حسبي الله ونعم الوكيل ازاز العربيه اتكسر والابتوب اتسرق منها

**powerofhelll** · 20-06-2010 04:12 PM

الحمد لله

كله في ميزان حسناتك
ضور علي الزجاج بره التوكيل سعره مبالغ فيه جدا جدا

**N.a.j.d** · 20-06-2010 06:39 PM

الحمدلله ع كل شي
الحراميه كترانه ف البلد دي والله ربنا يعوضك ياريس

**Mohamed.Raafat** · 20-06-2010 06:49 PM

المشاركة الأصلية كتبت بواسطة korkor

معلش نصيحه اخويه بلاش تعمل باكب على فلاشه لان ممكن الفلاشه تضرب فى ثانيه أأمن حاجه انك تعمل باكب على CD , DVD , External hard Disk ولو بتعمل باكب على CD , DVD ماتكسلش واعمل Verify to Data علشان تتاكد ان كل حاجه كتبتها مضبوطه ومافيش حاجه طارت .

الاخ اللى اللاب بتاع اخوه اتسرق ربنا يعوضوه ويكون عامل باكب من الحاجه اللى عليه فى حته تانيه .

كلام زي الفل يا باشا

احب بس اضيف حاجة صغيرة اوي

لو هتعمل باك اب لحاجات مهمة جدا حاول تحطها في اكتر من مكان ( متعتمدش على باك اب في اسطوانة بس او هارد خارجي بس ) ممكن لو الاسطوانة اتجرحت متعرفش تاخد منها حاجة و كذلك لو الهارد لا قدر الله اتخبط - شكرا كده للداتا اللى عليه

و لصاحب الموضوع ربنا يعوض على اخوك في الداتا اللى كانت على اللاب

**Dr_Smart** · 20-06-2010 07:05 PM

شكرا جزيلا لكم جميعا ربنا يسترها معاكم ومعانا

الحمد لله اخويا كان عامل جزء من شغله باك اب على هارد تاني جت سليمه الحمد لله

رحت من شويه القسم وامين الشرطه قالي انهم بيدروا في المولات دلوقتي على الاجهزه المسروقه !! اهو اي كلام ربنا يعوض علينا

**Dr_Smart** · 20-06-2010 07:39 PM

بالنسبه للازاز ده بقى حكايته حكايه !!!

قلت اروح ادور في شارع دمشق يمكن الاقيه ولسوء الحظ النهارده الاحد ومعظم المحلات قافله ومش هينفع أبيت العربيه كده

لقيت محل واحد في شارع متفرع من شارع دمشق اسمه العالميه

قالي الشراعه ( او بيقولو عليها هوايه ) مش موجوده عنده والعربيه دي يا باشا مش منتشره وماتتعبش نفسك وتدور في اي حته

الحل الوحيد انك تعملها عندي عموله وتاخدها كمان ساعتين وعلى فكره مش هتلاقي اي حد تاني بيعمل ازاز تفصيل انا بس اللي شغال في الموضوع ده عشان متعب وانقرض خلاص ماحدش بيشتغل فيه

طيب يا عم هتبقى نفس المقاس والبومبيه واللون بتاع الاصليه ؟؟؟

اه طبعا نفس المقاس لكن ما اوعدكش تكون نفس اللون ... على حسب الازاز اللي هقص منه

يعني ارقع العربيه يعني ؟؟؟ مش انت اللي هتعملها يبقى تقص من ازاز نفس اللون

لا اصل مش عارف ايه وايه وايه ( اي كلام ) المهم ممكن ماتطلعش نفس اللون

طيب وتكلف كام ؟

185 جنيه !!!!!!!!!!!

حتت ازاز قد الكف ب 185 جنيه ؟؟؟؟؟

ايوه اصل شغلها مقرف وممكن اعمل حته واتنين واكسرهم عشان ممكن مايطلعوش مظبوطين

انا ما ارتاحتش للعك ده وخدت بعضي وطلعت عالتوكيل في ابو رواش

لقيتها ب 300 جنيه غير الضريبه ( طبعا غاليه جدا جدا دي حتت ازاز اكبر من كف الايد بشويه ) بس الصراحه قلت الحمدلله اني لقيتها اصلا ( الحق يتقال توكيل مودرن موتورز موفر قطع غيار العربيه ودي حاجه الصراحه تساوي فلوس برضو في مصر بدل مايقولي فوت علينا كمان شهر ولا سنه وانتو عارفين القصص دي خصوصا انها قطعه مش اساسيه اوي ومش بتتطلب كتير ) بس انا عرفت غاليه ليه ... عشان متقفله تقفيل رائع محطوطه في كرتونه 32 بوصه وكلمة made in japan منوره في كل حته

التركيب بقى بكام ؟؟؟ ب 75 جنيه وهتستنى ساعتييين ... اشتريتها وقلت شكرا هركبها بره

رجعت عالعالميه تاني بتاع دمشق ... عايز اركبها بكام ؟؟؟؟؟؟ قالي ب 55 جنيه !!!!!!!

قلتله ليه يا عم دي مش هتاخد عشر دقايق ... قالي ماهي تركيبها شغلانه وهنفك الكاوتش وبتاع !!!!! قلتله طيب كام من الاخر قالي هي 55 جنيه ... قلتله شكرا بس انت كده بتخسر زبون سلاااام

المهم ربنا هداني وقلت ابص بصه في جسر السويس يمكن ربنا يرزقني بمحل فاتح انا ماعنديش استعداد أبيت العربيه كده في الشارع

والحمدلله لقيت محل اسمه ابو الدهب قبل الف مسكن ... راجل محترم اسمه كريم اشتغل فيها على طول من غير مايقولي هياخد كام ... هي عشر دقايق ( بس احتاج يفك فرش الباب ) وبليه جاب مقشه ونضف الازاز المتكسر اللي جوه العربيه وكله تمام

و قالي 20 جنيه .... اديتهملو وفوقيهم بوسه

المفاااااجأه بقى ايه ؟؟؟؟ لقيتها عنده الاصليه مستعمله ( هي هي بالظبط ) ب 100 جنيه بالتركيب ... قلتله يا راجل ماقولتش ليه من الاول .. قالي انت خلاص اشتريت مش هقولك روح رجعها بقى ... قدر الله وماشاء فعل

ودي تاني غلطه من محل العالميه ربنا يهديه انه ضللني وقالي مش هتلاقيها انسى انا سالتلك في التليفون ومش موجوده العربيه دي مالهاش حاجه في السوق ... انا برضو غلطان اني صدقته بس هعمل ايه النهارده الاحد وفقدت الامل اني الاقي محل فاتح اسال فيه قلت اخدها من قصيرها واطلع عالتوكيل ومافيش مجال اني اسيبها لبكره

الحمد لله

اسف اني طولت عليكم