الموضوع: تفصيل ستائر كبس في طنطا (للشباب من طنطا والدلتا)

سلام عليكم

طبعا انا عربيتي مكنتش لاقيلها ستائر كبس خالص لأنهم مش بيعملو غير العربيات اللي منتشرة وبقالي فترة بدور علي حد يفصل ستائر

وكل ما ببقي في منطقة فيها حد بتاع كماليات بعدي علية اسأل لحد ما واحد في شارع الفاتح قالي علي واحد في حسن رضوان والتاني دة قالي علي واحد في ابن الفارض وكلهم طلعو مبيفصلوش بس بتاع ابن الفارض قالي علي واحد في أخر الحلو بيفصل وطلع فعلا بيفصل وعملتهم عندة من كام يوم

هو قالي ان المحل اسمة كركور وكتبلي اسمة علي ورقة واسم الراجل ... بس اكتشفت في الأخر ان اسمة كار كوول هههههه وكنت باعت اخويا يدور علية وفضل يسأل في الشارع فين كركور واتفضح

المهم المحل اسمة Car Cool في اخر الحلو من ناحية المرشحة تقاطع الإمام مسلم بتدخل يمين وانت رايح علي المرشحة وعلي ناصية الشارع ماركت اسمة الهندسية تقريبا

عملت طقم ستائر كامل اربع ابواب و زجاج خلفي كلة خفيف شوية عدا البابين الخلفي تقيل ودة بيفرق في السعر

التكلفة الأجمالية 130 جنية مرضيش يفاصل وغالي شوية بس مفيش خيارات

المهم الشغل طالع معقول مش وحش اللي مش عاجبني بس ان الستارة الخلفية مش محبوكة كويس والأبواب معقولين بس طبعا مش طالعين 100% يعني اقدر اقول 80% مثلا لأن في فرق بسيط في حرف الستارة للأبواب الأمامية لأنها عندي مسحوبة فا معرفش يطلعها مظبوطة قوي

بالنسبة للستائر نفسها الدرجة الخفيفة بتاع البابين الأماميين والزجاج الخلفي بتشوف منها كويس أما التقيلة فا الرؤية منها صعبة شوية

ومفعولها مع الشمس اقدر اقول كويس بس لو الشمس ضاربة في الوش بشكل مباشر بيبقي احسن الشماسة تتقفل علي الباب برضو لكن غير كدة هي مانعة حرارة الشمس بشكل معقول

في ملحوظتين عليها فقط وهي علي الستائر بشكل عام

الستارة الخلفية التقيلة بتمنع دخول الهواء تماما و الأمامية بتمنعة بنسبة 90% بالأضافة لأن الهواء بيعمل صوت في الستارة لو ماشي بسرعة وعلي حسب فاتح الإزاز قد اية لكن بيدخل من الفتحة اللى سايبها للمراية

في المرفقات بعض صور للستائر

ودة ملف فيديو بيوضح الرؤية و الصوت والزجاج مفتوح ولما قفلتة بس مفرقش قوي لأن اليمين كمان كان مفتوح برضو

YouTube - ‫ط³طھط§ط±ط© ظƒط¨ط³‬‎

مع العلم ان مخالفة الستائر هي نفس مخالفة الفامية يعني ممكن الرخصة تتسحب وتدخل فحص وممكن تشيلها وتدفع تصالح فوري حسب مزاج الباشا ، بس الميزة فيها انها سهلة الفك والتركيب مش زي الفامية