الموضوع: تصليح كاسيت النوبيرا ...بالصور

بسم الله الرحمن الرحيم
كتير من مُلاك النوبيرا اشتكوا ان الشريط بيدخل جوة الكاسيت ومابيطلعش والبعض قال ان ده عيب فى الشريط نفسه وان الكاسيت مابيقبلش غير الشرايط الاصلية....الحكاية دى حصلت عندى وقعدت اكتر من سنة اشغل راديو بس ومش عارف اطلع الشريط المحشور جوة باى حاجة لا سكينة ولا مفك ولا غيره لدرجة ان جزء من الشريط اتكسر وبردو حالف مايتحرك مللى, وديتها لبتوع الكاسيتات كلهم خافوا يفتحوه اساسا و قالولى وديه التوكيل بتاعه لغاية مارحت التوكيل فى الاسماعيلية وقالى ان تصليح الكاسيت لازم فى توكيل فى القاهرة ولما بعته مع واحد للتوكيل فى القاهرة ,التوكيل قاله هنغيرهولك بواحد جديد وطبعا الجديد بتاع نوبيرا 2 فمرضتش اغيره
وفى يوم من الايام الشيطان لعب فى دماغى وقالى جرب كده فيه (خصوصا ان دى هوايتى) ماهو كده كده بايظ انت مش هاتبوظ حاجة زيادة اتحمست وعملتها والحمد لله نجحت واليكم التفاصيل...اهم حاجة القلب الجامد وافتكر انك مش هاتخسر حاجة لأنه كدة كدة بايظ
عربيتى نوبيرا 1 فالتابلوه مختلف عن نوبيرا 2 بس بصراحة ماخدتش بالى مختلف فى ايه والشرح على نوبيرا وان بس ان شاء الله يكون فى تشابه مع نوبيرا تو
اول حاجة هانشيل الاطار البلاستيك اللى حولين الكاسيت...ازاى؟؟ هانفتح درج الولاعة هنلاقى مسمارين فى الدرج من فوق ماسكين الفرام البلاستيك هانفكهم وبعد كدة نحاول نشده بادينا ولو مانفعش ممكن بمفك عادة (هو متركب كبس)
تانى حاجة هنلاقى مسامير الكاسيت والاكويلايزر هانفكهم كلهم
هيطلع لينا الاتنين لازقين فى بعض زى الصورة اللى تحت هانفصلهم عن بعض عشان نشتغل على رواقة

تالت حاجة نمسك الكاسيت عدِل هنلاقى مسامير صغيرة فى الجنب فوق هانفكها(يعنى المسامير فى الجنب) وباى حاجة(انا عملته بمفتاح الشقة) ليها سن نشيل غطا الكاسيت الحديد(سقف الكاسيت ) والصورة دى بتوضح مكان المسامير



رابع خطوة هنلاقى الكاسيت من جوه بالشكل ده..الدايرة رقم واحد ده الشريط اللى اتكسر وانا بحاول اطلعه والدايرة رقم اتنين ده الماتور اللى هانشتغل عليه




خامس حاجة هنلف راس الموتور الصغير ده (فى الدايرة رقم واحد) بس الصراحة مش فاكر انهى ناحية المهم انك تحس ان مكان مدخل الشريط( عند السهمين الحمر فى الصورة) بيطلع لفوق وماننساش اهم حاجة واللى انا افتكرت نفسى فشلت بسببها>>>شايفين الدايرة رقم اتنين هتلاقوا حديدة صغيرة على شكل حرف L .الحديدة دى هتلاقوها داخلة فى اتجاه السهم اللى جمبها ومانعة الشريط انه يطلع لفوق..الحديدة دى هانشدهها لبرة يعنى عكس اتجاه السهم اللى مرسوم جمبها ونبدأنلف راس الموتور فى الاتجاه اللى تحس ان الشريط بيترفع لفوق لما بتعمله وماننساش ده كله واحنا شادين الحديدة الصغيرة برة الهيكل اللى فيه الشريط



طبعا هتلاقوا الشريط اترفع وبقى قدام باب الكاسيت بس مش راضى يطلع منه, انزلوا وصلوا الكاسيت بالعربية واول حاجة هاتشوفوها هو الشريط وهو بيطلع من الكاسيت ان شاء الله...صوروها فيديوا وذلوا بيها التوكيل

الموضوع ده افتكاسة شخصية وتصوير حى من غرفتى بعد اغلاق ابوابها بالمفتاح ..لأن لو كان السيد الوالد قفشنى مع الكاسيت المتفكك كان ممكن يحرمنى من الميراث ويطردنى من البيت ويتبرى منى كمان لذا ارجو عند النقل ذكر المصدر:نايل موتورز
وفقكم الله

انا عندي نوبيرا 97 وفيها نفس الكاسيت بس المشكلة مختلفة وهي ان اول ما بدخل الشريط بيطلع لوحدة بعد كام ثانية جربت كذا شريط ونفس النتيجة ينطر لوحدة يا ترى ايه المشكلة فى الحالة دى