صيانة 120 للميجان2

**mouraddesk** · 21-06-2010 11:26 AM

يا رجاله انا خلاص داخل على صيانة 120 الف و كل ما اكلم التوكيل اسمع سعر مختلف عن السعر اللى قبله و بفكر اعملها بره و الكتينة بس اللى فى التوكيل يا ريت الافاده عن الاسعار و ايه اللى ممكن يتعمل بره و حكاية اختلاف الاسعار و ليه الميكانيكيون العرب اغلى من التوكيل انا مش فاهم حاجه

**gazzar91** · 21-06-2010 07:16 PM

المشاركة الأصلية كتبت بواسطة mouraddesk

يا رجاله انا خلاص داخل على صيانة 120 الف و كل ما اكلم التوكيل اسمع سعر مختلف عن السعر اللى قبله و بفكر اعملها بره و الكتينة بس اللى فى التوكيل يا ريت الافاده عن الاسعار و ايه اللى ممكن يتعمل بره و حكاية اختلاف الاسعار و ليه الميكانيكيون العرب اغلى من التوكيل انا مش فاهم حاجه

أول مرة أسمع عميل بيقول كده.. بس أنا فعلاً مش متابع أسعار الصيانات... و على فكره الميكانيكيون العرب مركز خدمة معتمد يعني زيه زي الوكيل بس أنا كنت أظن أرخص من الوكيل
لو حضرتك عاوز سعر أرخص يبقى روح لمصطفى الزيني اللي في الألف مسكن French motors service
والله أعلم...
في رعاية الله....

**mouraddesk** · 22-06-2010 02:45 PM

جرب بنفسك و كلم التوكيل و كلمهم بعدها بيوم و انت تشوف مرة 1750 و مرة 2055 اما بقى الميكانكيون مرة 2500 و لما قلت مش هعمل كل حاجه غير الكاتينة و طلمبة المياه سمعت 2000 اذا كان سعر الطلمبة فى التوكيل شامل الضريبة 550 و سير الكاتينة نقول 600 غير المصنعية و الضريبة يبقى جت منين 2000 دى

**yalahwy2010** · 22-06-2010 03:16 PM

هو ايه اللى بيتغير فى صيانةال 120 غير سير الكاتينة وطلمبة المياة؟
انت ممكن تعملها عند محمد الشرقاوى...اللى فى الحرفيين
شغله حلو جدا وعلى ايدك كل حاجة
وقلنا ايه الاخبار

**Hany Saad** · 24-06-2010 12:55 AM

حاجة صغيرة للتوضيح....جميع شركات الزيوت العامة و الخاصة رفعت أسعارها من يومين فقط حوالى 15% و ده يمكن اللى عمل الفرق فى كلام التوكيل....ده غير إن ال1750 ده السعر بدون الضريبة...

صيانة ال60 ألف زى ال120 ألف بتشمل جميع السيور (كاتينة و دينامو و التكييف) + بوجيهات + زيت و فلتر + فلتر هواء + فلتر بنزين + مياه رادياتير+ المصنعيات و الضرايب... مش شرط تغيير طرمبة المياه.

صيانة ال40 ألف اللى هى زى ال60 ألف بس بدون السيور عاملة بالضريبة حوالى 890 جنيه + ضيف تمن السيور (600 جنيه تقسيم لوحده ) هتلاقيها عملت ال2000 جنيه.

**Hany Saad** · 24-06-2010 11:45 AM

المشاركة الأصلية كتبت بواسطة mouraddesk

تنبية يا استاذ ميجى السعر اللى فات ده غير شامل ثمن الزيت و الكلام ده من التوكيل و اسالوهم و افيدونى يا رجاله شكلى هروح بره كده بس الكاتينة هلى اللى هعملها فى التوكيل

يا أستاذ مراد....أنا جبت لحضرتك الأسعار من الأخر... لائحة أسعار الصيانات الجديدة اللى التوكيل نفسه بيديها للعملاء....

صيانة ال60000 كم اللى هى زى ال120000 كم كالأتى :

تشمل الصيانة تغيير زيت + فلاتر (هواء،زيت،بنزين) + بوجيهات + سيور (كاتينة،تكييف،دينامو) + طبات (أنا عارف طبة الزيت مش عارف طبات إيه تانى اللى بيغيروها) + مياه رادياتير.

- سعر قطع الغيار 1500 جنيه غير شاملة الضريبة أو الزيوت.
- سعر المصنعيات 650 جنيه غير شاملة الضريبة.
- المجموع 2150 جنيه + يضاف 10% ضريبة مبيعات
يساوى 2365 جنيه.

ثم تضيف عليهم تمن الزيوت يبقى كده كسرت ال2500 جنيه مستريح قوى.

لو كمان فى التفنيش النهائى إكتشف وجود لمض محروقة أو التكييف محتاج تغيير فلتر (فى حدود 150 جنيه) بيضفهم على الفاتورة.

الكلام ده كله من غير تمن طلمبة الميه...تقريبا بطلوا يغيروها دوريا مع الصيانات إلا لو فيها مشكلة.

ورقة الصيانات معايا فى العربية و الأسعار دى كلها مكتوبة فيها و كمان متعلقة فى التوكيل.

**mouraddesk** · 24-06-2010 02:08 PM

سؤال يا استاذ ميجى هو لازم تغيير طلمبة المياه كل 60 الف فى واحد من التوكيل قال لى انه لازم مش المفروض انها من الحاجات المعمرة

**Hany Saad** · 24-06-2010 02:45 PM

المشاركة الأصلية كتبت بواسطة mouraddesk

سؤال يا استاذ ميجى هو لازم تغيير طلمبة المياه كل 60 الف فى واحد من التوكيل قال لى انه لازم مش المفروض انها من الحاجات المعمرة

أستاذ مراد...المعلومات اللى عندى إنهم زمان كان لازم طالما بيغير سير التقسيم و فك فى المنطقة دى يغير معاها طلمبة الميه علشان تكون المصنعية واحدة.....لأنه لو حب يغير طلمبة الميه بعدين هيظطر يفك سير التقسيم و هتكون المصنعية عالية و أعتقد ده كان MEMO جيلهم من فرنسا....

لكن مؤخرا حتى لما سألت فى التوكيل و أنا بعمل صيانة ال40000 كم أخبار تغيير طلمبه الميه إيه....قالولى لأ مش لازم....

أعتقد الفكر الجديد دلوقتى إنهم مش بيغيروها.....طبعا أنا مش متأكد....

معلومة زيادة للوحوش....زى ما أنتوا عارفين أنا عامل بس 40000 كم لكن عربيتى موديل 2006 فالتوكيل حظرنى إنى لازم أعمل صيانة ال60000 كم علشان عدى على العربية أكتر من 3 سنين....لما أتكلمت مع معرفتى فى التوكيل قالى بصراحة هى المفروض 4 سنين مش 3 سنين بس الناس فى الصيانة ممشياها 3 سنين مع نفسهم.....ده غير يا جماعة إن فكرة ال60000 أو الأربع سنين ده الSAFETY LIFE TIME OPTIMALاللى رينو حطاه للقطع المستخدمة لكنه مش أقصى وقت تشغيل يعنى مش لو مشيت كمان ألف يقطع معاك....بالعكس ده فيه كمان من 10 إلى 15 ألف كيلو بالميت لغاية لما يبتدى يبقى خطر لكن للأمان بيغيروه بدرى.

فيه حاجات كتير المفروض يتعمل لها حسابات......يعنى طريقة سواقة و ظروف سواقة الأشخاص مش زى بعض....بمعنى لو حضرتك مشاويرك صغيرة جدا داخل البلد فى الزحمة والحر و كل شوية تركن و تتطفى و بعدين تدور العربية مش زى اللى بيسوق على طريق سريع.....لذلك مش المفروض أعامل العربيات كلها زى بعض....يعنى مثلا مش ممكن فترة غيار الزيت للعربية المستخدمة جوه البلد زى المستخدمة على الطريق السريع....

لكن لتكبير الدماغ مراكز الخدمة بتاخد الحد الأدنى و تغير علشان تريح دماغها و متخشش فى مشاكل....

طبعا ده موجود فى كل حاجة حوالينا...التكييف مثلا محدش بيبيعه بالحصان لمساحة الغرفة غير فى مصر....لأنه ببساطة بيديلك تكييف أزيد من طاقة الغرفة و خلاص...هو ليه يتعب نفسه و يشوف مساحة الشبابيك قد إيه و الغرفة قبلى و لا بحرى و أوقات التعرض للشمس و حسابات كتيره علشان يطلعلك التكييف المناسب سعرا أولا و حجما ثانيا للغرفة بتاعتك....كبر دماغك خد بزيادة و التسقيع الزيادة مفهوش ضرر....

أدعو جميع الوحوش للبحث جيدا قبل شراء أى شىء و محدش يعتمد أبدا على كلام مقدم الخدمة لأنه أكتر واحد مش فاهم و عايز يلبسك و خلاص....شغل مخك فى كل حاجة و أسأل كتير و أبحث على النت و ربنا يوفقكم جميعا......