عضو جديد وعندي سؤال

**Walidghali** · 17-02-2008 08:37 AM

السلام عليكم يا أهل الخبرة
أنا عضور جديد في المنتدى الشديد ومبسوط جدا من الخبرات الممتازة اللي عند الجروب وبصراحة انا عرفت معلومات كتير جدا في اسبوع واحد هو عمر اشتراكي في المنتدى
وبسأل بما انكم أهل الخبرة عاوز اشتري عربية لانوس زيرو وعاوزكم تقولوا لي ايه رايكم وايه السعر المناسب دلوقتي للعربية علما باني عاوزها لانوس اس فول اوبشن
شكرا لكم جميعا

**hazem_khidr** · 17-02-2008 08:41 AM

اهلا و سهلا معانا يا استاذ وليد:
بالنسبه للانوس ف انا رايي تحاول تزود و تجيب افيو احسن لان اللانوس خلاص بقت قديمه و موديلها حينتهي السنادي و مش معقول تجيب عربيه زيرو انهارده بقلها 10 سنين بتنتج مش حتلاقي اي تميز خالص

**Walidghali** · 17-02-2008 08:49 AM

شكرا جزيلا أستاذ حازم على سرعة الرد انت عندك حق انا كنت تقريبا خلصت اجراءات شراء الافيو بس للاسف سعرها قفز قفزة جامدة جدا (77 الف) بدون مبرر في رايي واللي انا شفته بعيني ان موتور الافيو 1500 هو هو موتور الدايو اذا يبقى الفرق ده انا بدفعه في الشكل الجميل للأفيو
أرجوك لو تخالفني في الرأى توضح لي زيادة لاني انا معنديش خبرة كبيرة مجرد بتعلم منكم والله
وشكرا مليون مرة لردك السريع

**MMamdouh** · 17-02-2008 10:01 AM

77 الف؟؟ كتيييييير اوى

لو كانت 70 كانت بقت قريبة و طبعا الافيو احدث بس كدة الفرق كبير اوى

MMamdouh

**Walidghali** · 17-02-2008 01:25 PM

يعني اتوكل على الله رب العالمين واجيب دايو
ودعواتكم جميعا معايا
شكرا جزيلا

**Nile_Storm** · 17-02-2008 10:33 PM

متمسك العصايه من النص و تجيب فيرنا 1600 زيرو ممتازم ممتازم ممتازه
و شكلها احدث و موتورها تحدث بكتير من دايو لانوس

**Walidghali** · 18-02-2008 10:20 PM

يا جماعة الخير
كدة العملية وسعت معايا واحترت اخر
لانوس ولا أفيو
فيرنا ولا فيفا
أسعارهم مختلفة بس مش بعيد عن بعض باستثناء الافيو هى اغلاهم
رايكم يهمني جدا جدا
السلام عليكم

**marsguy** · 19-02-2008 05:59 AM

السلام عليكم ورحمة الله وبركاته،،،

أنا هاقولك نصيحه يا أخي العزيز.

إنت هاتسمع كلام كتير أوي في موضوع الفيرنا أفضل ولا اللانوس.

وفي النهايه تقريبا هاتلاقي إن عدد الناس المؤيدين للانوس مساوي لعدد الناس المؤيدين للفيرنا يعني هاترجع لنقطة الصفر.

أنا شايف إنك تجيب العربيه اللي إنت مايلها أكتر والمناسبه لظروفك الماديه واللي قطع غيارها أوفر وأرخص.

وفي النهايه هو الفرق ما بين الإتنين مش كبير خالص.

أنا شخصيا أميل للانوس وده ميل مش مبني على حقائق ولا حاجه بس أنا باحبها أكتر وكمان عشان الأهوال اللي الإخوه هنا بيحكوا عليها في توكيل غبور.

ربنا يوفقك للي فيه الخير ليك إن شاء الله

**sab3aawy** · 19-02-2008 09:42 AM

تصدق ان فعلا الموضوع محير جدا

الأفيو شكلها حلو بس هى هى اللانوس القديمة وبالتالى غالية بدون داعى، الى جانب ان توكيلها بيعامل زبونه على انه راكب شيفورليه وليس دايو

اللانوس منتشرة ومضمونة وقطع غيارها رخيصة ومفرقتش عن الأفيو غير الشكل، لكن شكلها قديم ومكوناتها حاليا بييجى معظمها من رومانيا ودة بيخلى بعض مشاكل بسيطة بتظهر فيها زى تسريب زيت من جوان غطاء التاكيهات ، الى جانب بعض مشاكل التقفيل البسيطة زى عدم احكام الأبواب بالنسبة لتسرب الهواء

الفيرنا شكلها احدث وانتاج شركة من اسرع الشركات نموا فى العالم وقيادتها امتع شوية من قيادة اللانوس علشان ميزة التسارع ، لكن سمعة محركات الفيرنا المجمعة محليا مش عظيمة بسبب المشاكل التى ظهرت فى عدد ضخم من محركات الفيرنا اللى احتاجت لعمرات

الفيفا حل مميز للبعد عن تجميع غبور بس شكلها قديم ومش حلو

والله العظيم انا نفسى احترت،

قلبى ميال للفيرنا وعينى رايحة للأفيو لكنى عقلى فى ظل الظروف الحالية بيقول اللانوس، لأنها اقل مخاطرة بأفضل سعر

بيقى لو عايز تحكم العقل هات اللانوس