مناسك العمره ... سؤال حولها وتجارب سابقه

ان شاء الله مسافر اعمل عمره كمان كام يوم... ولي سؤال من الاخوه الافاضل الذين سبقوني في اداء عمره من قبل
نويت ان شاء الله ان اعتمر لنفسي عمره ولابي رحمه الله عليه عمره اخرى وان قدرني الله ان اعمل عمره
مره اخرى لي

سؤالي : ما المده المفروضه بين عمره واخرى .. قرأت على النت هي مده سواد الشعر اي ينبت شعر جديد يمكن للحلاق ان يحلقه ولو بالموس
طيب حتقول لي ممكن تقصر اول مره وبعد كده تشيله بالموس .. ولكن انا اتذكر حديث للرسول عليه
افضل الصلاه والسلام بما معناه عندما سالوه المقصرون ام المحلقون قال المحلقون.
وانا مش عايز يكون فيه حاجه افضل واعمل اللي اقل منها ... لو فيه حد مر بهذا الموقف وسأل فيه
وعنده اجابه لي يفدني بيها افادكم الله

كمان سؤال اخر معلش انا اول مره اروح ... تنصحني بأيه ؟؟ اخد ايه معايا ؟؟ اعمل ايه؟؟
في حاجه ممكن اعملها هناك اكون مش واخد بالي منها . لو حبيت اشتري سجاجيد صلاه وسبح علشان كل الناس بتقولي متنساناش اجيب من مكه ولا من المدينه

انا حروح على مكه الاول ان شاء الله واقعد 5 ايام و 5 ايام في المدينه
ياريت كل الي عنده خبره سابقه سؤاء في مكه او المدينه يفدني بها واللي عمل اكثر من عمره في
المره الواحده يفدني افادكم الله

وشكراااا للجميع

اولا عمره مقبوله باذن الله وذنب مغفور ليك انت ووالدك رحمه الله
ماتشغلش نفسك بمشتريات خالص
كل اللى هتعوزه هتلائيه وبسهوله تامه المحلات جنب الحرمين مفيش اكتر منها
موضوع بئى الفواصل بين العمرتين دا والله اعلم انت لازم تتحلل من الاحرام الاول وبعدين تحرم تانى فانت مقدامكش غير انك تقصر فالعمره الاولانيه و تشيل بالموسفالعمره التنيه لانك مش قاعد كتير لحد ماشعرك يطلع تانى

اول حاجه تقبل الله منا ومنك و يسر ليك الخير دايما ومش تنسانا بالدعاء
تانى حاجه كتير من الناس وانا منهم لما بيروحوا هناك بيتلخموا بانهم يشتروا ايه للناس اللى هنا و بينسوا ان الوقت اللى بيقضوه وهما بيلفوا وبيفاصلوا وبيشتروا انفع ليهم انهم يقضوه فى عبادات لان الشرا والفصال ممكن يتعمل فى اي مكان ام الثواب اللى الواحد يطمع انه ياخده من عباده واحده تتعمل صح هناك اظنه يعادل عبادات كتير الواحد يعملها هنا
علشان كده قبل ما تسافر اشترى اللى انت عاوزه من هنا من مصر من مكان زي الازهر او خان الخليلي و اركنهم عندك فى البيت لحد ما ترجع
ما فى الاصل المصليات والسبح صناعه صينيه زي الموجود هناك زى الموجود هنا وبكده هتكون وفرت على نفسك وقت طويل
بالنسبة لموضوع انك تعمل اكتر من عمره ورا بعض
احنا بنعمله عادى ولكن لو سئلت لجنه الفتوي اللى فى السعوديه هيقولوا لك مدام انت طالع من بيتك بنيه عمره ليك تبقى انت ليك عمره واحده بس ( اظن ان من ضمن اسبابهم فى الفتوي دى هيا تقليل التزاحم من قبل الناس لان فى ناس ممكن تعمل فى اليوم الواحد اكتر من 3 : 4 عمرات فالهدف على ما اظن هنا هو التيسير على المسلمين وتقليل التزاحم والله اعلم) و علشان تعمل عمره تانيه لازم يبقى فى نيه جديده وطبعا الكلام ده هيصدمك لانك عاوز تعمل عمره لفلان وعمره لفلان والاحوال الايام دى صعبه وصعب الواحد يطلع تانى
لما كنت هناك المشرف المسئول عن الرحله قال لينا حاجه هيا
ان علشان تعمل عمره لازم تعدى من ميقات وعلشان يبقى ليك ميقات لازم تبقى من اهل البلد اللى الميقات يخصها
يعنى احنا اول ما رحنا رحنا على المدينه (غير محرمين ) و قعدنا فيها كام يوم وبعد كده طلعنا على مكه وفى الطريق احرمنا من ابيار على ( بين المدينه ومكه ) لان من الجهه اللى جايين منها ابيار على هوا الميقات
لما خلصنا العمره و حبينا نعمل عمره تانيه جينا للمشكله دى هل يصح ولا لا المشرف قال انها ممكن تبقى على وزن الصلاه
يعنى واحنا على سفر فيه رخصه ب الجمع والتقصير فى الصلاه ولكن ان وصلت مكان ونويت اللى انت قاعد فيه فتره فهنا تصلى صلواتك عاديه بدون جمع ولا تقصير
وعلى كده انت تبقى من اهل المكان
فالحل اللى قاله لينا المشرف اننا مدام قعدنا فى مكه فتره (فى اختلاف فى المده) يومين او ثلاثه وكنا بنصلى الصلوات بدون جمع او تقصير فاننا كده نعتبر من اهل البلد و عليه فان الميقات بتاعهم يبقى الميقات بتاعنا وينفع نعمل عمره تانيه
ده اللى حصل واللى انا والمجموعه عملناه و ربنا هو الكريم و ربنا يتقبل يا رب والله اعلم
وكمان النقطه بتاعت الحلق ولا التقصير
لو انت عاوز تعمل عمره غير الاولانيه ولسه شعرك مش طلع او مفيش حاجه منه بانت خلى الحلاق يمشي بالموس على راسك ( مثل حال الاصلع ) وبكده تكون اعتبرت محلقاً والله اعلم
وعاوز افكرك بان الرسول صلى الله عليه وسلم دعا للمحلقين ثلاث مرات و للمقصرين مره واحده فان قدرت ان تحلق فانه افضل
انا مش هقول لك تاخد ايه انا هقول لك تسيب ايه انت تسيب الدنيا بمشاكلها بكل اللى فيها
ده انا اول مره اروح فيها انقطعت عن كل حاجه لدرجه ان اهلى قلقوا عليا وبعتوا ناس تدور عليا

قبل ما تسافر عدى على الصيدليه خد منها مجموعه ادويه احتياطى زى ادوية للبرد و لضربات الشمس و للمغص والاسهال ولصقات جروح هيا شروه ادويه كده الصيادله عارفينها انت بس تقول له رايح عمره

خد معاك مصليه او حاجه ممكن تصلي عليها لان ممكن وان فى السكه او فى ساعات الانتظار فريضه ممكن تعدى عليك فتصلي

مش تحاول تكتر فى الهدوم اللبس هناك مش محتاج تكلفة كفايه جلبيتين ثلاثة و كام غيار داخلى وشبشب حلو مش يتعب رجلك وحاول تاخد معاك شنطه او كيس (فيه اكياس قماش )علشان تشيل فيها الشبشب معاك وانت فى الحرم علشان ممكن تدخل من باب وتطلع من باب فبدل ما تلف على الباب اللى انت دخلت منه وتدور على الشبشب ده اذا لقيته وبتوع النظافة كنسوه

حاول تاخد معاك بعض المعلبات اللى مش محتاجه مجهود زى معلبات الفول والجبن والتونه علشان تعرف تاكل لما توصل المكان ويكون جديد عليك بدل ما تنزل تلف وانت لسه مش استكشفت المكان فيبقى معاك حاجه تساعد لحد ما تعرف المكان اللى انت قاعد فيه

حاول تجهز لبس الاحرام فى شنطه مستقله عن شنطه الهدوم (غالبا لما بتشتري لبس الاحرام بيكون فى شنطه ليها زى بتوع المدرسة) و فى الشنطه دى تحط دبابيس مشبك (حتى لو البشكير بكباسين دى تبقى زياده امان علشان الاحرام مش يسقط منك) و صابونه من غير ريحه وانت بتقول انك هتطلع على مكه على طول فاسأل هتحرم فين
هل هتحرم من البيت وتطلع محرم من البيت ولا هتحرم فى الطياره
وطبعا لما تحرم هيكون اتحرم عليك حاجات زى الجماع وزى التعطر وده موضوع لازم تقرا فيه

فلوسك حاول تغير من هنا ريالات مش تغير كتير هوا لو انت هتاكل من بره الوجبه ممكن تبقى فراخ او لحوم و الوجبه بتبقى بحوالى 15 : 20 ريال ده غير المشروبات و غير المخبوزات اللى تبقى فى الفطار والعشا
فشوف معدلك انفاقك كام فى اليوم و خد على قد ريالات و باقى الفلوس خدها دولارات على اساس انك لو احتجت فلوس هناك مكاتب صرافة كتير تغير منها الدولار بالريال و برضه اعمل حسابك انك تخلى معاك فلوس مصري علشان مشوار الرجوع لما تدخل مصر ممكن تحتاج تصرف فتصرف بالمصري احسن

فلوسك مش تخليها فى مكان واحد وزع فلوسك فى اكتر من مكان بحيث ان ضاع منك فلوس مش يبقى كله ضاع

و فى الطواف حاول مش تزاحم الناس وان شوفت ناس بتزق ابعد عنهم خصوصا الافارقة بيمشوا بالكوع فممكن وان ماشي تاخد لك كوع فى عينك او يخبطوك واسهل واقطر الطواف طبعا من تحت من حول الكعبه على طول ف حاول تنقى الاوقات اللى ميكونش فيها زحام كتير

نسيت اقول لك ان لكل مسجد تحيه دخول وتحيه دخول المسجد الحرام هيا الطواف 7 اشواط فان مكنش فيه استطاعه (تعب او زحمه ) فصلي ركعتين
و فى مكه في السعى بين الصفا والمروه فيه دور تانى فوق مفيش حد كتير يعرف عنه بيطلعوا له بسلالم كهربا فهتلاقى هناك مفيش زحام كتير و كمان عملوا فيه مساقي ماء زمزم فلو مش عرفت تشرب من تحت او كانت زحمه اطلع المسعى بين الصفا والمروة فى الدور الثانى هتلاقى حنفيات ماء زمزم فاضية واشرب براحتك وارتوي واشرب لحد ما تحس انك الميه قربت تطلع من مسامك دى متعه والله ( ممكن برضه تملا مياه زمزم من هناك فى زجاجات علشان تشرب وانت فى الفندق كنت بستخدم شنطه كتف شركه السياحه كانت موزعاها علينا و ماليها زجاجات مياه فاضيه من الحجم الصغير و ادخل و قبل ما اروح اطلع املاهم بس خلى بالك لان الحراس غلسين و مش بيرضوا حد ياخد المياه بره )

مش لازم تزاحم الناس على الحجر الاسود ( الناس معظمها رايحه فى اتجاه الحجر الاسود ) وانت ممكن تنشن على الملتزم مش هتلاقي عليه زحمه زي الحجر الحجر ممكن نشاور له من بعيد

واهم حاجه احفظ رقم الباب اللى بتدخل منه علشان هوا الباب اللى تطلع منه وده فى الاول بس لحد ما تتعود على المكان ودايما خلى شبشبك معاك علشان مش تلف علي الابواب تدور عليه

طبعا مش تنسي الدعاء عند اول نظره ليك للكعبه

اللهم زد هذا البيت تعظيما وتشريفا و ادعى باللى نفسك فيه
ده اللى عرفت افتكره عن مكه وان افتكرت حاجه هزود ان شاء الله

اما المدينه ربنا يوعدنا ونكون من سكانها هتلاقى اهل المدينه روحهم اخف من اهل مكه وهتحس بودهم اكتر وهتلاقي نفسك بتحس المدينه وانها جو سلام وهدوء
اول ما توصل المدينه حط شنطك وروح سلم على الرسول صلى الله عليه وسلم
المسجد النبوي عباره عن المسجد القديم اللى هوا اصل المسجد و هتلاقي فوقيه القبه الخضرا و توسعات اتعملت بعد كده لزياده المساحه
اسئل على باب السلام وادخل منه وروح سلم على الرسول
و حاول تخلى وجودك كله فى الروضه الشريفة و حاول تصلي فيها فروض وبين الفروض ان حسيت انك عاوز تريح او كده ممكن تروح فى اى جزء من المسجد (هما بيخفوا النور فى اجزاء من المسجد بين الصلوات ) و تريح شوية ولو هتنام نام و هما هيصحوك قبل الصلاه ده ان كان سكنك بعيد عن المسجد
و فى المسجد النبوي مش تنسي تشوف القبب اللى بتفتح علشان تجدد هوا المسجد بيفتحوها من غير الناس ما تحس من غير اى صوت يعنى تكون قاعد تحت قبه فجاءة تلاقى نفسك منك للسما وده مش فى المسجد القديم ده فى التوسعه
و فى المدينه المنورة مش تنسي فرصه اتباع الجنائز لتحصل على الاجر و كمان لتتمكن من دخول البقيع وبلاش ترمي قمح للحمام هناك لانه بيبهدل الدنيا بفضلاته

فى مكه والمدينه فيه مزارات المشرفين بينظموها اطلعها وحاول متفوتش حاجه و حاول تروح دار القران اللى فيها بيطبعوا المصاحف دى رائعه

وافتكر انك رايح تتاجر مع ربنا مش رايح تتاجر مع التجار اللى هناك

لنكات ذات صله

الشرح الفقهي المصور - صفة العمرة

موقع الحج والعمرة - صفة العمرة

ظ…ظˆظ‚ط¹ ط§ظ„ط¥ط³ظ„ط§ظ… ط³ط¤ط§ظ„ ظˆط¬ظˆط§ط¨ - طµظپط© ط§ظ„ط¹ظ…ط±ط©

موقع الحج

موقع الحج والعمرة


فى كتاب اسمه صفة العمرة. العلامة محمد العثيمين رحمه الله هيفيدك جدا حاول تشوف مكتبه اسلاميه جنبك و ان شاء الله هتلاقيه فيه هوا كتيب صغير

شكرااااااااااااااا لك جزيلا ... افادك الله
انا ححرم من المطار في مصر ان شاء الله ... وبناء على كلام حضرتك
مش حينفع اعمل كل يوم عمره ولازم استنى شويه علشان ابقى من اهل البلد
وممكن امشي الموس على راسي ذي الاصلع صح كده
يعني بالكتير عمره اول نا اوصل وعمره يعد 3 ايام لابي
اشكرك مره اخري ... انا نويت تبقي العمره قبل الفجر علشان الزحمه
يمكن يكون الوقت ده فاضي .
جزاك الله خيراااا

موضوع تكرار العمرة في نفس الرحلة ده مخالف للسنة أصلا

و دورت فيه كتير و وجدت انه فعلا كده

ظ…ظˆظ‚ط¹ ط§ظ„ط¥ط³ظ„ط§ظ… ط³ط¤ط§ظ„ ظˆط¬ظˆط§ط¨ - ط.ظƒظ… طھظƒط±ط§ط± ط§ظ„ط¹ظ…ط±ط© ظ…ظ† ظ…ظƒط© طŒ ظˆط.ظƒظ… ط·ظˆط§ظپ ط§ظ„ط¥ظپط§ط¶ط© ظ„ظ„ط.ط§ط¦ط¶

اقتباس:

---

حكم تكرار العمرة من مكة ، وحكم طواف الإفاضة للحائض
أنوي الحج هذا العام ، وكما يعلم الجميع ليس من السهل الحصول عليه ؛ لتكاليفه ؛ ووجود القرعة ، وأريد أن أستفيد من الحج إلى أقصى مدى ، حيث أنني أنوي أن أجري العمرة عدة مرات لأبي ، وجدي ، وعمي ، وعمتي ، الذين ماتوا قبل أن أولد ولم يحجوا . وسؤالي : أني إذا أحرمت بالتمتع ، وأجريت العمرات : لا أستطيع إجراء طواف الحج لوجود عذر شرعي ما بين 9 و 17 ذي الحجة ، ويوم 17 يجب أن أذهب إلى المدينة مع البعثة ، علماً بأني مع زوجي ، هل أنوي أقرن وأجري العمرات ولا حرج عليَّ ؟ .

الحمد لله
أولاً:
اختلف أهل العلم في حكم تكرار العمرة في السفرة الواحدة ، والصحيح : أنها لا تشرع ، وأنه لا يجوز الإتيان بأكثر من عمرة في السفرة الواحدة ، ومن دخل مكة ليعتمر فلا يشرع له تكرارها لا عن نفسه ، ولا عن غيره ، إلا أن يخرج من مكة بغير قصد الرجوع إليها بعمرة ، فيجوز له إن دخلها ثانية أن يعتمر عن نفسه ، أو عمن لم يعتمر من أقربائه أو أهله ، وما يفعله الآن كثيرون من تكرار العمرة في السفرة الواحدة ليس من هدي النبي صلى الله عليه وسلم ، ولا من هدي أصحابه رضي الله عنهم ، وهم الذين كانوا يبذلون الجهد للوصول لمكة المكرمة ، ويحدوهم الشوق للاعتمار ؛ لما له من أجر جزيل .
قال شيخ الإسلام ابن تيمية – رحمه الله - :
قال أبو طالب : قلت لأحمد قال طاوس : " الذين يعتمرون من التنعيم لا أدري يؤجرون أو يعذبون " ، قيل له : لم يعذبون ؟ قال : لأنه ترك الطواف بالبيت ، ويخرج إلى أربعة أميال ، ويخرج ، إلى أن يجيء من أربعة أميال قد طاف مائتي طواف ، وكلما طاف بالبيت كان أفضل من أن يمشي في غير شيء " .
فقد أقرَّ أحمد قول طاوس هذا الذي استشهد به أبو طالب لقوله ، رواه أبو بكر في الشافي .
" مجموع الفتاوى " ( 26 / 265 ) .
وقال – رحمه الله - :
مثل أن يعتمر من يكون منزله قريباً من الحرم كل يوم ، أو كل يومين ، أو يعتمر القريب من المواقيت التي بينها وبين مكة يومان ، في الشهر خمس عمَر ، أو ست عمَر ، ونحو ذلك ، أو يعتمر من يرى العمرة من مكة كل يوم عمرة أو عمرتين : فهذا مكروه باتفاق سلف الأمة ، لم يفعله أحدٌ من السلف ، بل اتفقوا على كراهيته ، وهو وإن كان استحبه طائفة من الفقهاء من أصحاب الشافعي وأحمد : فليس معهم في ذلك حجةٌ أصلاً إلا مجرد القياس العام ، وهو أن هذا تكثيرٌ للعبادات أو التمسك بالعمومات في فضل العمرة ، ونحو ذلك .
" مجموع الفتاوى " ( 26 / 270 ) .
وقال ابن القيم – رحمه الله - :
ولم يكن في عُمَره عمرةٌ واحدةٌ خارجا من مكة ، كما يفعل كثير من الناس اليوم ، وإنما كانت عمَرُه كلُها داخلاً إلى مكة ، وقد أقام بعد الوحي بمكة ثلاث عشرة سنة ، لم ينقل عنه أنه اعتمر خارجاً من مكة في تلك المدة أصلاً ، فالعمرة التي فعلها رسول الله صلى الله عليه وسلم وشرعها هي عمرة الداخل إلى مكة ، لا عمرة من كان بها فيخرج إلى الحل ليعتمر ، ولم يفعل هذا على عهده أحدٌ قط ، إلا عائشة وحدها بين سائر من كان معه ؛ لأنها كانت قد أهلت بالعمرة فحاضت فأمرها فأدخلت الحج على العمرة وصارت قارنة ، وأخبرها أن طوافها بالبيت وبين الصفا والمروة قد وقع عن حجتها وعمرتها ، فوجدت في نفسها أن يرجع صواحباتها بحج وعمرة مستقلين - فإنهن كن متمتعات ، ولم يحضن ، ولم يقرنَّ - وترجع هي بعمرة في ضمن حجتها ، فأمر أخاها أن يُعمرها من التنعيم ؛ تطييباً لقلبها ، ولم يعتمر هو من التنعيم في تلك الحجة ، ولا أحدٌ ممن كان معه .
" زاد المعاد " ( 2 / 89 ، 90 ) .
وسئل الشيخ محمد بن صالح العثيمين – رحمه الله – :
ما هي المدة المحددة بعد أخذ العمرة، أتى شخص بعد أسبوع مثلاً، اعتمر قبل أسبوع، فهل يعتمر الآن ؟
فأجاب : ذكر الإمام أحمد رحمه الله حدّاً مقارباً ، قال رحمه الله : إذا حمم رأسه ، أي : إذا اسود رأسه بعد حلقه فإنه يأخذ العمرة ؛ لأن العمرة لا بد فيها من تقصير أو حلق ، ولا يتم ذلك إلا بعد نبات الشعر ، وأما ما يفعله بعض الناس اليوم في رمضان ، أو في أيام الحج من تكرار العمرة كل يوم : فهذا بدعة ، وهم إلى الوزر أقرب منهم إلى الأجر ، فلذلك يجب على طلبة العلم أن يبينوا لهؤلاء أن ذلك أمر محدَث ، وأنه بدعي ، فليسوا أحرص من الرسول صلى الله عليه وعلى آله وسلم ، ولا من الصحابة ، ورسول الله صلى الله عليه وعلى آله وسلم بقي في مكة تسعة عشرة يوماً في غزوة الفتح ولم يحدِّث نفسه أن يخرج ويعتمر ، وكذلك في عمرة القضاء أدى العمرة وبقي ثلاثة أيام ، ولم يعتمر ، وكذلك الصحابة رضي الله عنهم لم يكونوا يكررون العمرة .
" لقاءات الباب المفتوح " ( 72 / السؤال رقم 20 ) .
وينظر خلاف العلماء في حكم تكرار العمرة في السنَة الواحدة : جواب السؤال رقم : ( 109321 ) .

---

حاجة تانية مهمه جدا من البدع المنتشرة

1- التلبية الجماعية في الاتوبيس او الطيارة ....... لا تجوز شرعا

و حاول لو الناس عملت كده تنصحهم بالمعروف و تاخد الثواب

http://www.islamqa.com/ar/ref/125399/

http://www.islamqa.com/ar/ref/126707/

2- ساتر الاحرام اللي بيتلبس تحت الهدوم للرجال ..... لا يجوز لانه مخيط ....

و عكس ما الناس فاهمة مخيط مش معناها متخيط .... مخيط معناها ماسك عالجسم بالظبط ....

طبعا خد معاك مكنة حلاقة كهربا + سلاح موس زي بتاع الحلاق منعا لانتقال الامراض بس طبعا اوعى تشيله في الهاندباج عشان المطار

خد معاك كريم للتسلخات (و خد شوية حلوين يعني 5 و لا 6 انابيب) زي Kenacomb مثلا لانك هتحتاج تدهن كل يوم كذا مرة عشان الحر و المشي الكتير

اقتباس:

---

المشاركة الأصلية كتبت بواسطة أحمد كمال

موضوع تكرار العمرة في نفس الرحلة ده مخالف للسنة أصلا

و دورت فيه كتير و وجدت انه فعلا كده

ظ…ظˆظ‚ط¹ ط§ظ„ط¥ط³ظ„ط§ظ… ط³ط¤ط§ظ„ ظˆط¬ظˆط§ط¨ - ط.ظƒظ… طھظƒط±ط§ط± ط§ظ„ط¹ظ…ط±ط© ظ…ظ† ظ…ظƒط© طŒ ظˆط.ظƒظ… ط·ظˆط§ظپ ط§ظ„ط¥ظپط§ط¶ط© ظ„ظ„ط.ط§ط¦ط¶

---

فعلاً كل الشيوخ اللي هناك كانوا بيأكدوا الرأي ده
وانا شخصياً أخدت بيه ومعملتش غير عُمرة واحدة

ربنا يبارك لك فى سفرك هذا ولا تنسانا من دعائك
اوصيك بعدم الازدحام لاجل تقبيل الحجر و أرجوك لا تهتم بإختلاف الاخرين فى تطبيق الشعائر وركز فى اللحظات الجميلة اللى انت تعيشها
وربنا يتقبل منك إن شاء الله

فيه دلوقت امواس زى بتاعت الحلاقين بس بلاستيك و ده بيبقى استعمال مره واحده ويترمى بعدها و ثمنه ريال او ريالين مش فاكر
وبيتباع عند الحلاق وانت اللى بتختار تعمل مكنه ولا موس

بخصوص العمرة أكثر من مرة أرجوك العودة الى دار الافتاء وان شاء الله ربنا يتقبل منك العمرتين

اقتباس:

---

المشاركة الأصلية كتبت بواسطة michohat

فيه دلوقت امواس زى بتاعت الحلاقين بس بلاستيك و ده بيبقى استعمال مره واحده ويترمى بعدها و ثمنه ريال او ريالين مش فاكر
وبيتباع عند الحلاق وانت اللى بتختار تعمل مكنه ولا موس

---

انا لما كنت هناك كان الحلاق مش بيستخدم غير الأمواس دي من غير ما يسأل
بيستعملها مع كل الناس

بالنسبة لموضوع عمل اكتر من عمره
مفيش ليها حديث او قول ثابت عن الرسول صلى الله عليه وسلم
وكل الأراء اللى موجوده اجتهادات من اولي العلم
فانا عرفت الرأيين
رأي اول العلم وهوا عدم جواز عمل اكتر من عمر فى السفر الواحد
ورأي تانى كونته على اساس حكم جمع الصلاه والقصر فيها للمسافر ( فانا مدام قعدت فى مكان و اديت الصلوات الخمس كامله فى اوقاتها وفي نيه بسكن المكان فانى اعتبر من اهل المكان وعليه فاننى اعتبر من اهل مكه واهل مكه اذا ارادوا عمل عمره فانهم بيخرجوا للميقات بتاعهم ويحرموا من هناك بنيه العمره وعليه فانى اعتبرت نفسي من اهل مكه وانى نويت العمره فخرجت من مكه للتنعيم بالنيه دي و رحت للميقات (التنعيم )و احرمت من هناك كاى واحد من اهل مكه )
وفى الاخر سبت الأجر على الله والله لا يبخس الناس اعمالهم
ملاحظه : لما كنت هناك عرفت ان اهل الشام والخليج تكلفه العمره (الرسوم والاقامه) ليهم بما يساوي تكلفة 5 عمرات بالنسبة لينا وممكن اى حد بدل ما يصيف او يروح اى مكان ياخد عربيته و يروح مكه

اقتباس:

---

المشاركة الأصلية كتبت بواسطة michohat

ملاحظه : لما كنت هناك عرفت ان اهل الشام والخليج تكلفه العمره (الرسوم والاقامه) ليهم بما يساوي تكلفة 5 عمرات بالنسبة لينا وممكن اى حد بدل ما يصيف او يروح اى مكان ياخد عربيته و يروح مكه

---

بالظبط كدة زي ما حضرتك بتقول
انا اتعرفت على معتمر سوري كان جاي عمرة بري بإقامة لمدة 15 يوم كاملة وتكلفتها عليه كانت ما يوازي ألف جنيه مصري :rfds:

اقتباس:

---

المشاركة الأصلية كتبت بواسطة michohat

ملاحظه : لما كنت هناك عرفت ان اهل الشام والخليج تكلفه العمره (الرسوم والاقامه) ليهم بما يساوي تكلفة 5 عمرات بالنسبة لينا وممكن اى حد بدل ما يصيف او يروح اى مكان ياخد عربيته و يروح مكه

---

اقتباس:

---

المشاركة الأصلية كتبت بواسطة أبو حمزة

بالظبط كدة زي ما حضرتك بتقول
انا اتعرفت على معتمر سوري كان جاي عمرة بري بإقامة لمدة 15 يوم كاملة وتكلفتها عليه كانت ما يوازي ألف جنيه مصري :rfds:

---

اسف انا غلط فى المعنى وعكستها
قصدى ان تكلفة عمره واحده احنا بنعملها بتساوى تكلفة 5 عمرات بالنسبة لاهل الشام والخليج ده وهما بيطلعوا الرحله المصاريف شامله كل حاجه التنقلات والاكل فى الفندق اوبن بوفيه ( كان مكتوب يافطه فى بوفيه الفندق اللى كنت نازل فيه معناها للاتراك فقط ) ولما سئلت واحد تركي الرحله اتكلفت كام لقيته بيقول انها رحله مدعمه من الحكومه التركيه وانه بيسددها اقساط و حسبها لقتها مش معديه 1000 جنيه مصري
مع اننا مفيش بينا وبينهم غير شوية مياه

شكرااااااااااااااااا لكل الي جاوب وافادني بس صدمت اني مش حينفع اعمل اكثرمن عمره
طيب بلاش لنفسي مره اخرى بس لازم اعمل لابي رحمه الله عليه
وانا بفكر اعمل زي ما حضرتك عملت (ميشوهات) اعتقد اسم حضرتك مجدي محرم وشكرااا لحضرتك
استاذ احمد كمال شكراا لك ...
بس هل فعلا اقل الاوقات زحمه هو وقت فبل الفجر ؟ هل ممكن اصور في الحرم او المسجد النبوي يعني اخد كاميرا ولا اكتفي بكاميرا الموبيل
انا مش واخد هدوم كتير معايا وناوي اشتري جالبيتين من هناك مع اني مش بحب البسهم. الموس سمعت انو هناك بلاستيك فقلت مفيش داعي لاكن مكنه حلاقه كهلاباء لازمتها ايه .
شكراا للجميع

الاخوة الافاضل نصحوك بخصوص مناسك العمرة..
عايز اقولك على حاجة تريحك في موضوع الشراء..هاتوفرلك فلوس ووقت
سيبك من اللف في المحلات اللي حوالين الحرم لانك مش هاتخلص..
بالنسبة للملابس .. لو انت في المدينة وقف اي تاكسي او اي عربية وقوله مزايا مول ومتحاسبوش هاياخد حسابه من المول..هاتلاقي كل اللي انت عايزه وباسعار اقل من المحلات حوالين الحرم بكتير واعلى جودة
كذلك في مكة خد ميكروباص من امام الحرم للعزيزية (بس مش فاكر شمالية ولا جنوبية) قولهم العزيزية القريبة من مِنى وانزل عند أريام او رامز (الاتنين جنب بعض) رامز دا ممكن تلاقي فيه كل الهدايا والعطور والاجهزة اللي نفسك فيها .. وأريام دا عبارة عن متجر كبير جدا للملابس فقط.. وبرضه الاتنين اسعارهم حلوة وجودة البضائع حلوة..
كدا مشوارين يخلصولك الموضوع كله.. بدل ماتقعد تلف على المحلات وانت رايح الصلاة ووانت راجع .. كل مشوار ياخد ساعة ونص من الحرم للفندق وهو كله يخلص في 10 دقايق..
ويستحسن تلبس الاحرام من بيتك هايبقى اسهل من المطار.. والتلبية تكون وقت مروركم فوق الميقات
تقبل الله منك

اقتباس:

---

المشاركة الأصلية كتبت بواسطة solyelissa

شكرااااااااااااااااا لكل الي جاوب وافادني بس صدمت اني مش حينفع اعمل اكثرمن عمره
طيب بلاش لنفسي مره اخرى بس لازم اعمل لابي رحمه الله عليه
وانا بفكر اعمل زي ما حضرتك عملت (ميشوهات) اعتقد اسم حضرتك مجدي محرم وشكرااا لحضرتك
استاذ احمد كمال شكراا لك ...
بس هل فعلا اقل الاوقات زحمه هو وقت فبل الفجر ؟ هل ممكن اصور في الحرم او المسجد النبوي يعني اخد كاميرا ولا اكتفي بكاميرا الموبيل
انا مش واخد هدوم كتير معايا وناوي اشتري جالبيتين من هناك مع اني مش بحب البسهم. الموس سمعت انو هناك بلاستيك فقلت مفيش داعي لاكن مكنه حلاقه كهلاباء لازمتها ايه .
شكراا للجميع

---

فعلاً أقل الأوقات زحمة هو بعد الفجر مباشرة
والظهر والعصر طبعاً لكن حرارة الشمس بتزود المشقة
العمرة بتاعتي أنا عملتها يوم خميس الساعة 12 بالليل وخلصت 2.30 صباحاً
وكانت الزحام شديد جداً وبعدها عرفت إن الخميس والجمعة بيكون زحام بسبب إن المعتمرين من داخل السعودية بيفضلوا آخر الأسبوع كوقت للعمرة
رسمياً غير مسموح بالتصوير داخل الحرمين ومستحيل تقدر تطلع الكاميرا لأن أي شنطة بتتفتش على الأبواب، ولكن ممكن تخطف صور بالموبايل هناك، انا مثلاً قدرت أخطف 600 صورة وأنا هناك بعيداً عن أعين الأمن :120105~352:
نصيحة لو مش بتحب تلبس الجلابيب زي حالاتي بلاش تجيبهم لأني اشتريتهم مخصوص ومستحملتهمش هناك

اولا عمرة مقبولة ان شاء الله وربنا يرجعك لأهلك وبلدك سالم غانم بإذن الله
بالنسبة لموضوع تكرار العمرة فيه عدة آراء وكل رأي له اسانيده وأدلته ....انا شايف في رأيي المتواضع ان في حالة الاختلاف بين آراء العلماء في هذه المسائل الاجتهادية التي ليست من الثوابت والاصول العقيدية انك تأخذ بأي الرأيين .... لأن كل رأي له من العلماء من اقروه ولهم اسانيدهم وادلتهم .... وانا لا اميل الى التحزب الى رأي معين طالما ان الرأيين لعلماء أجلاء من أهل الثقة .....والتنوع بين اراء العلماء من رحمة الله بنا وتيسيره علينا
والله اعلى واعلم
انا عن نفسي لما باروح باعمل عمرتين وبينهم اسبوع
وبأحلق في المرتين بالموس .... في المرة الثانية بيكون تمرير الموس على الرأس كافي ... وده برضه رأي علماء مش رأيي انا
...
نصيحة انك تحاول ما تتصاحبش على حد هناك قدر المستطاع ...... لأن ده ح يجرك الى كلام ومناقشات وطالما ان لسانك تكلم .... فأنت قريب من الذنوب
ادخر وقتك وجهدك للعبادة ولو حتى كنت ساكت ... مجرد التأمل والنظر الى الكعبة والتدبر في خلق الله والابتعاد عن الكلام واللغو .... كل ذلك له اجره عند الله ان شاء الرحمن
..
الموضوع اللي في توقيعي فيه صور وشرح لمعظم الاماكن في بيت الله الحرام .... ممكن يكون مفيد لك
لا تنسى الدعاء لكل اهلك وجيرانك واصدقاءك وزملائك وكل من اوصاك بالدعاء .... واحنا معاهم طبعا :M_yes[1]: ..... وان شاء الله يكون لك مثله
....
آخر نصيحة ........... لا تغضب ولا تتذمر من الزحام وسيطر على اعصابك واصبر وحافظ على هدوء اعصابك
واستمتع .......... ولا تفكر غير انك في بيت الله الحرام ....... ودي فرصة مش بتتكرر كتير .... خسارة انك تضيع اي أجر ممكن يكون من نصيبك .... والصلاة في بيت الله الحرام بأجر مائة الف صلاة فيما سواه ..... صلي نوافل قدر استطاعتك ...... صلي في مقام ابراهيم .... صلي في حجر اسماعيل .... حاول الوصول الي باب الكعبة والدعاء عند الملتزم.... ادعو الله وابكي واستغفر .... حاول استلام الحجر الاسود
استمتع بهذه الرحلة المباركة
بالقبول ان شاء الله

ممكن بدلا من الجلاليب يبقى بنطلون رياضي واسع يريحك فى الحركه مع تي شيرت خفيف ومش تنسي طاقية مناسبة تحمى بيها راسك من الشمس
وبالنسبة للتصوير زى ما الاخوه قالوا فعلا مانعين التصوير هناك ولكن ممكن تدخل بكاميرا او الموبايل بس لو مسكوا منك الكاميرا بياخدوها امانات علشان كده كنت بتبع معاهم طريقة دخله الكمين يعنى كنت بحط الكاميرا و حاجتى فى شنطه الكتف اللى مسلماها لينا شركه السياحه و اروح واخدها تحت دراعى و شارخ فى اتجاه الباب و لا مانع وانت داخل انك تبتسم ليهم و تسلم علي الحراس
او طريقة تانيه ممكن تدخل عليهم وتسألهم اي سؤال هيجاوبوك و بعد كده تدخل
الحراس نوعين نوع بيسيبك تصور صور بسيطه للذكري يعنى وكده و نوع تانى بيمنع التصوير خالص
الماكينه الكهرباء اظن مفيش ليها استفاده لو انت ناوى تحلق بالموس
غير كده اطلع من هنا وانت شايل اى شعر زياده فى جسمك ك شعر الابط والعانه

ونصيحه ليك البضاعه اللى هناك هيا زي اللى هنا ف لو كنت هتجيب سبح وسجاجيد فالاصل كلهم صناعه صينى فجيب من مصر واركنهم فى البيت عندك واطلع خلص عمرتك و هتكون كده موفر كل الوقت للطاعات والعبادات
واحد كان طالع معانا فى العمره مش كنا بنشوفة الا علشان اما يجي يستحمى او يأكل (كان جايب دقه كتير علشان تشبعه و متخلهوش يدخل الحمام كتير )
كان نفسي اقول لك هات لى ميه من زمزم بس مهما حد جاب مش هتحس بالمتعه وانت بتشرب منها والميه قدامك
اشرب من المياه كتير انا كنت بشرب لحد ما اكون مش قادر اتنفس
كان فيه حديث عن الرسول صلى الله عليه وسلم بالمعنى ده وكان صلى الله عليه وسلم بيشرح فيه ازاى تشرب من ماء زمزم صح
الوقت اللى بتكون الكعبه فيه فاضية هوا ما بين صلاه العشاء والفجر فى الوقت ده معظم الناس اللى بتكون مقيمه فى المسجد طول النهار بتروح تتغدى و تنام كام ساعه وتنزل قبل الفجر فاعتقد ان افضل ميعاد هو الساعه 11 او 12
وكمان خلى بالك من الايام ساعات بتفرق فى الزحام يعنى مثلا ايام الخميس والجمعه الناس اللى ساكنه فى المملكه بياخدوا اجازات وبيجوا يعملوا عمره فعلشان كده تلاقى الخميس الفجر الكعبه زحمه شوية
ولو ليك فى المسك فيه مسك جامد يشبه الصابون كده باشكال كتيرة زى مكعبات صغيرة او مربعات وده الباكته من المسك الجامد المربعات فيه 16 قطعه بحوالي 12 ريال ( سعر القطعه لوحدها ريال واحد فالاوفر تجيب الباكته)
الا بالحق مش تنسي وانت هناك تاكل فول وتميس
التميس ده عيش بيتعمل هناك وهوا سخن بيبقى زى البوغاشه ومع الفول يبقى جامد جدا ولازم تجربه بس خلى بالك منه لانه ان برد بيمط ويشد زى فرده الكاوتش

اقتباس:

---

المشاركة الأصلية كتبت بواسطة michohat

الا بالحق مش تنسي وانت هناك تاكل فول وتميس
التميس ده عيش بيتعمل هناك وهوا سخن بيبقى زى البوغاشه ومع الفول يبقى جامد جدا ولازم تجربه بس خلى بالك منه لانه ان برد بيمط ويشد زى فرده الكاوتش

---

ده انا أدمنته هناك
اللي بيقرمش اسمه تميس بسكوت :3mla:
بس خللي بالك من الشطة عشان بتبقى نااااااار

متشكر لكم جميعاااااا جزاكم الله خيراا افدتوني جداااا
انا ان شاء الله ماشي بعد بكره حنوصل علي العشاء تقريبا وبعد العشاء نبدء العمره ان شاء الله وملخص الكلام الي تفضلتم به هو
1- مش حينفع اعمل اكتر من عمره وده بالكتير كمان بينهم 3 ايام علي الاقل
2- ماخدش امواس معايا والحلاقين عندهم امواس بلاستك للمره الواحد
واحد قالي هم مواجودين كلهم جنب بعض والحلاقه ب 10 ريال
2- الخميس والجمعه زحمه جدااا
3- لو حبيت اشتري جالبيه او بنطلون علشان مش حاخد هدوم معايا لو في مكه من رامز او ايرام ودول في العزيزيه
4- سعر وجبه الغدا لحوم لو فراخ 20 ريال
5- افطار و العشاء اي حاجه مش مشكله جبنه او كرواسون او اي حاجه يعني 5 ريال مثلا
6- ممنوع التصوير وعليه مش حاخد كاميرااا و اكتفي بالموبايل وانا وحظي
ان شاء الله ححاول اروح مزارات حتي لو مش حيخدونا حروح لوحدي
اعتقد زي البقيع و جبل احد و مش عارف غيرهم
7- محاوله الالتزام بالصلاه في الروضه الشريفه
8- الاكثار من شرب زمزم ومحاوله ملئ زجاجات اخدها معايا الفندق
9- اخد ادويه معايا من هنا
شكراااااااااااااااااااااا اااااااااااااااااااااا لكم جميعاااااا وجراكم الله خيراا
انا متابع معاكم لغايه بكره كمان ان شاء الله

اقتباس:

---

المشاركة الأصلية كتبت بواسطة solyelissa

9- اخد ادويه معايا من هنا

---

ماتنساش كريم التسلخات ارجووووووووك ....

قريت عن صفه العمره؟؟
فيه كتيب اسمه صفه العمره للشيخ بن العثيمين الكتاب ده جميل جدا و ملحق بيه س و ج دور عليه على الانترنت هتلاقيه اكيد ولو مش لاقته فى اى مكتبه دينيه ان شاء الله تلاقيه
اقول لك حاجه الجمعه من بعد العشا كده تبتدى تروق لان الناس اللى واخده اجازات بتمشي
مواضيع من المنتدى عن العمرة
http://www.nilemotors.net/Nile/149361-a.html

http://www.nilemotors.net/Nile/133990-a.html

صفة العمرة بالصور - مـنـتـدى الـعـرب الـمـسافـرون

حاول تقضي وقتك دلوقت فى القراءة وتجميع المعلومات وهتعمل ايه و ايه اللي يحصل

اقتباس:

---

المشاركة الأصلية كتبت بواسطة أحمد كمال

ماتنساش كريم التسلخات ارجووووووووك ....

---

كلام الاستاذ احمد كمال تمام مش تنسى الادويه (قول للصيدلي وهوا يجهزها لك ) وخصوصا الكريم

نسيت اقول لك انت عارف ازاى هتغسل هدومك وغياراتك؟؟؟ ولا مش هتكون ضامن مغسله الفندق او السكن؟؟
على العموم ان كنت نويت تغسل انت غياراتك و تنقعها فاكيد عاوز طبق تغسل فيه ده مش متوفر فانت ممكن بدل الطبق تاخد معاك كيس بلاستيك تقيل جامد زى الشنط بتاعت السلام شوبنج سنتر او موكيت ماك المهم شنطه بلاستيك تكون محمله و تستحمل واملاها ميه و اغسل وانقع اللى عاوزه فيها و تغسلها بعد ما تخلص
هتيجي لحته هتنشر فين فيه بعض الفنادق بتكون موفره مناشر فى الحمام ولكن بعضها مفيهاش ف هنا ممكن تاخد معاك شماعات بلاستيك تعلق عليها اللى غسلته وتعلقة على اى مكان فى الحمام يصفي الميه اللى فيه و بعد كده تعلقة فى حته فيها هوا
كده ادوات الغسيل والنشر
كيس بلاستيك محمل جامد بدل طبق الغسيل
شماعات بلاستيك او سلك تستعملها كمناشر

أهم مزارات مكة




دار الأرقم بن أبي الأرقم


وفيها كان الرسول يدعو للإسلام خفية وفيها أسلم عمر بن الخطاب وعندئذ خرج الرسول والمسلمون للصلاة جهراً بالمسجد.

غار حراء اعلى جبل النور (الطلوع والنزول بياخد وقت طويل والاتوبيس بيبقى متأجر بالساعه فممكن لو اتأخرت يسبوك)

وهو الغار الذي أختاره الرسول ليتعبد فيه قبل أن يبعثه الله نبيا ورسولاً وفيه نزل عليه جبريل بأول آيات القرآن الكريم.

غار ثور (الطلوع والنزول بياخد وقت طويل )

وهو الغار الذي لجأ إليه الرسول ومعه أبو بكر الصديق ومكثا به ثلاثة أيام عندما هاجر من مكة إلي المدينة.

مقبرة المعلاه

وتضم رفات أجداد رسول الله وزوجته خديجة

جبل عرفات

أهم مزارات المدينة المنورة


مسجد قباء

وهو أول مسجد أسس بالمدينة المنورة حيث بركت ناقة رسول الله وفي الحديث "من تطهر في بيته ثم أتى مسجد قباء فصلى فيه صلاة كان له كأجر عمرة".

مسجد القبلتين


وفيه قبلتان الأولى نحو بيت المقدس والثانية نحو مكة. وفيه نزلت الآية بتحويل القبلة.


جبل أحد


وحوله حدثت معركة أحد المشهورة وقال فيه الرسول" أن أحدا على باب من أبواب الجنة"



البقيع


يضم البقيع مقابر من مات بالمدينة من الصحابة والمهاجرين والأنصار وأولاد رسول الله وزوجاته عدا خديجة.


مسجد السيدة فاطمة ومسجد إبراهيم بن سيدنا محمد وجميع مساجد المشاهير وعددها ثلاثون تزارعلى قدر الإستطاعة على ألا تترك فرضا خارج الحرم النبوى الشريف

بئر إريس يتوضأ منه ويشرب منه
أبيار على يتوضأ منه ويشرب منه أما إذا زرت المدينة قبل الحج فسوف تحرم منها وأنت فى طريقك إلى مكة


طبعا لازم تتدرب على لبس الإزار من دلوقت ولازم تعرف تربطه كويس علشان مش يقع منك وانت هناك وعلشان تضمن حريه الحركه وانت بتربطه باعد بين رجليك وافتح رجليك وانت بتربطه حولين وسطك


[youtube]http://www.youtube.com/watch?v=AadTOveDqdk[/youtube]





[youtube]http://www.youtube.com/watch?v=ZGFDLJb8vLM[/youtube]





[youtube]http://www.youtube.com/watch?v=5kpMUisd3q0[/youtube]


[youtube]http://www.youtube.com/watch?v=0Lr5VHdi75o[/youtube]


[youtube]http://www.youtube.com/watch?v=a2N4rJl-WB4[/youtube]


كان فيه فيديو للشيخ وجدي غنيم بيشرح ازاى يلبس الاحرام من غير ولا دبوس بس مش لاقيه

نسيت اقول لك ان الوجبه كبيرة وممكن تقضيك تاكل مرتين وبرضه مش تحاول تكتر فى الاكل علشان الحمامات اللى فى الحرم متبهدله شوية وان صادف عاوز حمام فيه مولات وفنادق جنب الحرم حماماتها هتكون افضل شوية

معلش مداخلاتى كتير بس كل ما افتكر حاجه بقولها

يا باشا عذراا على ايه مداخلاتك مفيده جداااا وشكرااا لك
احمد بك كمال علم وتم التنفيذ
انا معاكم النهارده كمان لغايه باليل و القاكم علي خير لما ارجع ان شاء الله .... وربنا يكرم كل اللي افادني بمعلومه

هو الافضل اني اجيب خط موبيل (كارت) من السعوديه بيقولوا ب 30 ريال بس مش عارف فيه رصيد قد ايه
ولا اخد الخط بتاعي معايا (كالرت بردو) انا سالت فودافون الاستفبال الدقيقه 2,10 والاتصال ب 4
واتصالات اغلى منها تقريبا الديقيه استقبال 3,5 والاتصال ب 5 جنيه او 6 مش فاكر . هو الخط الي من هناك فيه رصيد يسمح اكلم مصر ولا اخد خطي معايا؟؟

اتصالات فيها ميزة انك ممكن تشحن بكروت موبايلي و انت هناك

تشتري كارت موبايلي و تشحنه بس بدل ما في مصر بتشحن نجمة خمسة خمسة ستة نجمة رقم كارت الشحن شباك و تطلب

من هناك هتحط الكارت و تكتب نجمة واحد تلاتة اربعة نجمة رقم الكارت شباك


و ممكن تشتري من هناك خط موبايلي بس لازم يكون معاك اصل جواز السفر

و تروح فرع تشتريه مش من الشارع

من سنتين كان الخط ب 75 ريال فيه 75 ريال رصيد و فيه خدمة اسمها الرقم الدولي المفضل تبقى المكالمة الدولي ليه ارخص و دي عن طريق خدمة العملاء (اطلب 1100 مجانا)

اقتباس:

---

المشاركة الأصلية كتبت بواسطة solyelissa

هو الافضل اني اجيب خط موبيل (كارت) من السعوديه بيقولوا ب 30 ريال بس مش عارف فيه رصيد قد ايه
ولا اخد الخط بتاعي معايا (كالرت بردو) انا سالت فودافون الاستفبال الدقيقه 2,10 والاتصال ب 4
واتصالات اغلى منها تقريبا الديقيه استقبال 3,5 والاتصال ب 5 جنيه او 6 مش فاكر . هو الخط الي من هناك فيه رصيد يسمح اكلم مصر ولا اخد خطي معايا؟؟

---

الخط بـ 30 ريال فيه رصيد 30 ريال

ان نزلت مطار جده فى هناك كافيتريا جوه المطار بيبيعوا فيها الخطوط هوا ثمن الخط بثمن الرصيد

الحمد لله ,,, رجعنا سالمين بعد اداء مناسك العمره التي كانت اكثر من رائعه وانا عن نفسي ما كنتش عايز اسيب الكعبه وارجع ...

شكرااااااااااا لكل الي افادني بمعلومه ومشاركه نفعتني وانا هناك
ولكل الي عايز يعمل عمره ويروح عند النبي الغالي يربنا يقدرك وتنالها ..... فما اروعها من زياره

حمدا لله على سلامتك...وربنا يتقبل ويرزقنا وإياك عمرة بعد عمرة وحجة بعد حجة

حمدلله ع السلامه .. و ربنا يوعدنا جميعا ان شاء الله
و شكر خاص للأستاذ michohat على مشاركاته الرائعه بمعنى الكلمه فى الموضوع

حمد الله على السلامه
وربنا يتقبل منا ومنكم
الا انت حضرت المطر اللى كان هناك؟
الجو هناك ساعه المطر جميل
ربنا اكرمنى و مطرت لمده يومان ايام ما كنت فى المدينه
الا اخبار التميس ايه معاك جربته ولا ايه
احكي لينا عملت ايه هناك
انا لسه جاي من عمره فى شهر مارس و عاوز اروح وحشتنى الاجواء المقدسه هناك و وحشنى ماء زمزم

اقتباس:

---

المشاركة الأصلية كتبت بواسطة michohat

حمد الله على السلامه
وربنا يتقبل منا ومنكم
الا انت حضرت المطر اللى كان هناك؟
الجو هناك ساعه المطر جميل
ربنا اكرمنى و مطرت لمده يومان ايام ما كنت فى المدينه
الا اخبار التميس ايه معاك جربته ولا ايه
احكي لينا عملت ايه هناك
انا لسه جاي من عمره فى شهر مارس و عاوز اروح وحشتنى الاجواء المقدسه هناك و وحشنى ماء زمزم

---

الله يسلمك ويسلم اعضاء نايل موتورز
للاسف ما كنش فيه مطر الجو كان حر قوي بس من غير رطوبه
طبعا سالت علي التميس وبعد صلاه الفجر روحت جبيت فول وتمس من محل وانا راجع الفندق لقيت محل تاني روحت جايب شويه كمان بس الفول مش زي الفول بتعنا رغم انه كان محطوط في قدره زي الي عندنا بس كان طعمه جايب على بصاره والشويه التانين كان جايب على عدس كمان انا افتكرت التميس ده رقيق زي الفطير بس ماطلعش كده .. جربت الفول والتميس مره واحده يمكن لو كنت كلته كتير كنت اتعودت علي طعمه بس في المجمل حلو مش وحش

انا لسه راجع وعايز اروح تاني انا اول ما وصلت مكه سيبت حاجاتي في الفندق وجري علي الحرم
كان نفسي اشوف الكعبه ..حقيقي حاجه وهم جميله قوي عملت العمره وكان الكعبه والحرم مليان ريحه حلوه قوي قوي معبئه الحرم كله طول ما انا بطوف عمال اشم الريحه واقول الله ....

سالت عليها وقالولي انهم بيعطروا الكعبه بخلطه مخصوصه من مسك وعنبر وعود .. ورحت اشتريت عطر زي عطر الكعبه ...
الصلاه في الحرم جميله قوي وصلاه الفجر اجمل واجمل ...
وانت بطوف او مستني الصلاه تلاقي ناس بتوزع تمر وناس بتوزع سبح لله كده ... كل واحد ومقدرته ده حتى مره واحد كان بيوزع كلينكس علي الناس الي قاعده ..طبعا الي بيوزع ده مش جايب للحرم كله ده شويه مجرد ما يخلصوا يمشي او يصلي لو معاد الصلاه جه.

انا روحت مكه الاول وبعدين المدينه ...وزي ماحصل في مكه حصل في المدينه سبت حاجتي في الفندق وجري على المسجد النبوي وكنت بسال الناس علي الروضه فين والحمد لله صليت فيها مرتين في يومين ورا بعض بس بعد كده في اليوم التالت زحمه قوي مافيش شبر فاضي فيها كبيري كنت بصلي جنبها .

انا زعلت قوي وانا ماشي وكنت عايز ارجع مكه تاني الصلاه في الحرم والمكان كله متعطر جميله جدااااااااااا
طبعا ما عرفتش المس الحجر الاسود عليه قتال جامد فاكنت بشاور بس وحاولت كذا مره بس مافيش فايده ..
الحاجه الملفته ان في كميه جراد كبيره جدا في الحرم والساحه الي قدامه وتلاقيها علي الارض ولو طلعت الدور التالت حتلاقيها كتير جدااا الي بيطير والي علي الارض ...
بس الغريبه اني لم اكون في الشارع وانا رايح من الفندق للحرم او راجع مش بلاقي جراد ...
الحرم منطقه مضيئه اضاءه رهيبه في عز الليل تحس ان الدنيا ظهر كميه كشافات مهوله ...
الصوت في الحرم مجسم وقوي ومحيطي صوت الاذان او الصلاه مش تحس انه جايه من سماعه في الشمال او اليمين لان تحس انه حواليك السماعات دائريه حوالين صحن الحرم...

انا ماليش في رفع الصور مش بعرف ومش بتظهر في المنتدي علشان كده مش حقدر احط صور

لكل الي بيفكر يعمل عمره لااااا تتردد لحظه واحده ...لو انت محوش قرشين علشان تاجر في مارينا اسبوع تصيف اجل مارينا السنه دي وروووح جري علي هناك انت هناك ستكون في ضيافه الرحمن..........