صعوبة الامتحنات في الثانوية العامة

**Kareem_A** · 19-06-2010 01:37 AM

المناقشة في الموضوع دة جميلة و مهمة جدا جدا

و عندي كلام كتير في الموضوع دة عايز اقوله , فآسف لو كنت هطول عليكم

دلوقتي انا طالب في تاني سنة IG الهوا النظام البريطاني , و بعد مقارنة مناهجنا بمناهج ثانوية عامة , فانا بحمد ربنا ان انا في IG

انا بختار المواد الانا عايزها (في كل المواد الممكن تتخيلها) و الممكن تساعدني في الجامعة او في مجال الشغل الانا عاوزه

المناهج عايزة حد ذكي , يعني التفكير هوا البينجح مش الحفظ مطلقا

انا من المواد الخدتها هي IT , و والدي كان بيذاكره معايا عشان دة مجال شغله و بيقولي ان الحاجات الانتوا بتاخدوها هي من اساسيات شغلنا و عندي ناس كتير في المكتب محتاجين كورس زاى دة

و في ناس بتفحت نفسها مذاكرة و في الآخر بتجيب درجات زاى الزفت , و ناس بتذاكر اسبوعين قبل الامتحان و بتخش تقفل , لأن الامتحان بيعتمد على مدى فهمك للمنهج مش حفظه

اما عن موضوع كليات القمة , فصدقوني يا جماعة الموضوع مش عشان القاب تمامااااا

الفكرة ان هما دول الي ليهم شغل في مصر و مش كل ناس تقدر تسافر بره

انا واحد هموت و اخش فنون تطبيقية في الGUC , بس اهلي مش مأيدين الفكرة لأن شغلها صعب في مصر و بذات المجال الانا عايزه و هو تصميم صناعي (Product Design)

لذلك هما نفسهم اخش هندسة , لأن الموضوع مش هيبقى صعب في الشغل و هما هيعرفوا يساعدوني في الموضوع دة كويس

غير ان انا برده بحب معماري , و انا من النوع المش بيعرف يطلع كل العنده غير في الحاجة البيحبها

للاسف ثانوية عامة مناهجها عقيمة و المعلومات قديمة و بتقتل الابداع في الطالب و بتفرض عليه فكرة الحفظ

و بصراحة الطلبة في الثانوية عامة بيصعبوا عليا لأن كل المجهود دة ..... في الهوا

و آسف جدا لو كنت أطلت عليكم

**بحري** · 19-06-2010 01:49 AM

المشاركة الأصلية كتبت بواسطة terrible_darsh

انا فاكر لما كنت فى ثانوية عامة كان امتحان الجيولوجيا فيه تعريفات اول مرة اسمع عنها لدرجة اننا كلمنا الاستاذ دقيقتين فى اللجنة ماكنش عارف يجاوب تخيلوا !!

هو ده العادى بتاع الثانوية العامة , بس فى مصر كله محصل بعضه .

لو كنت في ثانوية عامة دفعات 96 و 97 و98 فده كان طبيعي جدا والمدرسين كانوا بيدخلوا الفصل يخترعوا معانا في الجيولوجيا....محدش كان يعرف عنها حاجة...كان بيدرسها مدرسو الأحياء..وكان عندنا مدرس لذيذ كان يبقى ماسك الكتاب وبيقرأ منه شوية كلام مرصوص ورا بعض بدون فواصل....وفي الآخر يتنهد ويقول: كلام كبير والله

**Terrible_DaRsH** · 19-06-2010 02:07 AM

المشاركة الأصلية كتبت بواسطة بحري

لو كنت في ثانوية عامة دفعات 96 و 97 و98 فده كان طبيعي جدا والمدرسين كانوا بيدخلوا الفصل يخترعوا معانا في الجيولوجيا....محدش كان يعرف عنها حاجة...كان بيدرسها مدرسو الأحياء..وكان عندنا مدرس لذيذ كان يبقى ماسك الكتاب وبيقرأ منه شوية كلام مرصوص ورا بعض بدون فواصل....وفي الآخر يتنهد ويقول: كلام كبير والله

ههههههههههههههههههههههههه هه .

لا انا مش قديم كنت دفعة فى الالفية الثالثة , كنا 7 قاعدين فى اللجنة و المراقب سابنا و قالنا ادى دقنى لو حليتوا حاجة حلينا الامتحان كله و جينا عند التعريفات و قاعدين كلنا فوق بعض و لا فاهمين حاجة .

فى الخباثة كلمت الاستاذ و متفائل جدا جدا جدا بقي و بقوله ايوه يا حبيبي قولى التعريف الفولانى و الفولانى ..

قالى الكلام ده فى الامتحان يابنى ؟؟

و انتهت على كده , فكل شيء فى الثانوية العامة متوقع , و نصيحة و الله لطلاب الثانوية " عسي ان تكرهوا شيء و هو خير لكم "

يعنى اللى ربنا كاتبه احسن من اى تفكير فى دماغ البنى ادم .

**human** · 19-06-2010 02:11 AM

انا مش فاهم ليه وجع القلب ده
و كمان الاباء هما اللى عاملين المشكه البلهاء ديه
تشوف كل واحد عمال يشتم و يصرخ و لمصلحه مين الامتحان صعب وشوفوا الوزير و عينه عشوائيه و بكاء و عويل و كلام عقيم
الامتحان لو صعب هيبقى على الكل و لو سهل برضه على الكل
مش فاهم ليه الاحساس اللى بيربوه للعيال انهم لازم يخلصوا الامتحان كله و يقولوا سهل
مالما بيخشوا الجامعه لو خلصوا امتحان واحد على بعضه بيبقى اعجاز و لو الامتحان مايتشفش ماحدش بيفتح بقه

لازم نظرتنا للاشياء تتغير و نبطل نزرع الاسلوب ده فى ولادنا

**الغزالى** · 19-06-2010 02:22 AM

المشاركة الأصلية كتبت بواسطة human12

انا مش فاهم ليه وجع القلب ده
و كمان الاباء هما اللى عاملين المشكه البلهاء ديه
تشوف كل واحد عمال يشتم و يصرخ و لمصلحه مين الامتحان صعب وشوفوا الوزير و عينه عشوائيه و بكاء و عويل و كلام عقيم
الامتحان لو صعب هيبقى على الكل و لو سهل برضه على الكل
مش فاهم ليه الاحساس اللى بيربوه للعيال انهم لازم يخلصوا الامتحان كله و يقولوا سهل
مالما بيخشوا الجامعه لو خلصوا امتحان واحد على بعضه بيبقى اعجاز و لو الامتحان مايتشفش ماحدش بيفتح بقه

لازم نظرتنا للاشياء تتغير و نبطل نزرع الاسلوب ده فى ولادنا

وهواا فى حد يا استاذ طارق فى الامتحانات بتاع الثانوية السنة قال ان فى امتحان عدل شوية غير العربى
لو وفى انا عايز اعرف ها يجيب كام
ولو جاب مجموع عالى يبئى عبقرى فى ظل الى عمال يتقال ويتعاد على الامتحانات

**digi_7E** · 19-06-2010 12:55 PM

المشاركة الأصلية كتبت بواسطة esraatefa

انا لما كنت فى الثانوية العامة السنة اللى فاتت والله كنت بذاكر لما يجيلى مزاج انى اذاكر ومكنش حد يقعد يقولى ذاكرى انتى فى ثانوية عامة ومفبش خروج ولا الكلام دا خالص (على عكس مامت اصحابى)لدرجة انى يوم امتحان العربى كنت بخرج مع اهلى نأكل برة :m_yes[1]:والحمد لله فى الاخر جبت 97% والله من غير غش ولا كلمة
واعتقد السبب ان مفيش ضغط نفسى كان عليا زى ما المعظم بعمل مع اولاده بدون قصد
والامتحانات دى حظظظظظظ

وهو دا الصح فعلاً

انا برضه اهلي كانوا كدا ... بس انا في الآخر جبت 92%
في ناس قدرتها تجيب 100% لكن الأهالي هي اللي بتعملهم ارهاب

**KHALED AYMAN** · 19-06-2010 01:30 PM

المشاركة الأصلية كتبت بواسطة esraatefa

انا لما كنت فى الثانوية العامة السنة اللى فاتت والله كنت بذاكر لما يجيلى مزاج انى اذاكر ومكنش حد يقعد يقولى ذاكرى انتى فى ثانوية عامة ومفبش خروج ولا الكلام دا خالص (على عكس مامت اصحابى)لدرجة انى يوم امتحان العربى كنت بخرج مع اهلى نأكل برة

والحمد لله فى الاخر جبت 97% والله من غير غش ولا كلمة
واعتقد السبب ان مفيش ضغط نفسى كان عليا زى ما المعظم بعمل مع اولاده بدون قصد
والامتحانات دى حظظظظظظ

97 % من غير غش ؟؟؟؟؟؟؟
ده الغش ده اساس الدرجات النهائيه ...
فعلا زى ما انتى قلتى ...
الضغط النفسى هو السبب ان الناس تتلخبط ..
اانا لحد دلوقت بشوف معانا بنات فى الجامعه بيطلعو يعيطو من الامتحان ...!!!
بس برده مينفعش الاهل يسيبوها خالللص ..
يعنى انا مثلا فى اولى ثانوى ...
تقريبا مكنش اهلى عارفين ايه المواد الى عندى ...
عشان كده شلت ماده فى اولى ثانوى ..و امتحنت فى الصيف

**elassar2010** · 19-06-2010 01:42 PM

كل سنة الطلاب يتطلعوا من الامتحان عياط وصريخ والاسعاف تيجى اللجان تشيل ضحايا صعوبة الامتحان

ويوم النتيجة تلاقى ال10 الاوائل جايبين 99% ازاى؟
دة غير الناس العادية تلاقيهم كلهم فوق 90%

**acceleration** · 19-06-2010 03:59 PM

مممممممم...
طيب هو مبدئيا انا فى ثانوى عام السنة دى وبمتحن الامتحانات اللى بيقولوا عليها (مجزرة) والآباء طالعيين بيدعوا على الوزير و التعليم واللى...و اللى... واللى...
الموضوع بسيط جدا المنهج بتاع الثانوية ده بيعتمد على 70% حفظ خالى من الفهم تماما معظمها بتبقى معلومات من سنة 80 ق.م او نظريات ملغية وحاجات من العينة دى او مثلا فى العربى بتبقى مثلا القصة دى طوييييييييلة وابقى تعالى قابلنى لو طلعت منها بحاجة مفيدة (مثال: قصة عنترة بن شداد )=كمية احداث+مفردات كلمات عمرك ما هتسمعها فى حياتك+مطلوب منك تدخل كل ده جوا دماغك الى جانب النحو والبلاغة و القراءة والنصوص ووووو......
وفى حاجة تانى بقى و دى اللى غايظانى فعلا مادة زى الرياضة بيتهيألى معروف يعنى ان رياضة= فهم و ذكاءو تشغيل دماغ
انما دلوقتى اللى بيحط الامتحان ده على مدى ال30 سنة اللى فاتوا دول (ايوة انا مكنتش جيت بس شفت امتحانات السنين اللى فاتت) سيادته حول الامتحان فى الرياضة من وسيلة لقياس درجة فهم الطالب لنوع من التحدى السخيف لدرجة ان الرياضة اتحولت لمادة حفظ لأن الناس لجأت انها عشان تعدى من التحدى السخيف اللى هوا الامتحان انها تحفظ افكار المسائل اللى وردت قبل كدا لأن الباشا ابتدا انه يحط الامتحان على نمط حاجة كدا زى ما تكون انتقام بالتالى حتى مادة الذكاء فقدت معناها.....
...المهم بقى ان اللى حصل السنة دى ان الوزير راجل كويس جدا جدا و 10 على 10 وجاى ومعاه افكار ممتازة جديدة بس للأسف لما جه يبنى بنى بيته على ارض زلازل بمعنى انه ابتدى تنفيذ تعديلاته فى الامتحانات السنة دى ونسى تماما انه ايوة فعلا امتحاناته دى هى النمط اللى المفروض يكون عليه الامتحان اللى بيمز الطالب حسب قدرة ذكائه بس الناس اللى داخلة تمتحن الامتحان ده التعليم اللى اتلقته طووووول السنة مكنش بيعتمد على الذكاء بل كان اشبه بنظام يحول الطالب لحاجة شبه الحمار كدا (معلش بس ده حقيقة) يحفظ يحفظ يحفظ وممنوع من الفهم لأنه لما يفهم مش هيحل التحدى (الامتحان)... فالمفروض ان الاصلاح بتاعه كان يبتدى من بداية السنة و من نظام عرض المعلومة للطالب الاول لكن مش يروح يطلب منه حل امتحان عمره ما شاف زييه قبل كدا

الموضوع: صعوبة الامتحنات في الثانوية العامة

LinkBack

أدوات الموضوع

عرض

-

-

-

-

-

-

المواضيع المتشابهه

اخبار الثانوية العامة معاكم ايه

محضر غش فى اول يوم الثانوية العامة ... وحاجة تضحك ....

مأساة الثانوية العامة

متعهد نتيجة الثانوية العامة ... مين ؟

الكلمات الدلالية لهذا الموضوع

المفضلات

المفضلات

ضوابط المشاركة