الموضوع: انا رايح بكرة و ما حدش عبرنى

تأملت اليوم قبل قراءة هذا الكلام في مصير فيات مع أوماترا واقتنعت إنه مفيش فايدة..

يا اخوانا الناس دي دخلت على توكيل الفيات الملاكي غلط وعايزين يبلطجوا وبس.

لن يدعم التوكيل سياراته بجهد تسويقي يضمن سعر إعادة البيع

الموضوع ده مش في دماغهم

والكلام في التحسن يكدبه إنهم مابيبعوش غير بونتو بمشتقاتها دلوقتي

هو لا مؤاخذة فيه واحد بخيل بيتغير؟

انا كده بفكر جديا اني الغي الحجز بتاع الايفو
انا ماليش في المرمطه ديه
اهو اشوفلي عربيه اي كلام و توكيلها محترم احسن ماجيب عربية احتاس بيها.

طب ماهو كان فيه قبل كده رد الاستاذ ماجد و رد مهندسه دينا و كانوا كمان لنفس الشخص صاحب الشكوي(Dr.Halawa) و اتعمل فيه كده
امال هيعملوا ايه في باقي الناس؟؟؟؟؟
الواحد بيجيب عربيه زيرو عشان يريح دماغه من الميكانيكيه
بس الواضح ان اللي بيجيب فيات بيدفع و بيتعب اكتر بكتيير.

هايبحث المشكلة
هوايات اللينيا هاتفضل مكسورة, البونتو هاتفضل تنتش, و غيره كتيير
و كل سنة و انت طيب
كل لما اتهبل فى عقلى و أقرر أروح هناك, تحصل حاجة و أقول ماله أسطى بلية زى الفل

المشاركة الأصلية كتبت بواسطة dr. Halawa

انت متخيل ايه طبعا
رحت ما لقيتش استاذ طارق و لا دينا كلمتها قالتلى قول لمدير الصيانة محمود ابو زيد قعدت احكيله حاضر و بتاع و هاشوف و نزل خلاهم يدخلونى فضلت ملطوع لحد 5 (انا واصل 2.5) قاعد اسمع الناس بتدعى عليهم و تتخانق معاهم (هاحكيلكو على الناس بعدين) العربية كانت بتنتش و مدية engine failure مسحوه ما رجعش و بس هو ده اللى عملوه قلتلهم العربية لسة بتقطع و تنتش قالولى سيبها و روح بتاكسى على حسابنا و ها نبعتهالك (اى اشتغالات انا قايله انى مسافر) بس الصراحة قابلت حد بيفهم باشمهندس شريف بتاع الكهربا مش الاستقبال و جرحولى التابلو و شحموه تانى رغم انى قلت للراجل المدير يقولهم ياخدو بالهم و قلت للعامل ان المهندس لؤى فى الدقى عملها بمفتاح عريض بمنتهى السهولة قاللى اصله ممنوع!!؟ يعنى من الاخر رحت و جيت ما عملوليش حاجة الا كتر الف خيرهم ما دفعونيش حاجة (ضحكوا على ب30 جنيه يعنى)
احكيلكوا بقى على الناس اللى شفتها هناك
1-واحد معاه لينيا 2009 و قاعد يولول انه فى سنة و شهرين دفع 10000 جنيه صيانات و بتاع
مغيرين له طنابير عند 18000 كم وداها عند واحد قاله ممكن تتخرط و شايلها عنده ستبن غيرو له سيور و بلية شداد طبعا عند 40000 كم و كانو عايزين يغيروا طنابير تانى!!
العربية الكهربا مهيسة يدى نور عالى التكييف يفصلو حاجات غريبة كدة و هو ده اللى كان موديه اصلا طبعا الصيانة خلصت 1.5 و العربية فضلت مركونة برة لحد 3 و بعديها كشفوا عليها و قالوله بكرة بقى تيجى من النجمة (الواد كان محروق دمه رغم انه مهذب جدا) فضل قاعد عندهم 9 ساعات و فى الاخر قالوله على الحساب اكتر الف و نص عن الكلام الأول (كانهم فكة) و الواد اضطر يروح يسحب فلوس و ييجى و ما عرفش يتصرف فى المبلغ كله عملوله خصم 60 جنيه بعد الخصم الأول
2- راجل كبير كان معاه لينيا كان قاعد يتريأ عليهم و على نظامهم و فطسنا من الضحك فعلا العربية فى الغالب مرمية فى البارك و ما حدش عارف هى فين و الصنايعية قاعدين يتمشوا حوالين العربيات طب بيورونا ليه ياخدوهم ورا ستارة سودة و يريحونا بلاش حرقة دم
3- واحد كان معاه ع ربية زى بتاعتى (اول مرة أشوفها هناك) و بفتحة سقف كمان 2006 عاملة 20000 بس و رايح يعمل الصيانة فا بيقول للمهندس و السيور ايه نظامها؟ كأنه ما صدق احسن لك تتغير عشان بقالها من 2006 عشان الموتور بعد الشر و حاجات كده بس عجبنى قاله لأ برده
4- واحد قالوله العربية ها تخلص 2 و استلمها 5 برده كان قاعد يصوت من المواعيد
من الاخر حاجة تحرق الدم تقريبا كان فى زى مظاهرة فى اودة الحسابات دى بس تريقة الراجل الكبير كان قاعد يتريق عليهم و الناس تضحك

يوم الحرية يوم ان شاء الله م ابيع عربيتى واجيب هيونداى او كيا او الحاجات المنتشرة فى السوق بتعنا

انا ما سافرتش و هاروح بكرة ان شاء الله و اقابل الولد بتاع اللينيا ده تانى
احكيلكو عنه اكتر بعد اخر صيانة راح عند ميكانيكى لقى العفشة مفكوكة خالص و بتجيب معاه ربط من كل حتة (بيفكرك بمين يا يوكو)
والمهندس الظريف كان قاعد يتريأ على تقفيل اللينيا و بيقوله تلاقى الضفيرة جت حتة منها تحت الدبرياج فسلكة هربت و لازم يتشيك على الضفيرة كلها و بيضحك بس هو عدل كلامه الصراحة مش تريأة و قاللى انت و حظك و انه كان شغال فى اسبيرانزا قبل كده و شاف عربيات كملت 80000 كم من غير و لا مشكلة و عربية جابت سير كاتينة و موتور بعد 700 كم بس

المشاركة الأصلية كتبت بواسطة Moe86

هايبحث المشكلة
هوايات اللينيا هاتفضل مكسورة, البونتو هاتفضل تنتش, و غيره كتيير
و كل سنة و انت طيب
كل لما اتهبل فى عقلى و أقرر أروح هناك, تحصل حاجة و أقول ماله أسطى بلية زى الفل

مع كامل احترامى و حبى للبونتو كلاسيك

ايه التكنولوجيا العويصة اللى فيها اللى مخلاية مركز الصيانة مش عارف يعملها !!!
عربية بتنزل من اول التسعينات ازاى مش عارفين يظبطوها ؟؟
الا لو عارفين و بيلفوا و يدوروا علشان ما يغيروش حاجة فى الضمان
المفروض الكنترول يتراجع و نظام الحقن و الحساسات كلها تتراجع و اللى بايظ يتركب غيروه
و عيب بصراحة اوى اللى هما بيعملوه فى الناس ...حاجة تكسف
و كمان المفروض حضرتك تجرب العربية عندهم لو ما اتظبطتش ارفض استلامها و بلغ حماية المستهلك و خلى الدنيا تتقلب

انا مش عارف حايعملوا ايه مع المكن التيربو لما يقدم شوية و يبتدى يحتاج صيانة بجد