الموضوع: تجربتي مع زيت فيسكو

بسم الله الرحمن الرحيم

قبل ما أقول رأي وتجربتي أود أن أشكر المهندس / محمد التازي من الدعم الفني لشركة فيسكو ، واضح من المكالمة اللي أجراها معايا أنه شخص محترم وإن شاء الله أتعرف عليه شخصيا قريبا بعد عودتي للقاهرة .

مواصفات عربيتي كالتالي :

النوع : رينو أوبتيما موديل 97 1300 سي سي

العداد : حاليا 75700 كم

حالة المحرك : ممتازة والحمد لله

بعد عرض حالة السياره على المهندس محمد ، نصحني بإستخدام زيت فيسكو 3000 ألاف المعدني

وده بناء على حالة المحرك وأستخدامه القليل

قبل ما أقول رأي في الزيت ، عاوز أقول أني بقالي فترة بدور على زيت مناسب بعيدا عن السعر ، وبما إني كنت بعمل الصيانة في التوكيل حتى الـ 70000 كم ، فكان من الطبيعي أنهم يحطوا الزيت المتعاقدين معاه اللي هو Total

بصراحة الزيت التوتال ماكنش وحش لكن بردو ماكنش الرائع

جربت مرة زيت موبيل XHP من باب تجربة الموبيل - ودي كانت أول مره أغير بره التوكيل - ولكنه بصراحة سيء للغاية

طبعا بعد تجارب اخواني الأعضاء هنا في المنتدى لزيوت فيسكو أقتنعت بيه جدا خصوصا بعدما أكد المهندس محم على أن كلا من زيت فيسكو 3000 المعدني وزيت فيسكو 5000 التخليقي مصنع ومعبأ بالأمارات وبالتالي لا يحتوي على الزيت المصري في تكوينه الأساسي مثل باقي أنواع الزيوت في مصر .

-----------

إنطباعي عن الزيت:

1. لونه فاتح جدا لدرجة أني في أول 400 كم أستخدام ماكنتش بعرف أشوفه على علامة المقياس.

2. يعطي أنطباع خاطئ بأن لزوجته قليلة عن باقي الزيوت مصرية الأساس ، ولكن على العكس لزوجته ممتازه.

3. يحتوي على تكنولوجيا الدرع الحراري ، وفعلا في فرق في إنخفاض الحرارة ولكن بنسبة ضئيله جدا.

4. ودي بأعتبرها أهم حاجه لاحظتها وهي أن صوت الموتور أنخفض بنسبة 30 % ، ولولا المبالغة لقولت بأعلى من النسبة دي كمان ، فعلا صوت الموتور هدي جدااااااااااااااااااااااا ااااااااا وأنا ملاحظه لأن موتور الرينو جنزير وصوته عالي وملحوظ ، لدرجة أني وصلت دلوقتي أني ماعرفش الموتور داير ولا لأ على السلانسيه في أول اليوم .

5. ودي تعتبر مهمة بالنسبه الي وهي أستهلاك البنزين ، رجع أستهلاك البنزين للمعدل الطبيعي ، بعد ما دوخت علشان أعرف سبب أرتفاع معدل أستهلاك البنزين وعملت كل حاجه ممكنه ، لكني لم أربط إستهلاك البنزين بزيت موبيل السيء للأسف ، ولكن الحمد لله رجع كما كان تماما .

6. أحتواءه على تكنولوجيا بتنظف المحرك حقيقة 100% ومجربة وده لأني بعد تغير الزيت بيومين أضطريت لسبب ما أني أنزله مرغما وغرمت تمن جركن تاني ، ولكن الزيت اللي كان نازل نزل أسود جدا ، ولما حطيت الزيت مره تانيه - جديد طبعا ومن نفس النوع - زي ماقولت لحد أكتر من 400 كم ماكنتش عرف أميز وجود الزيت من عدمه على مقياس الزيت وفعلا بدون مبلاغة نهائي ، والحمد لله كأني غسلت الموتور من جوه بـ 115 جنيه .

دي كان تجربتي مع زيت فيسكو ، وأنا تعمدت التوضيح في بعض النقاط للأفادة.

وتحت أمركم في أي أستفسار