الموضوع: اية رايكم فى مدينة الشروق

المشاركة الأصلية كتبت بواسطة أبو حمزة

عندك فكرة عن نظامها في الدفع هايكون إيه يا أستاذ محمد؟

المشاركة الأصلية كتبت بواسطة egyptawy2010

ده فى الحى الكام وكام سعر المتر

التفاصيل موجودة في الأعلان اللى انا عامله وعلي العموم سعر المتر يبدأ من 1250 للواجهة الخلفية والواجهة الأمامية يبدأ من 1500ج للمتر كاش والحي ده اسمه المستثمر الصغير وده في بداية الحي الثاني وكل الأراضي هناك مملوكة لشركات ورجال اعمال وكل العمارات فيها اسانسيرات ووراها منطقة تعليمية ومعاهد ومدرسة القديس يوسف وتبعد عن جهاز المدينة والطريق حوالى 300م.

المشاركة الأصلية كتبت بواسطة amir

معلش انا مخدتش بالي من سؤالك
الكلام اللي انا قلته ده حقيقي و حصل بالفعل
بس انا مش عايز اشنع و اقول كلام يخوف الناس بس انا عن نفسي مفكرتش حتي افتح عياده هناك في بدر مع اني ممكن افتح عياده هناك ببساطه بس اسلوب تعامل الناس هناك حتي معانا احنا الدكاتره في المركز الطبي هناك اسلوب سافل و منحط
و يكفي موقف حصل قدامي قبل كده من خناقه بين سواق توكتوك مع دكتور في الاستقبال و المشكله ان الدكتور ده سني متدين و كان بيعمل شغله بكل ضمير
سواق التوك توك كان جاي مع راجل في التلاتينات مع امه
الدكتور بيقوله مالك قاله زوري واجعني
قاله طيب افتح بقك اشوف زورك قاله مش قادر افتح
فقام يكتب الدوا
قامت والده المريض رايحه توريه كيس الادويه علشان يبقي عارف الادويه اللي عندهم
لحد هنا عادي
المشكله بقي لما سواق التوك توك قام رايح يكلم الدكتور
قام مخبط علي كتفه بزق كده و يقوله انت مالك مش عايز تكشف عليه ليه
و الدكتور بشهاده الكل لحد اللحظه دي كان بيتكلم عادي و بأسلوب طبيعي
قام سواق التوك توك مادد ايده تاني علي الدكتور ده و شاتمه بأمه
الدكتور بيقوله احترم نفسك
قام سابب الدين للدكتور و ماسك في خناقه
انا كنت قاعد مع مديره المركز و لما سمعت الصوت العالي قمت قايم اشوف الموضوع
و بفصل ما بينهم و بقولهم عيب يا جماعه بالراحه مش كده و بحجز بينهم بكل ادب و الله العظيم
عارف مين ضربني؟
المريض نفسه ناولني بالبوكس في وشي!!!!
ساعتها بقي قمت فاتح عليه و سحبنا الدكتور جوا عند مكتب المديره
اتصلنا بنقطه الشرطه الملازقه للمركز
قال الامين هناك انه لوحده مع امين تاني و هيتصل بالقسم
و احنا قافلين مكتب المديره علينا و قاعدين مستنيين
قلنا عايزين محضر تعدي علي موظف اثناء تأديه عمله
ام الواد كل شويه تحاول تخلص الموضوع و تتأسف
ابنها و سواق التوكتوك فارضين حصار بره
نقولها ابنك غلط جامد و احنا بنشوف شغلنا و مقصرناش
و ده ابدا
اللي حارقه بجد مش الضرب و الاهانه الشخصيه
اللي كان واجعه قوي سبه بأمه و سب الدين
قامت حاولت اكتر من مره تتهجم علي الدكتور و عايزه تمسك في خناقه بأي شكل في المكتب
سحبناها بره و قفلنا الباب و بقيت انا علي الباب من جوه علشان امنع اي مشكله تاني
شويه و الامين جه
و الام صباح الكدب و تلقيح الجتت
قام الامين نهرها
و وصل ساعتها معلم كده من الزلزال غالبا كبير المنطقه او حاجه
هو عايز يلم الموضوع و الدكتور متمسك بحقه
المهم
كتب الامين المحضر و روحنا القسم
سواق التوك توك و التاني اتحطو في الكلابشات و خدو تهزيق و كام قلم علي وشهم
و مأمور القسم عمل خاطر للمعلم ده (و ده اللي وضحلي انه كبير المنطقه هناك) و حاول يصلح بينهم
انا عن نفسي قبل ما نروح القسم حذرت مديره المركز ان الموضوع لو متلمش هيكون في ثأر من المركز و منا
و في القسم انا و دكتور كبير تاني قعدنا برضو نحايل في الدكتور السني لنفس السبب
الدكتور معاه حق اه بس المشكله في االلي هيحصل بعد كده للمركز و للممرضات و لينا
و فعلا تم الصلح و مشينا بعد ما الدكتور شاف بنفسه اهانه السواق و الراجل التاني

و دي اول مره يتم الاعتداء علي دكتور بس قبل كده حصلت حاجات مشابهه للتمريض خصوصا في النبطشيات الليليه

فمنطقه زي مساكن الزلزال دي لوحدها كفايه
و كان في دكتوره كبيره هناك معانا ليها حكايات عن بدر تقلق فعلا خصوصا صبحي حسين اللي حكاياتها عامله زي الباطنيه زمان كده من حوادث و سرقات و مخدرات و حاجات تانيه
و كان في دكتور هناك لما كان بيطلع علشان يكتب تقرير وفاه كان بيسيب الدفتر و الاختام في المركز علشان ممكن يجبروه يكتب وفاه طبيعيه لحد و هي جريمه قتل و سمعت منه عجايب عن صبحي حسين دي

انا شخصيا قدمت علي اجازه بدون مرتب من ساعه ما كانو عايزينا نمسك نبطشيات ليليه هناك غير اني كبني ادم بقيت مش عايز اتعامل مع ناس زي كده تاني اساسا
ياما قلو ادبهم عليا و علي الدكاتره مع اني كنت بعمل تجاوزات في الشغل علشان اخدمهم
يسمعوك كلام سخيف و بقله ادب و تحاول تمشي نظام و الدخول برقم مسلسل التذكره و دول ابدا و يكدبو و يعلو صوتهم
مره فتحت باب العياده اشوف مين اللي بيخبط عليه و هيكسره لقيت راجل و مراته و بيقولي معلش اصلها موجوعه قوي
و طبعا مش دورها في الدخول و في ناس كتير قاعدين من الصبح و هياكلونا لو دخلت حد قبل حد
فقمت قايله طيب هتدخل في دورها و سيبني بقي اشوف شغلي علشان ييجي دورها
سمع الكلام و شويه لقيتها هي اللي بتخبط و الممرضه فتحتلها الباب قمت ابص عليها كده علي الواقف لقيت ان حالتها مش بتعمل الوجع اللي هي بتقوله ده قلتلها طيب هييجي دورك و نكشف عليكي
قامت طالبه تذكرتها من الممرضه قلتلها اديهالها مسكتها و قطعتتها و رمتها في وشنا و قالت كلمتين ملهومش لازمه هي و جوزها بفرعنه متناهيه و مشيت

بص انا متعاطف مع الناس الاقل حظ منا في الدنيا و بحاول اقوم بالواجب و زياده معاهم
بس اساسا اي عياده اسنان علشان اعالج الناس صح لازم اخد وقتي معاهم
و مش معني ان التذكره بجنيه ولا جنيه و ربع ان الفلوس الكبيره دي داخله جيبي او انهم اشتروني بيها


بس انت شاري هناك خلاص و انا معرفش الاماكن في بدر غير اللي قلت عليهم و حاول تقضي اليوم هناك و تشوف بنفسك المستوي العام للمدينه و تسأل جيرانك خصوصا لو ساكنين قبلك عن الوضع ايه هناك
بس عن نفسي بدر دي مش عايز ادخلها تاني اصلا و بكرهها جدا

أشكرك حتى تستغيث :)
ربنا يكرمك و يبارك لك

بالنسبة لبدر بعد بحث ممبدئى لقيت ان الحياة فيها هتبقى صعبة سواء بسبب قلة الاهتمام و الخدمات زى المواصلات و ان المدينة كلها مفيهاش مستشفى و مستوى الناس الاخلاقى سىء بس الميزة الوحيدة هى وجود المنطقة الصناعية اللى الواحد لو اشتغل فيها هتبقى قريبة جدا . خير ان شاء الله
و دى مواقع بتتكلم عنها الحلو و الوحش فيها

مدينة بدر - الوصول للمدينة

جمعية رجال أعمال و مستثمرى مدينة بدر

مدينة بدر - خرائط المدينة

هام جدا بعض المعلومات في اختيار وترتيب الادارات الصحية قبل أن تختار مكان التكليف - اطباء العرب

http://omarelbadryy.maktoobblog.com/

مواصلات مدينة بدر

احدي فيلات الحي السادس بالعبور


الفيلا دي يقال انها بتاع حسن يوسف بقالهم اكتر من سنة بيشطبوا فيها.

المشاركة الأصلية كتبت بواسطة alaasaid

السلام عليكم ,

أنا ساكن فى الشروق من 2008 و الحمد الله مرتاح جدا , انا ساكن فى بانورما الشروق خلف الشروق 2000 مباشرة و فعلا الحى السابع من أرقى أحياء الشروق لانة كله فيلات و كومبوند و فيه نادى هليوبلس .

بس حضرتك لازم تشوف ظروفك كلها و تحسبها يعنى انت شغلك فى جامعة القاهرة فلازم تشوف هل تقدر كل يوم تسوق من الشروق لحد الجيزة ولا الموضوع هيكون مرهق فكدة يبقى التجمع اقرب لشغلك . انما من حيث المقارنة بين فيلا الشروق و فيلا التجمع طبعا الاحسن فيلا الشروق كمستقبل عشان المساحة اكبر و امكانية البناء بالاضافة الى التشطيب و من ناحية الامان فالحمد الله المكان كويس و مشفتش مشاكل من ساعة ما سكنت فى الشروق . و ربنا يكرمك فى اتخاذ القرار السليم و انا تحت امر حضرتك لو محتاج اى مساعدة

أنا متشكر جدا يا استاذ علاء فعلا أنا مقتنع جدا بالشروق و متوقع انها تكون أجمد من التجمع لأنى متوقع التجمع هيكون مدينة نصر بس اشيك شوية بس هيكون نفس الزحمة بالذات في الشوارع الرئيسية لما منطقة البيزنس تخلص يعنى بالكتير سنتين على ما اعتقد

و أنا حسبت المسافة وجدت انى هسوق 18 كيلو زيادة عن الآن و أعتقد مميزات المدينة و الفيلا يستاهلوا شوية التعب دول