقمك في الرول و تقف في الطابور الطوييييييييييييييييييييي يييييييييييييييييييل جدا و تكون مجهز بطاقتك و عندما تصل لامين الشرطة تسلمه البطاقة و تخبره عن رقمك في الرول سيبحث عن ملفك و يخبرك بأنه تم التخفيض الي مبلغ كذا ( في حالتي كان التخفيض من 2750 الي 300 جنيه ) اذا كان التخفيض مش عاجبك تعمل معارضة تاني و هلما جره و ممكن في المعارضة التانية تقابل البيه القاضي و ممكن يخفضلك اكتر و ممكن ما يخفضش و ممكن يكون التخفيض اقل من المرة السابقة لانه بيخفض علي اجمالي مبلغ المخالفات من اول و جديد و ليس تخفيض علي المبلغ المخفض
المهم بتروح تسدد مبلغ المخالفات و دي مهزلة بكل المقاييس في مرور محرم بك و لاتوجد مراعاة لنساء او عواجيز و بكل اسف الكل خلطبيطة سائق الميكروباص و التاكسي مع الملاكي و النساء و الشيوخ و انت و دراعك بقي
بكل اسف لم اطيق السداد بهذا الشكل و ذهبت للنادي لاستكمال باقي الاجراءات و انا الان في انتظار استلام الترخيص الجديد يوم الاحد القادم ان شاء الله
اسف للاطالة و ارجو ان اكون قد افدت احدا او حتي الاخ الفاضل الذي طلب مني ذكر تفاصيل التفاصيل
