تسلم ايدك على الكلام الجميل ده ,
وبعد اذنك احب اضيف بس بعض النقاط الهامة ايضا عشان يبقا كل حاجة موجودة فى الموضوع عشان الاستفادة الكاملة للاعضاء
1-حاول تستلم العربية بالنهار افضل من الليل عشان تبص عى صاج العربية وتطمن انه خالى من اى خرابيش او خبطات
2-شيك على الزجاج الكهرباء كله , وتاكد من فتحه وقفله , و تشوف هل فى صوت تزيق او اى مشكلة فى الزجاج لقدر الله
3-شوف الكاسيت شغال ولالا
4-اسال على الضمان بتاع العربية وضمان الكاسيت والكتالوج بتاع العربية
5- شيك على الولاعة بتاعت العربية وطفاية السجاير
6-شيك وبص على المياة بتاعت العربية
7- اتاكد من وجود الاستبن (الكاوتش الاحتياطى )
8-نبص على شنطة العدة
9- نقعد على الكراسى اللى قدام ونحرك فيها لقدام وكمان لورا عشان نشوف هل فيها اى مشكلة ولالا , وكمان احزمة الامان
10-تشغيل الانوار كلها ونجربها سواء الانوار الداخلية جوة العربية من نور الصالون والطابلوه ومن بره الفوجات والكشافات الامامية ولمبة الاستوب والفوانيس الخلفية
11-تتاكد من عمل المساحة وتشغل المياه بتاعت المساحة كمان
12-تفتح الابواب الاربعة والكابوت والشنطة وتشوفهم بيفتحوا ويقفلوا بسهولة ومفيش مشكلة فيهم ولالا
13- نتاكد من ان السنتر شغال ونتاكد من الريموت شغال ولالا
14-ركز فى استلام المفاتيح , معاها مفتاحين وريموت
15-نبص على عداد الكيلومتر واهم حاجة انه لايزيد عن 70 كيلو وكدا كتير كمان
16-التاكد من ان التكيف شغال ,لانك حتشغله بعد 1000 فتكون مطمن ان مفيش مشكلة فى المروحة او تلاقيه مش شغال اصلا ,
وطبعا كفائته مش حتكون قوية لان العربية لسه جديدة ومش حيبان تبريده فى اللحظة دى لانك حتشغله لمدة دقيقة او اتنين بالكتير عقبال ما ترغى مع البائع وتلاهيه ,المهم عشان بس تكون مطمن ان كل حاجة ميه ميه
وتاخد بالك هل فى اى قلق وهى واقفة ولالا مع تشغيل التكيف
17- اتاكد من ان الماتور صوته ناعم وهادى فى بداية التشغيل
18-حرك الدريكسيون يمين وشمال عشان تتاكد من عدم وجود اى مشكلة , وكمان شوف ظبط الدريسكيون لفوق ولتحت اخباره ايه
دول اهم النقاط اللى تركز عليهم وانت بتستلم
وياريت لو حد عنده اضافة تانية يمدنا بيها وجزاكم الله خيرا
وتقبلو تحياتى
المفضلات