الموضوع: أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

الحمدلله اتعرضت لعمليات النصب المعروفه في مصر زي نصب الخوابير الامريكاني بتاعت الكاوتش ،وشركات التايم شير
الحاجه اللي متضايق منها هو جهاز اقرأ اللي بيجيله اعلان في اذاعة القرآن الكريم في الراديو
جبته لوالدتي ب1250 جنيه ولقيته في السعوديه الموديل الاحدث فيه 7 اصوات (القديم صوت واحد) وب350 ريال ومع الفصال بقى ب300ريال بس!! يعني النصب في القرآن والمكسب اضعاف!

وكمان اتعرضت للنصب في موبايل سامسونج اومنيا 2 من التوكيل في السعوديه ،جالي الموبايل عليه سيريال غير العلبه والفاتوره يعني الضمان ملهوش لازمه وكمان كان عليه نيتوورك لوك يعني الموبايل جاي من اوروبا بسعر رخيص علشان عليه عرض والتوكيل شخصياً بيبيعه للناس!! وطبعاً رجعته لصاحبي اللي جابه بس للاسف طلع ............ ومعرفش يخليهم يغيروه ونزلوله سوفت وير وفكو اللوك ومفيش ضمان ولا بتنجان والموبايل شغال روح بيتكو ،ان كان عاجبك

انا اتنصب عليا فى معيز, اه و الله معيز, جمع معزة, كنت فى سوق العاشر بدور على عربية بعد ما بعت العربية القديمة, لفيت لما زهقت و كان معايا عربية أخويا , رحت ارتاح فيها شوية جالى اتنين فلاحين سارحين بمعيز وفضلوا يستفزونى انى معييش فلوس اشترى , و انى لو طلعت 700 جنيه أخد 3 معيز مرة واحدة, انا قلت فى سرى دول لقطة و ابقى افرقهم على العيلة و احطهم فى التلاجة بدل اللحمة, خدوا الفلوس و سابولى 3 معيز اشباح, كانو جلد على عضم و عواجيز, الحمد لله بعتهم عندنا فى البلد ب 500 جنيه و طلعت الفلوس لله لأنى كنت متأكد ان ربنا بينبهنى و بيمتحنى, و ان الفلوس دى كانت مش من نصيبى, بس زعلت من نفسى جدا انى كنت سازج للدرجة دى

احب اضيف تجربتى مع ضابط من مرور الاسكندريه كنت كتبتها قبل كده :

من حوالى 4 سنين كنت فى اسكندريه على الكورنيش وخارج مع العائله وركنت قرب كوبرى ستانلى وكان فيه حوالى اكتر من سبع عربيات راكنه جنبى وفجأه لقيت ونش مرور وضابط برتبه عقيد نازل منه وعمال يلم الرخص من الناس اللى واقفه وبعتلى عسكرى ياخد الرخص ... رحتله خير ياباشا قالى الركنه ممنوع وهات 25 جنيه ابص يمين وشمال انى اشوف يافطه ممنوع الوقوف مفيش !!
قلتله انا مش شايف اى يافطه ممنوع الانتظار هنا .. قالى لا فيه بس بعيد شويه هات الفلوس روحت مطلع من سكات ودفعتله ال 25 لحلوح وكمان كل اللى كان معايا دفع فقلت خلاص مش مشكله والبيه ادانى وصل ... المفاجأه بقى ببص فى الوصل اللى انا اخدته بعد مامشيت من البيه النصاب مكنش وصل بالمخالفه كان وصل مكتوب فيه وصل استلام رسوم لمدرسه تعليم قياده السيارات التابعه للمرور ومش مختوم !!!! يعنى البيه النصاب واخد دفتر ايصالات من مدرسه المرور وماشى عمال يلم فى فلوس الناس على اساس انه بيديهم مخالفات وبيلم الفلوس فى جيبه وعلى فكره انا لسه محتفظ بالوصل ده الى الان للذكرى الخالده

موقف اتحكالى بس ماشوفتوش والله اعلم من صحته
واحد اتسرقت منه عربيته من تحت البيت المهم تانى يوم لقى العربية ولقى جواب على التابلوه مكتوب فيه كمية اعتذارات رهيبة وبشكل ذوق جدا ان السارق كان غصب عنه السرقة والدليل انه رجع العربية وفى نفس الوقت مغسولة كمان علشان يثبت انه مش قاصد يسرق المهم السارق كان سايب مع الجواب تذكرتين مسرح زى ما تقولو تعويض عن السرقة. الراجل صاحب العربية طبعا مش مصدق نفسه من فرحة العربية اللى رجعت قام واخد مرته وراحوا المسرحية اللى جالهم وتذاكرها ولما رجعوا الشقة طبعا انتو عارفين الباقى .......... الشقة محتاجة تتفرش من اول وجديد (الله اعلم من صحة الكلام بس الفكرة عجبتنى اوى :) )