انا عارف انه لسه بدرى، بس أنا عندى فكرة خاصة لمقابلة شهر مارس بمناسبة سفر أخونا اسلام شاهين و محتاجة ترتيب.

أولا باقترح ان اسلام هو اللى يحدد ميعاد المقابلة لأن اول جمعة فى مارس هتبقى يوم 7 مارس و يمكن ظروفه تبقى مضغوطة و فى الحالة دى باقترح نعمل المقابلة يوم الجمعة 29 فبراير و أهو تبقى مقابلة مابتحصلش غير كل 4 سنين.

ثانيا بالنسبة للمكان فأنا باقترح فكرة جديدة الا وهى أكلة كباب و كفتة فى فلوكة فى النيل، و ترتيبها هيكون سهل:

- نتفق على العدد بس اللى مش متأكد 100% ما يتعملش حسابه
- قبل المقابلة بيوم نبيت على الطلب عند ابوشقرة اللى فى القصر العينى بحيث يكون الطلب جاهز بعد الصلاة
- نتجمع عند مرسى دقدق (اللى جنب جراند هيات) بعد الصلاة و نلم الفلوس
- حد يروح يجيب الأكل مسافة ربع ساعة و حد تانى يجيب المشروبات
- ناخد فلوكة على عددنا ساعتين أو تلاتة و نتغدى

ايه رأيكم؟