الموضوع: الحمد لله يا برتوانيه انهارده بقيت برتوانى

المشاركة الأصلية كتبت بواسطة ahmedfathy77

اولا الف مبروك على العربية وربنا يهديك خيرها ويكفيك شرها.

تانى حاجة فيه سؤال بس محيرنى هو مش ابسط اجراء اى حد بياخده قبل ما يشترى اى منتج مهما كان انه يبص عليه او يعاينه على الطبيعة زى ما بنقول . فما بالك باه دى عربية يعنى مبلغ وقدره اعتقد لو كنت حضرتك مجرد انك اعدت فيها مرة واحدة قبل ما تشتريها كنت شفت خامة التابلوه اذا كانت فخمة ولا اى كلام ولو بصيت ورا اكيد كنت شفت الرؤية الخلفية زفت ولا كويسة حتى من غير سواقه قبل ما تفاجا بحاجة زى دى بعد ما تروح تستلم ؟؟

بالنسبة للعفشة الناشفة ده موضوع معروف عن الجين وذكر اكتر من مرة برضه المفروض ان ميكونش مفاجاة لاى حد وان كان معروف انه احد اهم اسباب ثبات العربية واعتقد ان حضرتك لو جربتها مرة مكونتش هتفاجا كده.

بالنسبة للسنتر اكيد من حق حضرتك يظبطوه لك فى اول صيانه واى عيب تانى ممكن يظهر .

استمتع بالعربية ومتفسدش فرحتك بيها وان شاء الله كل شىء هيبقى تمام .

+1111111111111111

مبرووووووووووك بس انا زعلان منك
العفشة مش ناشفة اوى زى ما نت متخيل خليك حنين بس عليها فى المطبات ومترزعهاش (العفشة بالنسبالى عشرة على عشرة عربيات عفشتها ناعمة بتتخلخل من مطبات ونقر شوارع مصر المحروسة وكدة كدةة البلد دى مينفعهاش غير نص نقل دبل كابينة :)
التقفيل انا شايفة عادى جدا ومش وحش بالعكس انا لما ركبتها وكانت اول مرة بجد اركبها ساعة الاستلام محستش ان الخامات وحشة عادية جدا ومقبولة الى حد كبير (دى عربية ب 91000 ) اوتو فل الفل الفل اوبشن عايز اية تانى :)
مش حتكلم عن قوة الموتور والسحب لانى لسة مجريتش بيها (650 كيلو ) لكن العربية شكلها حتقول كلام احلى من اللى بتقولة معايا بعد ال 1000 (وعايز اقول حاجة كمان العربية دلوقتى ومن ساعة الاستلام فايقة جدا مش مخنوقة ولا اى حاجة انا اللى مكتفها بس )
الرؤية الخلفية لاى ليفت باك صعبة لكن مش زفت دى بترجع للسواق فى الاول والاخر حيقدر يتعامل معاها ولا لاء وبعدين انت حتحتاج الرؤرية الخلفية فى الركن مش كدة (انا والله بعد اول اسبوع مبقتش ابص ورا اصلا السنسور بارك دة اخترااااااااااع ومريح جدا وحتى لما بيديك صفارة متصلة بيبقى بينك وبين اللى وراك بتاع 40 سم يعنى لسة بدرى :) متقلقش حتتعود على كل دة
انت بس خليك حنين عليها فى النقر وحجتحس انها ناعمة ولطيفة جدا جدا
العربية من كلام الناس هنا انا جبتها وبعد ما جبتها شكرتهم على حياديتهم ونقدتهم فى عيوب كتير كانوا قايلين عليها وانا ملقتهاش او محستش بيها وبردة الاول والاخر خبرة السواق بتفرق مع انى شايف سواقتها سهلة اوى الحمد والشكر لله
مبروووك وحتتعود عليها وحتيجى بعد الالف تقول سامحونى مكنش قصدى متزعليش منى يا جىجى مكنتش اعرفك :)
تحياتى

انا بشكر كل واحد حس بمشكلتى انا امبارح كنت فى غاية الضيق خصوصا ان حصل معايا حاجات كتير . اولا انا اخدت العربيه وجربت كل حاجه وانا فى ابو رواش وكله كان تمام وبعد كده مشيت روحت شغلى جيت انزل من العربيه المفتاح مرضيش يخرج من الكونتاكت كلمت محسن لانى معرفش غيره والحقيقه الراجل ده حبيته فى الله قالى جيب العربيه على البي قولتله انا فاهم طبعا قالى خلاص تعالى بكره اشفهولك طبعا انتوا متخيلين عربيه لسه جايبها من ساعه والمفتاح مش عايز يخرج المهم فضلت احاول لحد بعد حوالى نصف ساعه محاوله خرج حمدت ربنا جيت اقفل السنتر لقيته مش شغال مع انى مجربه هناك طبعا قفلت يدوى وكنت فى حاله من الضيق غير طبيعيه طلعت وقمت كاتب الموضوع والحقيقه انا اتحاملت على العربيه بس فعلا انا ماكنتش شايف غير اللى ضايقنى المهم نزلت باليل علشان اروح اكتشفت بعد ما روحت الاتى 1-السنسور بارك معلق وشغال على طول وده قلتلهم عليه وانا هناك قالولى لا ده علشان حواليك عربيات 2-التكييف قولت اجربه وانا ماشى لقيت تبريده وحش جدا 3-العربيه بتحدف يمين جامد قوى 4-الشنطه مش عايزه تفتح بالرغم انى مجربها برده بصراحه طلعت البيت وحلفت انى ارجعها واخد فلوسها مهما حصل . نزلت الساعه 10 ص قابلت محسن صالح والحقيقه الراجل امتص غضبى تماما وبعت معايا حد مركز الخدمه اللى فى القريه الذكيه قابلت المهندس مصطفى انسان غايه فى الاحترام وكلها طلعت مشاكل بسيطه جدا واتحلت فى اقل من ساعه وانهارده انا حاسس انى ظلمت العربيه والعربيه فعلا ما شاء الله الله اكبر تحفه