الموضوع: الى خبراء 128 لاتبخل على بالنصيحه

انا عندى معلومات خفيفه كده لانى معايا واحده موديل 90 بص هقولك اللى اعرفه كله اولا اهم حاجه هى المياه لازم تبص على المياه فى الرادياتير دى اهم حاجه لازم تكون عارفها والفتيس ممكن يرخم معاك شويه يعنى تيجى تجيب مارش مايجيش معاك من اول مره وتحس انه معلق فى حاجه ومش راضى يرجع للخلف خالص بص لو لاقدر الله حصل معاك كده خليك حنين معاه وحاول تجيبه تانى بالراحه عشان متبوظش المعلقه بتاعته وتابع البطاريه كويس يعنى شوف مثلا النهارده العربيه بتدور معاك كويس بكره بقت تغلبك شويه على ما تدور يبقى اكيد البطاريه عاوزه تتزود مياه او اى سبب اخر المهم اى حاجه تحصل او تحس ان العربيه مش مظبوطه معاك على طول تشوف فى ايه عشان متتعبكش بعد كده واى استفسار انا فى الخدمه فى حدود الى اعرفه

السلام عليكم
بص يا باشا اولاً قبل كل شىء مبروك على العربيه ثانياً اعمل الصيانه بتاعتها قبل ما تبتدى تتعلم عليها وهى تغير سير الكاتينه والدينمو تغير طقم كهرباء تغير ترس الزيت تغير فلتر هواء وفلتر بنزين و فلتر زيت مع تغير الزيت اكشف على تيل الفرامل الأمامى والخلفى والى خلصان او على وشك غيروا بالمره وانت عند الميكانيى تغير مياه الرادياير وعمل غسيل لدورة المياه فى اى محطه او عند فنى رادياتيرات وتحط مياه خضراء هات مياه موبيل ماتجبش الأنواع الرخيصه عشان هتريح دماغك بعد كده من موضوع السخونيه فى الصيف وحاول تغير ثرموثتات الرادياتير وتجيب واحد 60/85 لحد متخلص تعليم السواقه عشان طول ما انت بتتعلم العربيه هتسخن منك عشان رجليك هتكون ثقيله عليها فى الأول لو مافيهاش مفتاح لتشغيل المروحه من الداخل اعمل واحد اسفل التابلوه لو عملت الى انا قولتهولك اعتبر نفسك راكب عربيه حديثه مش 128 غير انك لو اهتميت بمواعيد الصيانه بالورقه والقلم زى ما انا عامل لو عاوز تسافر انزل دور عربيتك وسافر وصدقنى كل الى انا قولتهولك مش هيكلفك اكتر من 250 او 300 جنيه بس هترتاح ومش هتعطل فى الطريق لمدة 15000 كيلو على الأقل

اولا اشكر كل اللى رد ويارب يكون ده فى ميزان حساناتكم بس ليا سؤال

استنى لما اتعلم واعمل الحاجات دى على نضافه وطبعا مش هستنى كتير يعنى عشر ايام كده على ما اتعود على العربيه والا اعملها على طول واتكل على الله

تانى حاجه لو انا هاغير عفشه العربيه هاتكلف كام لانى حاسس انى لحد ما اتعلم هاكون كسرتها

هو انت يا عم ليه مقدر البلاء قبل وقوعه

المشاركة الأصلية كتبت بواسطة mohamed9999

هو انت يا عم ليه مقدر البلاء قبل وقوعه

ياباشا والله ابدا بس انا كنت عاوز اعرف اصلى باخد مطبات فيها على ابوه والله يعنى باختصار اخوك جديد فى الكار

وشكرا لكل اللى رد

السلام عليكم

بصوا ياجماعه انا عملت حمله صيانه امبارح وهاقول انا عملت ايه

الصبح روحت للكهربائى غيرلى سير الدينامو وظبطلى الانوار وقالى الدينامو حالته كويسه وقالى كده كهرباء العربيه تمام

بعد الضهر روحت لبتاع العفشه قالى العفشه محتاجه شويه شغل محتاجه مقصين وبطاحه وكاوتش مش عارف ايه كده وقالى ممكن تجيبلها جوز كبالن وقالى هاربطهالك لحد ماتجيب الحاجه وامشى وماتخفش

بعد العصر روحت للميكانيكى كنت واخد معايا تيل فرامل امامى وتيل خلفى وسير كاتينه ركبهم وركب كمان طقم بوجيهات وقالى كده تمام

بصراحه كنت ناوى اروح بالليل عند السروجى اصله قدام بيتنا بس ماقدرتش

هاروحله النهارده انشاء الله

ياترى فى حاجه تانى المفروض تتعمل والا كده تمام ؟

والف شكر على نصائحكم الغاليه

المشاركة الأصلية كتبت بواسطة medo980

السلام عليكم
بص يا باشا اولاً قبل كل شىء مبروك على العربيه ثانياً اعمل الصيانه بتاعتها قبل ما تبتدى تتعلم عليها وهى تغير سير الكاتينه والدينمو تغير طقم كهرباء تغير ترس الزيت تغير فلتر هواء وفلتر بنزين و فلتر زيت مع تغير الزيت اكشف على تيل الفرامل الأمامى والخلفى والى خلصان او على وشك غيروا بالمره وانت عند الميكانيى تغير مياه الرادياير وعمل غسيل لدورة المياه فى اى محطه او عند فنى رادياتيرات وتحط مياه خضراء هات مياه موبيل ماتجبش الأنواع الرخيصه عشان هتريح دماغك بعد كده من موضوع السخونيه فى الصيف وحاول تغير ثرموثتات الرادياتير وتجيب واحد 60/85 لحد متخلص تعليم السواقه عشان طول ما انت بتتعلم العربيه هتسخن منك عشان رجليك هتكون ثقيله عليها فى الأول لو مافيهاش مفتاح لتشغيل المروحه من الداخل اعمل واحد اسفل التابلوه لو عملت الى انا قولتهولك اعتبر نفسك راكب عربيه حديثه مش 128 غير انك لو اهتميت بمواعيد الصيانه بالورقه والقلم زى ما انا عامل لو عاوز تسافر انزل دور عربيتك وسافر وصدقنى كل الى انا قولتهولك مش هيكلفك اكتر من 250 او 300 جنيه بس هترتاح ومش هتعطل فى الطريق لمدة 15000 كيلو على الأقل

اولا الف مبروك
ثانيا انا مع ميدو في كل اللي قاله بالحرف الواحد وياريت تعمل اللي قاله اول ما تركب العربيه مش لما تتعلم
ميدو ماسبليش حاجه اقولها بصراحه الراجل جبلك المفيد بس فيه كام نقطه كدا عايز اقولهالك نصيه وياريت تعملها
1- تجيب نوته صغيره تكتب فيها عملت ايه في العربيه من ميكانيكا وكهربا بالتاريخ ورقم العداد وخصوصا (حط مليون خط) تغيير الزيت وسير الكتينه وياريت ماتتاخرش علي الكتينه عشان كله علي بعضه تقريبا ب 30 جنيه بس لو اتقطع فيها فيلم
2- عينك وانت ماشي دايما تكون علي عداد الحراره عشان ساعات العربيه بتقل باصلها والمروح مش بتشتغل فلو الحراره عليت بردو فيها فيلم واياك لو الحراره عليت تفتح الريداتير. اصبر عليها خالص لغايه لما تبرد وافتح حته حته عشان تدخل هوا الاول جوا الريداتير وخلي بالك من فوران الميه وزود ميه والعربيه شغاله (لازم تكون العربيه شغاله)
3 - من راي اجل موضوع الفشه ده لغايه لما تتعلم وبعد كدا اعمل اللي انت عايزه فيها الا للضروره القصوي بلاش تفتحها علي نفسك دلوقتي
4- مبروك مره تانيه ويكفيك شرها